ލޯކަލް ކައުންސިން އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ވޯޓަށް ތައްޔާރުވުމަށް، މިރޭ މާލޭގައި ކުރިއަށްގެންދާ "ދަ ގްރޭޑާ އައްޑޫ" ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވަޑައިގަންނަވާ ގޮތަށް ހަމަޖެހިއްޖެއެވެ. 

ދަ ގްރޭޓާ އައްޑޫ ވިޝަންގެ ތަފްސީލް ލޯންޗުކުރުމުގެ ޙާއްޞަ ޙަފްލާއަށް އައްޑޫ ސިޓީގެ އެންމެހާ ރައްޔިތުންނަށް، ޕާޓީގެ މެންބަރުންނާއި ޕާޓީގެ ހުރިހާ ސަޕޯޓަރުންނަށް ޕީޕަލްސް ނޭޝަނަލް ކޮންގްރެސް (ޕީއެންސީ) އިން ވަނީ ދައުވަތު އަރުވައިފައެވެ. 

ރައީސުލްޖުމްހޫރިއްޔާ ބައިވެރިވަޑައިގަންނަވާ މި ޚާއްޞަ ޙަފްލާ އޮންނާނީ އާޓިފިޝަލް ބީޗުގައި މިރޭ 9:30 ގަ އެވެ.

އިންތިޚާބަށް ތައްޔާރުވުމުގެ ގޮތުން ކޮންގްރެސް ޕާޓީން އަންނަނީ ގިނަ ހަރަކާތްތަކެއް ހިންގަމުންނެވެ. އޭގެތެރޭގައި ސިޓީތަކުގެ ކެމްޕޭން ޖަގަހަތައް މާލޭގައި ވަނީ ހުޅުވައިފަ އެވެ. އެގޮތުން އައްޑޫ ސިޓީގެ ކެމްޕޭން ޖަގަހަ ވެސް މީގެކުރިން މާލޭގައި ވަނީ ހުޅުވައިފަ އެވެ. 

ކައުންސިލް އިންތިޚާބުގެ ކެމްޕޭނުގައި، ރައީސުލްޖުމްހޫރިއްޔާ ގެންދަވަނީ ކެންޑިޑޭޓުންނާ އެކު ގިނަ މަސައްކަތްޕުޅުތަކެއް ކުރައްވަމުންނެވެ. އެގޮތުން، މާލެ ސަރަޙައްދުގެ ކެންޑިޑޭޓުންނާ އެކު ދޮރުން ދޮރަށް ހަރަކާތުގައި އެމަނިކުފާނު ބައިވެރިވެވަޑައިގަންނަވައެވެ. މިހާތަނަށް މާލޭގެ 11 ދާއިރާއެއްގެ ދޮރުން ދޮރަށް ހަރަކާތުގައި އެމަނިކުފާނު ބައިވެރިވަޑައިގެންފައިވެއެވެ. 

ދަ ގްރޭޓާ އައްޑޫ ޖަލްސާގައި މިރޭ އައްޑޫ ތަރައްޤީގެ އުފާވެރި ޚަބަރުތަކެއް ލިބިގެންދާނެއެވެ. މި ސަރުކާރުން އަންނަނީ މާލެ ފިޔަވަހި އެންމެ އާބާދީ ބޮޑު އައްޑޫ ސިޓީގައި ތަރައްޤީގެ ގިނަ މަޝްރޫޢުތަކެއް ހިންގަމުންނެވެ. 

ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ އިތުރުން، ރައްޔިތުންގެ ފެންނަ ނުފެންނަ ވޯޓު ނެގުން އޮންނާނީ އޭޕްރީލް މަހުގެ 4 ވަނަ ދުވަހު އެވެ.