ޖަލުގެ ތެރެއަށް ސިއްރުން މަނާތަކެތި ވެއްދުން ހުއްޓުވުމަށާއި ޖަލުގެ ތެރޭން ކުރާ ސްކޭމް ކޯލުތައް ހުއްޓުވަން ބޮޑީ ސްކޭނަރެއް ގެނައުމުގެ ވާހަކަތައް ދެކެވުމުން އެމްޑީޕީގެ ސަރުކާރުން އެކަން ނުކުރަން ދެއްކި ބަހަނާއަކީ ބޮޑު ދައުލަތުގެ ބަޖެޓުން ބޮޑު ހަރަދެއް ކުރަންޖެހުން ކަމަށް ފިނޭންސް މިނިސްޓްރީގެ ސްޓޭޓް މިނިސްޓަރު އަދި ފޭދޫ ދާއިރާގެ ކުރީގެ މެމްބަރު މުޙައްމަދު ނިހާދު ވިދާޅުވެއްޖެ އެވެ. 

ޖަލުގެ ތެރެއަށް ސިއްރުން މަނާތަކެތި ވެއްދުން ހުއްޓުވުމަށާއި ޖަލުގެ ތެރޭން ކުރާ ސްކޭމް ކޯލުތައް ހުއްޓުވަން މާލެ އަތޮޅު މާފުށީ ޖަލުގައި ބަހައްޓާފައިވާ ބޮޑީ ސްކޭނަރު އިންސްޓޯލްކޮށް ބޭނުންކުރަން ފެށީ މިދިޔަ މަހުގެ 28 ވަނަ ދުވަހުން ފެށިގެން ނެވެ.

މި ބޮޑީ ސްކޭނަރުގެ ސަބަބުން މާފުށީ ޖަލުން ކުރަމުން އައި ސްކޭމް ކޯލްތައް މަދުވެގެންދާނެ ކަމުގެ ޔަގީންކަން ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙުސާން ވަނީ ދެއްވާފަ އެވެ. 

ވަޒީރު މިފަދައިން ވިދާޅުވި ހަބަރެއްގެ ސްކްރީން ޝޮޓަކާއެކު ސޯޝަލް މީޑިއާގައި ހިޔާލުފާޅުކުރައްވަމުން ކުރިން އެމްޑީޕީގެ އިސް ސަފުގައި ހަރަކާތްތެރިވި ނިހާދު ވިދާޅުވީ ޖަލަށް ފޯނާއި މަސްތުވާތަކެތި އެތެރެކުރުން ފަދަ ނުރަނގަޅު އަމަލުތައް ހުއްޓުވުމަށްޓަކައި، ސްކޭން ކުރާ މެޝިނާއި ޑޭޓާ ކޮންޓްރޯލް ސިސްޓަމްތައް ގާއިމުކުރުމާ ގުޅޭގޮތުން ވާހަކަދެކެވުމުން އޭރު އެމްޑީޕީން ބުނެފައިވަނީ ބޮޑު ހަރަދެއް ހިނގާނެ ކަމަކަށްވާތީ އެކަން ކުރެވެން ނެތް ކަމަށެވެ. 

ނަމަވެސް މިއަދުގެ ހާލަތު ތަފާތުކަމަށާއި ރައްޔިތުންނާ ގުޅުން ހުރި ކަންކަން ރައީސުލްޖުމްހޫރިއްޔާ ގެންދަވަނީ ކިތަންމެ ދަތީގައި ވެސް ކުރައްވަމުން ކަމަށް ނިހާދު ވިދާޅުވި އެވެ. 

ޖަލުގައި ގައިދުވެފައި ތިބޭ ގައިދީން ފޯނު ބޭނުންކޮށްގެން ހިންގާ އެކިކަހަލަ ސްކޭމްތައް ހުއްޓުވުމަށް ސަރުކާރުން ދަނީ ހަރުދަނާ ގިނަ ފިޔަވަޅުތަކެއް އަޅަމުން ނެވެ. 

މޯލްޑިވްސް ކަރެކްޝަނަލް ސާވިސްއިން ކުރިން ބުނީ މި ބޮޑީ ސްކޭނަރަކީ ސަލާމަތީ ކަންކަން ހަރުދަނާ ކުރުމަށް ޖަލުގައި ބެހެއްޓުނު އެންމެ ފަހުގެ ޒަމާނީ ބޮޑީ ސްކޭނިން މެޝިނެއް ކަމަށެވެ. މިއީ މާފުށި ޖަލުގައި ބެހެއްޓުނު މިފަދަ ފުރަތަމަ މެޝިންކަން ފާހަގަކޮށް ސަރުކާރުންމި މެޝިން ފޯރުކޮށްދިނީ ދާހިލީ ސަލާމަތާއި ފަންނިއްޔާތާ ބެހޭ ވުޒާރާ މެދުވެރިކޮށް ކަމަށް ކަރެކްޝަނަލް ސާވިސްއިން ބުނެފައި ވެއެވެ. 

ޖަލުތަކުގެ ތެރެއަށް ވެއްދުން މަނާތަކެތި ވައްދައި، ކުށްކުރަމުން ދިޔަ ދިޔުން ހުއްޓުވުމަށް، އެންމެ ޒަމާނީ ބޮޑީ ސްކޭނަރެއް މާފުށީ ޖަލަށް ގެންދެވިފައިކަން އެންމެ ފުރަތަމަ ހާމަކުރެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.