ދިވެހި ބަހާއި ޘަޤާފާއި ތަރިކައާ ބެހޭ ވުޒާރާއާ އެ ވުޒާރާގެ ދަށުން ހިންގާ ދިވެހި ތަރިކައިގެ އެކިއެކި ގުނަންތަކުން މި އަހަރުވެސް ގިނަ ހަރަކާތްތަކެއް ކުރިއަށް ގެންދަން ނިންމާފައިވާ ކަމަށް ވަޒީރު އާދަމް ނަސީރު އިބްރާހިމް ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުގައި މިއަދު އޮތް ނޫސްވެރީންގެ ބައްދަލްވުމުގައި ވަޒީރު ވަނީ ޖަނަވަރީން ޑިސެންބަރަށް ހިންގުމަށް ހަމަޖެހިފައިވާ މުހިންމު ހަރަކާތްތަކާއި އެ ވުޒާރާގެ ބެލުމުގެ ދަށުން ކުރިއަށް ގެންދަން ނިންމާފައިވާ ބައެއް މަޝްރޫޢުތަކުގެ ތަފްސީލު ހިއްސާ ކުރައްވާފަ އެވެ.

ދިވެހި ބަހާއި ޘަޤާފާއި ތަރިކައާ ބެހޭ ވުޒާރާއިން މުޅި އަހަރަށް ބަހާލައިގެން ނަކަތުގެ ސިންތާތަކެއް ކުރިއަށް ގެންދެ އެވެ. ވަޒީރު ވިދާޅުވި ގޮތުގައި މި އަހަރުވެސް މުޅި އަހަރަށް ބަހާލައިގެން ސިންތާތައް ކުރިއަށް ގެންދާނެ އެވެ.

އެގޮތުން ޖަނަވަރީ މަހު ވަނީ އުތުރުހަޅަ ނަކަތުގެ ސިންތާ އާއި ހުވަން ނަކަތުގެ ސިންތާ ބާއްވާފަ އެވެ. އަދި އޭޕްރީލް މަހު އައްސިދަ ނަކަތު ސިންތާ އާއި ބުރުނު ނަކަތުގެ ސިންތާ އޮންނާނެ އެވެ. ޖޫންގައި މިއަހެލި ނަކަތުގެ ސިންތާ އާއި އަދަ ނަކަތުގެ ސިންތާ އޮންނާނެ އެވެ.

ސެޕްޓެންބަރު މަހު އުތުރަނަކަތުގެ ސިންތާ އާއި އަތަ ނަކަތުގެ ސިންތާ އޮންނާނެ އެވެ. ނޮވެންބަރު މަހުގެ ތެރޭގައި ވިހާ ނަކަތުގެ ސިންތާ ނޮރަނަކަތުގެ ސިންތާ އަދި ދޮށަ ނަކަތުގެ ސިންތާ ބޭއްވުމަށް ވަނީ ތާވަލުކޮށްފަ އެވެ.

މިއިން ކޮންމެ ސިންތާ އަކީ ތަފާތު ޢިލްމީ ބައްދަލްވުންތަކެކެވެ. މިއީ ވަރަށް ބޮޑަށް ރޭވިގެން ކުރިއަށް ގެންދެވޭ އިލްމީ ގޮތުން ވަރަށް ފޭރާން ހެޔޮ ބައްދަލްވުންތަކެކެވެ. ކޮންމެ ބައްދަލްވުމެއްގައި ތަފާތު ދިރާސާތަކެއްގެ މައްޗަށް ހުށައެޅުންތައް ހުށައެޅޭނެ އެވެ.

މި އަހަރަށް ރޭވިފައިވާ އިލްމީ މަސައްކަތްތަކުގެ ތެރޭގައި ދެ މޫސުމަށް ޚާއްސަކޮށްގެން ކުރިއަށް ގެންދާ ކަޅޮއޮފުންމި މަހާސިންތާ ވެސް ހިމެނެ އެވެ. 

ފުރަތަމަ އޮންނާނީ ހުޅަނގު މޫސުމުގެ މަހާސިންތާ އެވެ. އެ މަހާސިންތާ ރޭވިފައި ވަނީ މެއި 21 ވަނަ ދުވަހަށެވެ. އިރުވައި މޫސުމުގެ މަހާސިންތާ އޮންނާނީ ނޮވެންބަރު މަހުގެ ތެރޭގަ އެވެ.

ރާއްޖޭގެ ހިރިގަލުގެ މިސްކިތްތައް ޔުނެސްކޯގެ ދާއިމީ ލިސްޓްގައި ހިމެނުމުގެ މަަސައްކަތަކީ 1986 އަހަރުން ފެށިގެން ކުރަމުން އަންނަ މަސައްކަތެކެވެ. އެ މަަސައްކަތަށް މިހާރު ވަނީ ވަރަށް ބޮޑު ކާމިޔާބީއެއް ހޯދިފަ އެވެ.

އެގޮތުން މިހާތަނަށް ކުރެވުނު ގިނަ މަސައްކަތްތަކުގެ ނަތީޖާއެއްގެ ގޮތުން ރާއްޖޭގެ ހިރިގަލުގެ މިސްކިތްތައް ޔުނެސްކޯގެ ދާއިމީ ލިސްޓްގައި ހިމެނުމަށް ކަމާގުޅޭ ފަރާތްތަކަށް މިހާރު ވަނީ ނޮމިނޭޝަން ހުށައެޅިފަ އެވެ.

މި އަހަރުގެ މިހާތަނަށް ދިވެހި ބަހާއި ޘަޤާފާއި ތަރިކައާ ބެހޭ ވުޒާރާއިން ވަނީ ޝަހީދުންގެ ދުވަސް ފާހަގަކޮށްފަ އެވެ. އަދި ދިވެހީން ރޯދައަށް ތައްޔާރުވުމަށް ކުރަމުން އައި ކަންކަން ދިރުވާ އާލާކުރުމުގެ ގޮތުން މުޅި ރާއްޖޭގައި ސާފުކުރުމުގެ މަސައްކަތް ކޮށްފައިވެ އެވެ. އެއީ މާލެއާ އަތޮޅުތަކުގައި ވަރަށް ކާމިޔާބުކަމާއެެކު ކުރިއަށް ގެންދެވުނު ހަރަކާތެކެވެ.

މީގެ އިތުރުން އިސްރަށްވެހީންގެ ނާދީއާ ގުޅިގެން ދިވެހި ބާވަތްތަކުގެ ކެއްްކުމުގެ މުބާރާތެއް ވަނީ ބާއްވާފަ އެވެ. އަދި މާދަރީ ބަހުގެ ދުވަހާއި ޤައުމީ ތާރީޚު ދުވަސް ވެސް ވަނީ ފާހަގަކޮށްފަ އެވެ. މީގެ އިތުރުން ޅެންވެރީންގެ ދުވަސް މިއަހަރު ވަރަށް ކުލަގަދަކޮށް އައްޑޫ ސިޓީ ހިތަދޫގައި ވަނީ ފާހަގަކޮށްފަ އެވެ.

އަދި ދިވެހި އެކަޑަމީގެ ފަރާތުން ފޮތް މަރުކަޒަކާއި ގުންޒަރެއް ބާއްވާފައިވެ އެވެ.

ދިވެހި ޤައުމިއްޔަތު ދިރުވާ އާލާކުރުމުގެ ދުވަސް ފާހަގަކުރުމުގެ ގޮތުން މާދަމާ އާއިލީ ފިނިބުރެއް ބޭއްވުމަށް ވަނީ ނިންމާފަ އެވެ.  

މިއީ ދިވެހި ބަހާއި ޘަޤާފާއި ތަރިކައާ ބެހޭ ވުޒާރާ އިން ދައުލަތުގެ އެހެން އިދާރާތަކާއި އޮފީސްތަކާއި ކުންފުނިތަކާއި ގުޅިގެން އިންތިޒާމުކުރާ ހަރަކާތެކެވެ. ދިވެހި ޤައުމިއްޔަތު ދިރުވާ އާލާކުރުމުގެ ދުވަހަކީ ކޮންމެ އަހަރެއްގެ ވެސް މާޗް މަހުގެ ހަ ވަނަ ދުވަހެވެ.

ދިވެހި ބަހާއި ޘަޤާފާއި ތަރިކައާ ބެހޭ ވުޒާރާގެ ވަޒީރު އާދަމް ނަސީރު އިބްރާހިމް ވިދާޅުވީ ދިވެހި ޤައުމިއްޔަތު ދިރުވާ އާލާކުރުމުގެ ދުވަސް ފާހަގަކުރުމުގެ ގޮތުން މާދަމާ އާއިލީ ފިނިބުރެއް ބޭއްވުމަށް ނިންމާފައިވާ ކަމަށެވެ. ފިނިބުރު އޮންނާނީ މާލޭ ބޮޑުތަކުރުފާނު މަގުގަ އެވެ.

ވަޒީރު ވިދާޅުވި ގޮތުގައި މި ފިނިބުރުގައި ދައުލަތުގެ އެކި އިދާރާތަކާއި އޮފީސްްތަކާއި ކުންފުނިތަކުން މި ފިނިބުރުގައި ބައިވެރިވާނެ އެވެ. މިއީ ދިވެހީންގެ ގުޅުންތެރިކަން އިތުރުކުރުމުގެ މަޤްސަދުގައި ބާއްވާ އާއިލީ ފިނިބުރަކަށް ވާތީ ވީހާވެސް ގިނަ ބަޔަކު މި ފިނިބުރުގައި ބައިވެރިވުމަށް ވަނީ އެދިފަ އެވެ.

ދިވެހި ބަހާއި ޘަޤާފާއި ތަރިކައާ ބެހޭ ވުޒާރާއާ އެ ވުޒާރާގެ ދަށުން ހިންގާ ދިވެހި ތަރިކައިގެ އެކިއެކި ގުނަންތަކުން އެކިއެކި ތަމްރީނު ޕްރަގްރާމްތަކާއި ތަފާތު އެކި ކޯސްތައް ވެސް ހިންގަން މި އަހަރު އޮތީ ރާވާފަ އެވެ.

އެގޮތުން ޅެން ހަދަން ދަސްކޮށްދޭ ކޯހަކާއި ތަމްސީލު ލިޔަން ދަސްކޮށްދޭ ކޯހަކާއި ދިވެސް އަކުރު ދަސްކޮށް ދިނުމުގެ ކޯހަކާއި ވާހަކަދައްކަން ދަސްކޮށްދިނުމުގެ ކޯހަކާއި ދިވެހި ބަސް ހެޔޮ ގޮތުގައި ބޭނުންކުރަން ދަސްކޮށްދިނުމަށް ފަރުމާ ކޮށްފައިވާ ޚާއްސަ ކޯހެއް ކުރިއަށް ގެންދަން ވަނީ ނިންމާފަ އެވެ.

* ޅެން ކޯސް - މާޗް މަހު

* ދިވެސް އަކުރު ދަސްކޮށް ދިނުމުގެ ކޯސް - މެއި މަހުގެ ފަހު ދުވަހު ފަށާނެ

* ތަމްސީލު ލިޔަން ދަސްކޮށްދޭ ކޯސް - މެއި މަހު

* ވާހަކަދައްކަން ދަސްކޮށްދިނުމުގެ ކޯސްތަކެއް - ޖުލައި މަހު

* ދިވެހި ބަސް ހެޔޮ ގޮތުގައި ބޭނުންކުރަން ދަސްކޮށްދިނުމަށް ފަރުމާ ކޮށްފައިވާ ޚާއްސަ ކޯސް - ނޮވެންބަރު މަހު

މީގެ އިތުރުން މަޒުމޫން ލިޔުމާއި ކުުރު ވާހަކަ އަދި ވާހަކަ ދެއްކުމަށް ދަރިވަރުން ތަމްރީނު ކުރުމުގެ ހާއްސަ މަސައްކަތްތަކެއް އޭޕްރީލް މަހު ކުރިއަށް ގެންދަން ވަނީ ނިންމާފަ އެވެ.

އޭޕްރީލް މަހުގެ ތެރޭގައި ތަރިކައިގެ ރަސްމީ ޕޯޓަލް އިފްތިތާޙު ކުރުންތަރިކައިގެ ބައިނަލްއަޤްވާމީ ކޮންފަރެންސްއެއް ބޭއްވުމަށް ވެސް ވަނީ ތާވަލުކޮށްފަ އެވެ.

އަދި އަތުލިޔުމުގެ މުބާރާތާއި ދިވެހި ބަހުގެ ދުވަސް ފާހަގަކުރުމަށް ގިނަ ހަރަކާތްތަކެއް ކުރިއަށް ގެންދަން ވެސް ވަނީ ރާވާފަ އެވެ. ދުނިޔޭގެ ޅެންވެރިކަމުގެ ދުވަސް ފާހަގަ ކުރުމަށް ވެސް ނިންމާފަ އެވެ.

ވާހަކަ ދެއްކުމުގެ ޤައުމީ މުބާރާތް މި އަހަރުވެސް އޮންނާނެ އެވެ. ނަމަވެސް މި އަހަރުގެ މުބާރާތަށް ވަނީ ވަަރަށް ހެޔޮ ބަދަލުތަކެއް ގެނެސްފަ އެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެ މުބާރާތަށް ކަނޑައެޅިފައިވާ އިނާމުތައް މަތިކުރެއްވުމަށް ނިންމަވާފަ އެވެ.

އަދި އެއީ ޝަރަފުވެރި މުބާރާތަކަށް ހައްދަވާނެ ކަމަށް ވަނީ ވިދާޅުވެފަ އެވެ. ވަޒީރު ވިދާޅުވި ގޮތުގައި މި އަހަރުގެ މުބާރާތް މެއި މަހުގެ ތިންވަނަ ދުވަހު ފެށޭނެ އެވެ.

މީގެ އިތުރުން ޤައުމީ ބަތަލުންގެ މައްޗަށް ބިނާކޮށް ތަމްސީލު ލިޔުމަށް ވެސް މި އަހަރުގެ މެއި މަހު ހުޅުވާން އޮތީ ނިންމާފަ އެވެ. އަދި އިލްމީ ޘަޤާފީ އުފެއްދުންތަކުގެ މައުރަޒު މެއި 26 ގައި ބޭއްވުމަށް ވަނީ ތާވަލު ކޮށްފަ އެެވެ.

ޤައުމީ ތިންވަނަ ތާރީޚު މުބާރާތް ވެސް މި އަހަރު އޮންނާނެ އެވެ.

ކޮންމެ އަހަރެއްގެ އަލްހާ އީދު ދުވަސް ކުލަގަދަކޮށް ފާހަގަ ކުރަން ސަރުކާރުން ވަނީ ނިންމާފަ އެވެ. އެގޮތުން ދިވެހި ބަހާއި ޘަޤާފާއި ތަރިކައާ ބެހޭ ވުޒާރާގެ ބެލުމުގެ ދަށުން މިދިޔަ އަހަރުވެސް ވަނީ އެކި ސަރަހައްދުގެ ތިން ރަށެއްގައި ބޮޑު އީދު ވަރަށް ކުލަގަދަކޮށް ފާހަގަކޮށްފަ އެވެ.

ވަޒީރު ވިދާޅުވި ގޮތުގައި މި އަހަރުވެސް ތިން ރަށެއްގައި އީދުގެ ހަރަކާތްތައް ކުލަގަދަކޮށް ކުރިއަށް ގެންދާނެ އެވެ. އެކަމަށް އެދި ހުށައެޅުމުގެ ފުރުސަތު މި އަހަރުވެސް ހުޅުވާލާނެ އެވެ.

މީގެ އިތުުރުން އަދަބީ ހަރަކާތް "ތުއްރަވާސް" އާއި ފޮތް އެކުލަވާލުމުގެ މަސައްކަތު ބައްދަލްވުންތަކެއް ވެސް ވަނީ ތާވަލުކޮށްފަ އެވެ.

އަދި ނ. ލަންދޫ މާބަދިގެ އާއި ތ. ދިޔަމިގިލި ގަނޑުވަރު ސަރަޙައްދު ތަރައްޤީކުރުމުގެ މަސައްކަތާއި ގުޅޭ ކަންކަން ކުރިއަށް ގެންދިއުމަށް ހަމަޖެހިފައިވާއިރު ޖުލައި މަސްތެރޭ އިސްވަރުގެ ދިރާސީ މަަސައްކަތްތަކެއް ކުރިއަށް ގެންދާނެ އެވެ.

އެހެން އަހަރުތަކެކޭ އެއްގޮތަށް މި އަހަރުވެސް މިނިވަން ދުވަސް ފާހަގަކުރުމުގެ ހަރަކާތްތައް ކުރިއަށް ގެންދަން ވަނީ ނިންމާފަ އެވެ. ވަޒީރު ވިދާޅުވި ގޮތުގައި އެ ހަރަކާތްތަކުގެ ތަފްސީލުތައް ކުރިއަށް އޮތް ދުވަސްތަކުގައި ހާމަ ކުރާނެ އެވެ.

މީގެ އިތުރުން ޤައުމީ ބަތަލުންގެ މައްޗަށް ތައްޔާރުކުރެވޭ ތަމްސީލުތަކެއް އޮގަސްޓް 13 ގައި ދެއްކުމަށް ވަނީ ހަމަޖެހިފަ އެވެ. އަދި ޤައުމީ ދުވަސް މި އަހަރުވެސް ކުލަގަދަކޮށް ފާހަގަ ކުރާނީ ހއ. އުތީމުގަ އެވެ.

މި އަހަރުގެ ތެރޭގައިވެސް ހަތަރު/ފަސް ދާއިރާއަކުން ދިރާސީ ކަރުދާސްތަކެއް ހުށައެޅުމަށް ޚާއްސަ ބައްދަލްވުންތަކެއް ވެސް ވަނީ ރާވާފަ އެވެ.

ރާއްޖެ އިސްލާމްވިތާ މި އަހަރަށް 900 އަހަރު ފުރޭނެ އެވެ. ވަޒީރު ވިދާޅުވި ގޮތުގައި މި ފަޚުުރުވެރި އަދި ތާރިޚީ މުނާސަބާ ވަރަށް ކުލަގަދަކޮށް ފާހަގަ ކުރުމަށް ސަރުކާރުން ވަނީ ނިންމާފަ އެެވެ.

މީގެ އިތުރުން ކުޑަކުދީންނަށް ބަހާއި ޘަޤާފަތް ދަސްކޮށްދިނުމަށް ޚާއްސަ މަސައްކަތްތަކެއް ކުރިއަށް ގެންދަން ވަނީ ނިންމާފަ އެވެ.

ތަރިކައިގެ ދާއިރާގެ ރަށުވަރުތަ އުފެއްދުމުގެ މަސައްކަތް ވެސް މި އަހަރު ފެށޭނެ އެވެ. މިއީ އެ ރަށްރަށުގައި ހުރި ތާރީހީ ތަރިކަތައް ރައްކާތެރިކުރުމަށް މަސައްކަތް ކުރެވޭ މިންވަރު ބެލުމަށް ޒުވާނުން ތަމްރީނު ކުރުމުގެ ޚާއްސަ މަސައްކަތްތަކެކެވެ.

ވަޒީރު ވިދާޅުވި ގޮތުގައި އެ މަސައްކަތުގެ ދަށުން ކޮންމެ ރަށަކުން ދިހަ ވަރަކަށް ޒުވާާނުން ތަމްރީނު ކުރުމުގެ މަސައްކަތް މި އަހަރު ފެށޭނެ އެވެ. މީގެ އިތުރުން ނޮވެންބަރު މަހުގެ ތެރޭގައި ޘަޤާފީ ހޭލުންތެރިކަން އިތުރުކުރުމުގެ ޚާއްސަ މަސައްކަތްތަކެއް ކުރިއަށް ގެންދަން ވަނީ ނިންމާފައިވާއިރު ތަރިކައިގެ ދާއިރާއިން ހޭލުންތެރިކުރުވުމުގެ ޕްރަގްރާމެއް ވެސް ހިންގާނެ އެވެ.

އަދި ޖުމްހޫރީ ދުވަހާއި ހުރަވީ ދުވަސް ވަރަށް ކުލަގަދަކޮށް މި އަހަރުވެސް ފާހަގަ ކުރާނެ އެވެ. ޑިސެންބަރު މަހުގެ 26 ގައި ދިވެހީންގެ އއްބައިވަންތަކަމުގެ ދުވަސް ވެސް ކުލަގަދަކޮށް ފާހަގަ ކުރާނެ އެވެ.

މި އަހަރުގެ ތެރޭގައި ތަރިކައިގެ އެކި މަޝްރޫޢުތައް ވެސް ކުރިއަށް ގެންދަން ވަނީ ނިންމާފަ އެވެ. އެގޮތުން އުތީމުގައި ޣާޒީ ރަދުންގެ ޒިކުރާ އައުކުރުމުގެ ގޮތުން ކުރަން ނިންމާފައިވާ މަސައްކަތްތައް ފާހަގަ ކުރެވެ އެވެ.

ޚާއްސަކޮށް ބޮޑުތަކުރުފާނުގެ ދޮރާށި ބިނާކުރުމާއި ވާހަކަ ވަލެއް ތަރައްޤީ ކުރުމާއި އުތީމު ކަދުވަލު މިސްކިތް ކައިރީ ގެލެރީއެއް ހެދުން ހިމެނެ އެވެ.

މީގެ އިތުރުން ހއ. ތަކަންދޫ އާއި ހއ. ބާރަށާއި ށ. މަރޮށީގައި ހިންގުމަށް ހަމަޖެހިފައިވާ މަސައްކަތް ލަސްތަކެއް ނުވެ ފެށޭނެ ކަމުގައި ވަޒީރު ވިދާޅުވި އެވެ.

އަދި މާލޭގައި ކަޅުވަރު މިސްކިތާއި ގުޅޭ ބޮޑު މަޝްރޫޢުވެސް މިހާރު ފެށި ހަލުވި ދުވެލީގައި ކުރިއަށްދާކަން ފާހަގަ ކުރެއްވި އެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހި ބަހާއި ޘަޤާފާއި ތަރިކައާ ބެހޭ ވުޒާރާއެއް އުފެއްދެވީ ދިވެހި ތަރިކައިގެ ދާއިރާއަށް އިންޤިލާބީ ބަދަލެއް ގެންނެވުމަށެވެ. އެގޮތުން ތަރިކައިގެ ޢިލްމު އަށަގެންނެވުމާއި ތަރިކައަކީ ހަމައެކަނި ޚަރަދުގެ ދާއިރާއެއްގެ ގޮތުގައި އޮތް އޮތުމަށް ނިމުން ގެނައުމާއި އެއީ އާމްދަނީ ލިބޭ ކަމެއް ކަމުގައި ހެއްދެވުމަކީ ސަރުކާރުގެ އަމާޒެކެވެ.