މިދިޔަ އަހަރު 363 ބޭސް ރަޖިސްޓްރީކޮށް ދީފި އެވެ.

މޯލްޑިވްސް ފުޑް އެންޑް ޑްރަގް އޮޓޯރިޓީ އިން ހާމަކުރި ތަފާސްހިސާބްތަކަށް ބަލާއިރު މިދިޔަ އަހަރު 363 ބޭހެއް ވަނީ ރަޖިސްޓްރީކޮށްދިފައިވެއެވެ. އަދި މި މުއްދަތުގައި ގިނަ އަދަދެއްގެ ބޭސް ރަޖިސްޓްރީކުރުމަށް އެ އޮޓޯރިޓީއަށް ހުށަހަޅާފައިވެ އެވެ.

މިދިޔަ އަހަރު ރަޖިސްޓްރީކުރަން ހުށަހެޅި 594 ބޭހުގެ ތެރެއިން އެމްއެފްޑީއޭ ވަނީ 231 ހެއް ރަޖިސްޓްރީކޮށްނުދީ ރިޖެކްޓްކޮށްފަ އެވެ.

ބޭސް ރަޖިސްޓްރީކުރުމުގެ އިތުރުން ބޭސް ވިއްކުމުގެ ހުއްދަ ދޫކުރުމުގެ މަސައްކަތް ވެސް އެމްއެފްޑީއޭ އިން ދަނީ ކުރަމުންނެވެ. އެގޮތުން މިދިޔަ މުއްދަތުގައި އަލަށް 69 ފާމަސީއެއް ވަނީ ރަޖިސްޓްރީކޮށްފަ އެވެ. އެއީ މާލެ ސަރަހައްދުން 33 ފާމަސީއާއި އަތޮޅުތެރެއިން 36 ފާމަސީ އެކެވެ.

މިދިޔަ އަހަރު މާލެއިން 15 ފާމަސީ އަދި އަތޮޅުތަކުން ފަސް ފާމަސީއެއްގެ ހުއްދަ ބާތިލުކޮށްފައިވެ އެވެ. އަދި ބޭސް އިމްޕޯޓްކޮށް ގުދަންކުރާ 15 ފަރާތަކަށް އަލަށް ހުއްދަ ދީފާއިވާއިރު މި ދާއިރާގައި ހަރަކާތްތެރިވި 30 ފަރާތެއްގެ ހުއްދަ ވަނީ އެކި ސަބަބުތަކާހުރެ ހިފަހައްޓާފަ އެވެ.

ފާމަސީތައް ބަލައި ފާސްކުރުމަށް އެމްއެފްޑީއޭ އިން ކުރިއަށް ގެންދިޔަ މަސައްކަތުގައި މިދިޔަ އަހަރު 490 އިންސްޕެކްޝަނެއް ވަނީ ހިންގާފަ އެވެ. ބޭސް ދޫކުރުމުގެ ޚިދުމަތަށް އަލަށް 106 ފާމަސިސްޓުން ރަޖިސްޓްރީ ކޮށްފައިވެ އެވެ.

ވޭތުވެދިޔަ އަހަރު 61 އައު ރަޖިސްޓްރީއަކާއި 163 ހުއްދަ އައުކުރުމުގެ މަސައްކަތް އެމްއެފްޑީއޭ އިން ވަނީ ކޮށްފަ އެވެ. އަދި ބަލައި ފާސްކުރުތަކުގެ ތެރޭގައި 199 ރޫޓިން އިންސްޕެކްޝަނާއި 52 ފޮލޯއަޕް އިންސްޕެކްޝަން ކުރިއަށް ގެންގޮސްފައިވެ އެވެ.

ނޭޝަނަލް ހެލްތް ލެބޯޓަރީން ވޭތުވެދިޔަ އަހަރު 7314 ތަހުލީލެއް ފުރިހަމަކޮށްފައިވެ އެވެ. މިގެ ތެރޭގައި ހިމެނޭނީ މައިކްރޮބަޔޮލޮޖީ 4،636 ތަހުލީލާއި ކެމިސްޓްރީގެ 2678 ތަހުލީލެވެ.