ދިވެހި ޤައުމިއްޔަތު ދިރުވާ އާލާކުރުމުގެ ދުވަސް ފާހަގަކުރުމުގެ ގޮތުން މާދަމާ އާއިލީ ފިނިބުރެއް ބޭއްވުމަށް ނިންމައިފި އެވެ.

މިއީ ދިވެހި ބަހާއި ޘަޤާފާއި ތަރިކައާ ބެހޭ ވުޒާރާ އިން ދައުލަތުގެ އެހެން އިދާރާތަކާއި އޮފީސްތަކާއި ކުންފުނިތަކާއި ގުޅިގެން އިންތިޒާމުކުރާ ހަރަކާތެކެވެ. ދިވެހި ޤައުމިއްޔަތު ދިރުވާ އާލާކުރުމުގެ ދުވަހަކީ ކޮންމެ އަހަރެއްގެ ވެސް މާޗް މަހުގެ ހަ ވަނަ ދުވަހެވެ.

ރައީސުލްޖުމްހޫރިއްޔާގެ އޮފީހުގައި މިއަދު އޮތް ނޫސްވެރީންގެ ބައްދަލްވުމުގައި ދިވެހި ބަހާއި ޘަޤާފާއި ތަރިކައާ ބެހޭ ވުޒާރާގެ ވަޒީރު އާދަމް ނަސީރު އިބްރާހިމް ވިދާޅުވީ ދިވެހި ޤައުމިއްޔަތު ދިރުވާ އާލާކުރުމުގެ ދުވަސް ފާހަގަކުރުމުގެ ގޮތުން މާދަމާ އާއިލީ ފިނިބުރެއް ބޭއްވުމަށް ނިންމާފައިވާ ކަމަށެވެ. ފިނިބުރު އޮންނާނީ މާލޭ ބޮޑުތަކުރުފާނު މަގުގަ އެވެ.

ވަޒީރު ވިދާޅުވި ގޮތުގައި މި ފިނިބުރުގައި ދައުލަތުގެ އެކި އިދާރާތަކާއި އޮފީސްްތަކާއި ކުންފުނިތަކުން މި ފިނިބުރުގައި ބައިވެރިވާނެ އެވެ. މިއީ ދިވެހީންގެ ގުޅުންތެރިކަން އިތުރުކުރުމުގެ މަޤްސަދުގައި ބާއްވާ އާއިލީ ފިނިބުރަކަށް ވާތީ ވީހާވެސް ގިނަ ބަޔަކު މި ފިނިބުރުގައި ބައިވެރިވުމަށް ވަނީ އެދިފަ އެވެ.

ރަމަޟާން މަހުގެ ކޮންމެ ދުވަހަކު ހަވީރު ފިނިބުރު ޖެހުމަކީ ގިނަ ބަޔަކު ކުރާ ކަމަށްވާތީ މާދަމާ އޮންނަ ފިނިބުރުގައި އާއިލާތަކާ އެކު ބައިވެރިވުމަށް ވަޒީރު ނަސީރު ވަނީ އެދިވަޑައިގެންފަ އެވެ.