ރާއްޖެއަށް މަސްތުވާތަކެތި އެތެރެކުރި ކަމުގެ ތުހުމަތުގެ އިންޑިއާގެ ދެ ޒުވާނަކު ހައްޔަރުކޮށްފައިވާކަމަށް ދިވެހި ފުލުހުންގެ ޚިދުމަތުން ބުނެފި އެވެ. 

މި މައްސަލައިގައި ހައްޔަރުކުރީ ކަތިރިވިލް މަނިމަރަން (21އ) އާއި ދަނޫޝްކާނދަން ގޯޕާލް (19އ) އެވެ. 

ފުލުހުން ބުނެފައިވާގޮތުން، މި ދެމީހުން ރާއްޖެ އައިއިރު ޝައްކުވެގެން ބެލިއިރު، ލަގެޖުގެ ތެރެއިން މަސްތުވާތަކެތި ވަނީ ފެނިފައެވެ. 

ކަސްޓަމްސްއިން ބެލިއިރު، އެމީހުންގެ އަތުން ފެނުނު އެއްޗިހި ތަހުލީލު ކުރުމުން، ހަޝިޝް އޮއިލްއަށް ޕޮޒިޓިވްވެފައިވެއެވެ. އަދި، އެތަކެތީގެ ބަރުދަނުގައި 6.7 ކިލޯ ހުއްޓެވެ. 

ދެމީހުންގެ ބައްދާ މެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުން ދެމީހުންގެ ބަންދަށް ވެސް 6 ދުވަސް ވަނީ ޖަހައިފައެވެ. އަދި، އެމީހުން ވަނީ ޤާނޫނީ ވަކީލެއް ހޯދަންބޭނުންވާކަމަށް ކޯޓުގައި ބުނެފައެވެ.

މަސްތުވާތަކެތީގެ މައްސަލައެއްގެ ތުހުމަތުގައި އިންޑިއާގެ ދެ ޒުވާނަކު ހައްޔަރުކުރިއިރު، މަސްތުވާތަކެތި އަތުލައިގަތުމުގައި އަހަރުގެ މިހާތަނަށް ވެސް ސަރުކާރުން ވަނީ ބޮޑު ކުރިއެރުމެއް ހޯދައިފައެވެ. އެގޮތުން، ރައީސުލްޖުމްހޫރިއްޔާގެ އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި، ދާހިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވީ އަހަރުގެ މިހާތަނަށް މަސްތުވާތަކެތީގެ 72.2 މިލިއަން ރުފިޔާގެ މަގުމަތީ އަގުހުރި މަސްތުވާތަކެތި އަތުލައިގެންފައިވާ ކަމަށެވެ.