ދާޚިލީ ވަޒީރު އަލީ އިހުސާންގެ އަނބިކަނބަލުންނާއި އަންހެން ދަރިފުޅުގެ ވީޑިއޯއެއް ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާއި، އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު ނެގި ކަމަށް ތުހުމަތުވާ މައްސަލައިގައި އެ ދެމީހުންނާ ދެކޮޅަށް ހެކި އެބަހުރިކަމަށާއި އެހެން ނަމެވެސް ދައުވާކުރުމުގެ ވިސްނުމެއް ނެތް ކަމަށް އެމަނިކުފާނު ވިދާޅުވެއްޖެ އެވެ. 

މިއަދު ކުރިއަށް ދިޔަ ނޫސްވެރިންގެ ބައްދަލުވުމުގައި މި މައްސަލައަށް އަލިއަޅުވާލައްވައި ވާހަކަފުޅު ދައްކަވަމުން ވަޒީރު ވިދާޅުވީ 

މައްސަލަ ފެންމަތިކުރީ 10 އަހަރުގެ ދަރިފުޅުގެ ވީޑިއޯއެއް ނެގުމުން ކަމަށެވެ. ވަޒީރު ވިދާޅުވީ އެ ފޮޓޯ ނަގައިގެން ދައުރު ކުރީ ދާހިލީ ވަޒީރަކަށް ހުންނަވާތީ ވަޒީރެއްގެ ހައިސިއްޔަތުން ދޭ ސެކިއުރިޓީއާއި އަދި އެ ސެކިއުރިޓީ އާއިލާއަށް ފޯރުކޮށްދެމުންދާތީ، އެކަމާ ކަންބޮޑުވެގެން ކަމަށެވެ.

ދިވެހި ދައުލަތުގެ ރަސްމީ ފަރާތަކަށް، ދިވެހި ފުލުހުންގެ ފަރާތުން ސެކިއުރިޓީ އެސެސްމަންޓު ހަދައި، އެ ހިދުމަތުން ފޯރުކޮށްދެމުންދާ ސެކިއުރިޓީ ހިދުމަތަކާ ގުޅިގެން ސުވާލު އުފެދޭނަމަ އެ ހިދުމަތާ ސުވާލުކުރުމަކީ އެންމެ ރަނގަޅު ގޮތް ކަމަށް ވަޒީރު ވިދާޅުވި އެވެ. 

އަކުރަމާއި އިބްރާހިމް ވަހީދު މަގުމަތީގައި ތިއްބަވައިގެން، ފޯނުން ވީޑިއޯ ކުރާ މަންޒަރު ފެންނަ ސީސީޓީވީ ފޫޓޭޖަކާ އެކު މިދިޔަ މަހުގެ 27 ވަނަ ދުވަހު ވަޒީރު ވަނީ މި މައްސަލަ ފެންމަތިކުރައްވާފަ އެވެ. 

މި ވީޑިއޯ ކޮށްފައިވަނީ އިބްރާހިމް ވަހީދެވެ. އަދި މި ވީޑިއޯ ނަގަން އިބްރާހީމް ވަހީދުގެ އަތަށް ފޯނު ދޭ ތަން ފެންނަނީ އަކުރަމެވެ. 

މި ދެމީހުންގެ އިތުރުން އިތުރު މީހަކު އެ ދެމީހުން ކައިރީ ސައިކަލެއްގައި މަޑުކޮށްލައިގެން އިންނަ މަންޒަރު ވީޑިއޯއިން ފެނެ އެވެ.

ވަޒީރު ވިދާޅުވީ މި ފުޓޭޖުން ފެންނަނީ ޑިމޮކްރެސީއާއި އަންހެނުންނާއި ކުޑަކުދިންގެ ހައްގުތަކުގެ ހިމާޔަތުގައި ވަކާލާތުކުރާ މީހުން ވެއްޓިފައިވާ ދަށު ދަރަޖަ ކަމަށެވެ. އަދި ޒަމާނުންސުރެ އެމްޑީޕީއަކީ މުޖުތަމައު ބައިބައިކުރުމާ، ދަށު ދަރަޖައިގެ ސިޔާސީ ޢަމަލުތައް ހިންގާ ޕާޓީއެއްކަމަށް އެމަނިކުފާނު ވަނީ ވިދާޅުވެފަ އެވެ. 

މީގެ ކުރިން އެމްޑީޕީގެ ސިޔާސީ އަމާޒުފަތްގަނޑަކަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އާއިލާ ވެސް ވަނީ ހަދާފަ އެވެ. 

ޒާތީ ތަައައްސުބު އިސްކޮށް، ހަސަދަވެރިކަމާއި ނަފުރަތު ފަތުރައިގެން ސަރުކާރުގެ އިސްބޭފުޅުންގެ އާއިތަކަށް  ފުރައްސާރަކޮށްގެން ސިޔާސީ ގޮތުން ބަލިކުރުމަށް މަސައްކަތްކުރަމުން އަންނާތީ ގިނަ ބަޔަކު އަންނަނީ އެމްޑީޕީއަށް ފާޑުކިޔަމުން ނެވެ.