ސިޔާސަތުތައް އެކުލަވައިލާ އެ ސިޔާސަތުތައް ތަންފީޒުކުރުމަށް ބޭނުންވާ ބަޖެޓު ހަމަޖައްސައި، އަންޒަމާނުއްސުރެ ރާއްޖޭގެ ސިއްހީ ދާއިރާގައި ހުރި މައްސަލަތައް ހައްލުކުރުމުގެ މަސައްކަތް މި ސަރުކާރުން ވަރަށް ހަލުއިކަމާއެކު ކުރަމުންދާކަމަށް ސިއްހީ ވަޒީރު އަބްދުﷲ ނާޒިމް އިބްރާހީމު ވިދާޅުވެއްޖެއެވެ. 

ސިއްހީ ވުޒާރާއިން ކުރަމުންދާ މަސައްކަތްތަކާ ގުޅޭ އެންމެ ފަހުގެ މައުލޫމާތު ހިއްސާކުރެއްވުމަށް ރައީސުލްޖުމްހޫރިއްޔާގެ އޮފީހުގައި މިއަދު ބޭއްވެވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ ރާއްޖޭގެ ރަށްރަށުގެ ސިއްހީ މަރުކަޒުތައް ބާވުމާއި، ޖާގައިގެ ދަތިކަން ބޮޑުވުމާއި، އެތަންތަނުގައި ހުރި އިކުއިޕްމެންޓާއި ވަސީލަތްތައް އާކުރަންޖެހުމާއި، އެމްބިއުލާންސް ރަށްރަށުގައި ނެތުމުގެ މައްސަލަައަކީ ސިއްހީ ދާއިރާއަށް ކުރިމަތިވެފައި ހުރި ޒަމާންވީ މައްސަލަތަކެއް ކަމަށެވެ. 

އިތުރަށް ނާޒިމު ވިދާޅުވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރުން އެ މައްސަލަަތައް ހައްލުކުރުމަށް ހަރުދަނާ ސިޔާސަަތުތަކެއް އެކަށައަޅައި، އެ ސިޔާސަތުތައް ތަންފީޒުކުރުމަށް މަސައްކަަތް ކުރަން ފަށާފައިވާ ކަމަށެވެ. އެގޮތުން ސިއްހީ ދާއިރާގެ އުމްރާނީ ވަސީލަތްތައް ތަރައްގީކޮށް، ސިއްހީ މަރުކަޒުތަކާއި ހޮސްޕިޓާތައް ތަރައްގީކުރުމަށް 170 އަށްވުރެ ގިނަ އުމްރާނީ ތަރައްގީގެ މަޝްރޫއުތައް ހިންގަމުންދާ ކަމަށް ވަޒީރު ވިދާޅުވިއެވެ. 

"އަޅުގަނޑުމެންގެ މި އެޑްމިނިސްޓްރޭޝަން ފެށުނުއިރު ވަރަށް ގިނަ ހެލްތު ސެންޓަރުތައް ހުރީ ވަރަށް ބޮޑަށް މަރާމާތަށް ބޭނުންވެފައި، އެނދުތައް ބާވެ ހަލާކުވެފައި، އެތަންތަނުގައި ބޭނުންކުރާ އިކުއިޕްމެންޓުތައް ވޭތުވެދިޔަ ދުވަސްތަކެއްގައި އެންމެ ރަނގަޅަށް އަޅާނުލެވުމުގެ ސަބަބުން ހަލާކުވެ ވީރާނާވެފައި،" ނާޒިމު ވިދާޅުވިއެވެ. 

އަދި އެމްބިއުލާންސްތައް ނެތުމުގެ މައްސަލައަކީވެސް ބޮޑު މައްސަލައެއްކަން ފާހަގަކުރައްވަމުން ނާޒިމު ވިދާޅުވީ، ދެމެހެއްޓެނެވި ގޮތެެއްގައި އެމްބިއުލާންސް ހިދުމަތް ފޯރުކޮށްދިނުމުގެ ބޮޑު މަޝްރޫއެއް ފަށައި ފާއިތުވި މަހުގައި އެކަނި 56 ރަށަކަށް އެމްބިއުލާންސް ފޮނުވާފައިވާ ކަމަށެވެ. 

ނާޒިމު ވިދާޅުވި ގޮތުގައި އަންނަ ހަފުތާ 14 އެމްބިއުލާންސް އިތުރު ރަށްތަކަށް ފޮނުއްވާނެއެވެ. އަދި މާޗު މަހުގެ ނިޔަލަށް 17 ރަށަކަށް އައު އެމްބިއުލާންސް ފޮނުއްވާނެކަމަށާއި، އޭޕްރީލު މަހުގެ ނިޔަލަށް ބޮޑެތި ސިޓީތަކުގައި ބޭނުންކުރަން ހާއްސަ އެމްބިއުލާންސްތަކެއް ލިބިގެންދާނެ ކަމަށްވެސް ވަޒީރު ވިދާޅުވިއެވެ. 

އެމްބިއުލާންސްތައް ގެނައުމާއެކު، އެތަކެތި ބަލަހައްޓައި މަރާމާތުކުރެވޭނެ އިންތިޒާމު ހަމަޖެއްސުމުގެ ގޮތުން އެ މަސައްކަތްވެސް ކުންފުންޏަކާ ހަވާލުކުރެވިގެން ކުރިއަށް އޮތް ދުވަސްތަކުގައި ކުރެވިގެންދާނެ ކަމުގައި ވަޒީރު ވިދާޅުވިއެވެ. 

އަދި ސިއްހީ މަރުކަޒުތަކަށް ބޭނުންވާ އާލާތްތަކުގެ ތެރެއިން އެތަންތަނުގައި ހުރި އާލަތްތައް އާކުރުމަށްޓަކައި 190 މިލިއަން ރުފިޔާގެ މަޝްރޫއެއް އެސްޓީއޯއާ ހަވާލުކުރެވިގެން މިހާރު ކުރިއަށްދަނީ އެތަކެތި ޕްރޮކިއާކުރުމުގެ މަރުހަލާކަން ވަޒީރު ފާހަގަކުރެއްވިއެވެ. 

"މި އަންޒަމާނުއްސުރެ އަޅުގަނޑުމެންނަށް ދިމާވެފައިވާ ގޮންޖެހުންތަކަކުން އަރައިގަތުމަށްޓަކައި ބަޖެޓު ހަމަޖައްސައިގެން ސިޔާސަތުތައް އެކުލަވާލައިގެން ކުރަމުންދާ މަސައްކަތްތައް. ހެލްތު ސެކްޓާގައި ވަރަށް މުހިއްމުކަމަކީ ދެމެހެއްޓެނެވި ގޮތެއްގަައި އިންވެސްޓުކުރަމުންދިއުން. އެއްވެސް އިރެއްގައި މިއަށް އިހުމާލުވެއްޖެނަމަ ނުވަތަ ބަޖެޓުގެ ތެރެއިން އުނިކަމެއް އަތުވެއްޖެނަމަ އޭގެ ސަބަބުން ފޫނުބެއްދޭ ފަދަ ގެއްލުންތަކަކާ އެބަކުރިމަތިވޭ،" ވަޒީރު ވިދާޅުވިއެވެ.