ކުށުގެ ވެށީގައި ހަރަކާތްތެރިވާ ކުޑަކުދިން އަނބުރާ މުޖުތަމައަށް ގެނައުމަށް ގާއިމުކުރާ ހޯޕް އައިލެންޑާއި ރާއްޖޭގެ ޖަލުތަކުގެ ނިޒާމު ޒަމާނީ ފެންވަރަށް ހަރުދަނާކުރުކުގެ ގޮތުން ގާއިމުކުރާ ސެންޓްރަލް ޖަލުގެ މަސައްކަތް 2028 ވަނަ އަހަރުގެ ފުރަތަމަ ކުއާޓާގެ ނިޔަލަށް އެކީ ނިންމައިލެވޭނެކަމަށް ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ. 

އެ ވުޒާރާއިން ކުރަމުންދާ މަސައްކަތްތަކާ ގުޅޭ ގޮތުން ނޫސްވެރިންނަށް މައުލޫމާތު ދެއްވަމުން މިއަދު ރައީސް އޮފީހުަގއި ކުރިއަށްގެންދެވި ނޫސްވެރިންގެ ބައްދަލުވުމުގައި ދެއްކެވި ވާހަކަފުޅުގައި ވަޒީރު ވިދާޅުވީ މިހާރު ކުށުގެ ވެށީގައި ތިބި ކުދިންނާއި ކުށަށް ހުށަހެޅުމުގެ ހިރާސް ބޮޑެތި ކުދިން އެކަމުން ސަލާމަތްކުރުމަށް މި ސަރުކާރުން އެކަށައަޅާފައިވާ ހާއްސަ ސިޔާސަތުތަކުގެ ތެރެއިން އެންމެ މުހިއްމު ސިޔާސަަތީ ހޯޕް އަައިލެންޑް ކަމަށެވެ. 

ހޯޕް އައިލެންޑް ކޮންސެޕްޓަކީ ނުވަތަ މަފުހޫމަކީ މިހާރު ގާނޫނުން ދޭ އިހުތިޔާރުތައް ބޭނުންކޮށްގެން، ކުށުގެ ވެށީގައި ތިބި ކުދިންނާއި ކުށްތަކުގެ ތެރެއަށް ހުށަހެޅުމުގެ ހިރާސް ބޮޑެތި ކުދިން މުޖުތަމައުން އެކަހެރިކޮށް، އެކުދިންނަށް ބޭނުންވާ ފުރުސަތުތައް ފޯރުކޮށްދީ މުޖުތަމައަށް ބޭނުންވާ ބައެއްގެ ގޮތުގައި އަނބުރާ ނެރެދިނުމަށް ބޭނުންވާ ސެންޓަރެއް ކަމަށް ވަޒީރު ވިދާޅުވިއެވެ. 

"މި ސަރުކާރުގެ އެންމެ ބޮޑު ސިޔާސަތަކީ މިފަދަ ސެންޓަރެއް ގާއިމުކޮށް، ގާތްގަނޑަކަށް 400 ވަރަކަށް ކުދިންނަށް އެއްފަހަރާ ހިދުމަތް ދޭ ސެންޓަރެއް ގާއިމުކޮށް، އެތަނުން ހިދުމަތް ދޭން ފެށުން،" ވަޒީރު ވިދާޅުވިއެވެ. 

ވަޒީރު ވިދާޅުވި ގޮތުގައި މިހާރު އެ މަސައްކަތް އޮތީ މަޝްރޫއު ކުރިއަށްގެންދާނެ ފަރާތެއް އިހުތިޔާރުކޮށް އެވޯޑް ލެޓާ ހަވާލުކުރެވި އެއްބަސްވުމުގައި ސޮއިކުރެވުމުގެ މަރުހަލާގައެވެ. އެ މަސައްކަތް ފެށިގެން ގޮސް 2028 ވަނަ އަހަރުގެ ފުރަތަމަ ކުއާޓާގައި ނިންމައިލެވޭނެ ކަމުގައި ވަޒީރު ވިދާޅުވިއެވެ. 

ސެންޓްރަލް ޖަލަކީ މިހާރު ޖަލުތަކަށް ދިމާވެފައިވާ ޖާގައިގެ ދަތިކަން ހައްލުކުރުމާއެކު، ޖަލުގައި ބަންދުކުރާ ގައިދީން އަނބުރާ މުޖުތަމައަށް ގެނައުމަށް ބޭނުންވާ އެންމެ ރަނގަޅު ފެންވަރުގެ ރިހިބިލިޓޭޝަން ޕްރޮގުރާމުތައް ހިންގޭނެހެން ފަރުމަކޮށް ބިނާކުރާ ޖަލެކެވެ. 

ވަޒީރު ވިދާޅުވި ގޮތުގައި ޖަލުގެ ހުރިހާ މަސައްކަތަކެއް ނިމޭނީ 2028 ވަނަ އަހަރުގެ ފުރަތަމަ ކުއާޓާގެ ނިޔަލަށެވެ. ނަމަވެސް ޖަލުގެ ބައެއް ބައިތަކުގެ މަސައްކަތް އޭގެ ކުރިން ނިންމައި 2027 ވަނަ އަހަރުގެ ތެރޭގައި އެ ތަންތަަނުގެ ބޭނުންކުރަން ފެށޭނެކަމަށްވެސް އިހުސާން ވިދާޅުވިއެވެ.