މި އަހަރުގެ ފުރަތަމަ ދޮޅުމަހެއްހައި ދުވަހުގެ ތެރޭގައި ދިވެހި ފުލުހުންގެ ހިދުމަތާއި މޯލްޑިވްސް ކަސްޓަމްސް ސާވިސްއިން ކުރި މަސަައްކަތުން 72.2 މިލިއަން ރުފިޔާގެ މަގުމަތީ އަގުހުރި މަސްތުވާތަކެތި އަތުލައިގަނެފިއެވެ. 

ދާހިލީ ސަލާމަތާއި ފަންނިއްޔާތާ ބެހޭ ވުޒާރާގެ ބެލުމުގެ ދަށުގައި ހުރި އިދާރާތަކުގެ މަސައްކަތްތަކާ ގުޅޭ ގޮތުން އަދާހަމަ މައުލޫމަތު ހިއްސާކުރެއްވުމަށް އެ ވުޒާރާގެ ވަޒީރު އަލީ އިހުސާނު މިއަދު ރައީސް އޮފީހުގައި ކުރިއަށްގެންދެވި ނޫސްވެރިންގެ ބައްދަލުވުމުގައި ވިދާޅުވެފައިވަނީ މި ސަރުކާރު ވެރިކަމަށް އައުމަށްފަހު އެންމެ ބޮޑު އިސްކަމެއް ދީގެން ކުރަމުން އަންނަ އެެއް މަސައްކަތަކީ ރާއްޖެއަށް ޑްރަގު އެތެރެކޮށް ވިއްކާ މިންވަރު މަދުކުރުމުގެ މަސައްކަތް ކަމަށެވެ. 

އެ މަސައްކަތުގެ ތެރެއިން މި އަހަރުގެ މިހާތަނަށް ކުރެވުނު މަސައްކަތުގެ ތަފުސީލު ދެއްވަމުން ވަޒީރު ވިދާޅުވީ މި އަހަރުގެ ފުރަތަމަ ދޮޅު މަހުގެ ތެރޭގައި 83450 ގުރޫމުގެ މަސްތުވާތަކެތި އަތުލައިގަނެފައިވާ ކަމަށެވެ. އަދި އެއީ މަގުމަތީ އަގުން ބަލާނަމަ 72.2 މިލިއަން ރުފިޔާގެ އަގުހުރި މަސްތުވާތަކެތި ކަމުގައިވެސް ވަޒީރު ވިދާޅުވިއެވެ. 

"މި މަސްތުވާތަކެތި އަތުލެވިފައިވަނީ ދިވެހި ފުލުހުންނާއި ދިވެހި ކަސްޓަމްސްގެ ވަރަށް ގިނަ މުވައްޒަފުންގެ މަސައްކަތުން. ހާއްސަކޮށް ކަސްޓަމްސައިން ބޯޑާ ސެކިއުރިޓީ ބެލެހެއްޓުމުގައި މިހާރު އެގެންގުޅުއްވާ ތަފާތު ހުނަރުތައް ބޭނުންކޮށްގެން. އަދި އިންޓެލިޖެންސްގެ މައްޗަށް ބިނާކޮށް ކުރިއަށްގެންދާ އޮޕަރޭޝަންތަކުން. ހަމައެއާއެކު ދިވެހި ފުލުހުން ރާއްޖޭގެ އެކި ކަންކޮޅުތަކުގައި ރެއާއި ދުވާލު ކުރެވޭ މަސައްކަތުގެ ނަތީޖާ،" އިހުސާން ވިދާޅުވިއެވެ. 

ވަޒީރު ވިދާޅުވި ގޮތުގައި އަތުލައިގަތް މަސްތުވާތަކެތީގެ ތެރެއިން 72 ކިލޯ މަސްތުވާތަކެއްޗަކީ ވައިގެ މަގުނާއި ކަނޑު މަގުންނާއި އެއްގަމު މަގުން އެތެރެކުރަނިކޮށް ކަސްޓަމުން އަތުލައިގަތް ތަކެއްޗެވެ. އެއީ 59 މިލިއަން ރުފިޔާގެ މަގުމަތީ އަގު ހުރި މަސްތުވާތަކެތި ކަމުގައި ވަޒީރު ވިދާޅުވިއެވެ. 

އިހުސާން އިތުރަށް ވިދާޅުވީ މިވެރިކަން ފެށުނުއިރު، މި ސަރުކާރުން ރާއްޖެއަށް ކުރިމަތިވެފައި އޮތް މަސްތުވާތަކެތީގެ މައްސަލައަށް ދާއިމީ ހައްލެއް ހޯދާނެ ކަމުގެ ޔަގީންކަން ދެއްވާފައިވާނެ ކަމަށެވެ. އަދި އަމާޒު ހާސިލުކުރުމަށްޓަކައި މި އަހަރުގެ ފުރަތަމަ ދޮޅު މަސްދުވަހުގެ ތެރޭގައި ގިނަގުނަ މަސައްކަތްތަކެއް ކުރެވި ބޮޑެތި ކާމިޔާބުތަކެއް ހާސިލުކުރެވިފައިވާކަމަށް ވަޒީރު ވިދާޅުވިއެވެ. 

ފާހަގަކުރެވޭ ގޮތުގައި މިވެރިކަމުގެ ފުރަތަމަ އަހަރު އަތުލައިގަތް މަސްތުވާތަކެތީގެ އަދަދު އޭގެ ކުރީ އަހަރު އަތުލައިގަތް މަސްތުވާތަކެތީގެ އަދަދަށްވުރެ އިތުރުވިއިރު ޖެހިގެން އައި 2025 ވަނަ އަހަރުވެސް އޭގެ ކުރީ އަހަރަށްވުރެ ގިނައިން މަސްތުވާތަކެތި އަތުލައިގަނެފައިވެއެވެ.