އަލްއަބްރާރު ހައްޖު އެންޑް އުމްރާ ގުރޫޕުގެ ހަވާލުގައި ރަމަޟާން މަހު އުމްރާއަށް ދިއުމަށް ފައިސާ ދައްކާފައިވާ ބައެއްގެ ދަތުރު ކެންސަލުކުރީ މަގުބޫލު ސަބަބެއް ނެތި ގަވާއިދާ ހިލާފަށް ކަމަށް ކަނޑައަޅައި އެ ގުރޫޕަށް ދީފައިވާ އުމްރާއަށް މީހުން ގެންދިއުމާ ބެހޭ ހުއްދަ ވަގުތީ ގޮތުން ހިފަހައްޓައިފިއެވެ. 

އިސްލާމީ ކަންތައްތަކާ ބެހޭ ވުޒާރާއިން މިއަދު ނެރުނު ބަޔާނެއްގައި ބުނެފައިވަނީ، މާޗު 3، 2026 ވަނަ ދުވަހުން ފެށިގެން މާޗު 26، 2026 ވަނަ ދުވަހުގެ ނިޔަލަށް ކުރުމަށް ހަމަޖައްސާފައިވާ އުމްރާ ދަތުރަށް ފުރުމުގެ އެންމެ ފަހުގެ ތައްޔާރީތައް ވަމުންދަނިކޮށް އަލްއަބްރާރު ގުރޫޕުން ދަތުރު ކެންސަލުކޮށްފައިވާ ކަމުގެ ޝަކުވާ މިނިސްޓްރީއަށް ލިބިފައިވާ ކަމަށެވެ. 

އަދި މިނިސްޓްރީން މި މައްސަލާގައި މިހާތަނަަށް ބެލި ބެލުމަށް ބަލާއިރު އެ ދަތުރު ކެންސަލުކުރީ މަގުބޫލު ސަބަބެއް ނެތި އަދި ދިވެހިރާއްޖެއިން އުމްރާއަށް މީހުން ގެންދިއުމާ ބެހޭ އުސޫލާ ހިލާފަށްކަން މިނިސްޓްރީއަށް ޔަގީންކުރެވިފައިވާ ކަމަށްވެސް  ބުނެފައިވެއެވެ. 

އެހެންކަމުން އެ ކުންފުންޏަށް ދޫކޮށްފައިވާ ރާއްޖެއިން މީހުން އުމްރާއަށް ގެންދިއުމާ ބެހޭ ހުއްދަ ވަގުތީ ގޮތުން ހިފަހައްޓައި، އެކަން ކުންފުންޏަށް މިހާރު އަންގާފައިވާކަމަށްވެސް މިނިސްޓްރީން ބުނެފައިވެއެވެ. އަދި މިކަމާ ގުޅޭ ގޮތުން އިތުރަށް ސާފުކުރަންޖެހޭ ކަންކަމާއި ބަލަންޖެހޭ ކަންކަން ބެލުމަށްފަހު އުސޫލުގެ ތެރެއިން އަޅަންޖެހޭ ފިޔަވަޅުތައްވެސް އަޅަމުންދާނެ ކަމުގައި މިނިސްޓްރީން ބުނެފައިވެއެވެ. 

އަލްއަބްރާރު ގުރޫޕުން އުމްރާއަށް ދިއުމަށް ހަމަޖެހިފައިވާ މީހުންގެ ތެރެއިން 28 މީހަކަށް އުމްރާވުމުގެ ކަންކަން ހައްޖު ކޯޕަރޭޝަނުން ހަމަޖައްސައިދީފައިވާއިރު ބާކީ ތިބި މީހުންނަށް އުމްރާވުމުގެ ކަންކަން ހަމަޖެއްސެމުގައި އެހީތެރިވުމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒުވަނީ ކަމާ ބެހޭ އިދާރާތަކަށް އަންގަވާފައެވެ. 

މިނިސްޓްރީން ބުނީ މިހާތަނަށް އުމަރާގެ އަޅުކަމަށް ނުފުރިފައި ތިބި މީހުންނަށް އެހީތެރިކަން ފޯރުކޮށްދެވޭނެ ގޮތްތަކަކީ ކޮބައިތޯ ބަލައި އެކަމުގައި އެ މީހުންނަށް އެހީތެރިކަން ފޯރުކޮށްދިނުމަށް މިނިސްޓްރީން މަސައްކަތްކުރަމުން އަންނަ ކަމަށެވެ.