އެކި ސަބަބުތަކާއި ގުޅިގެން ނުފުރިތިބި ޢުމްރާވެރީންނަށް ފުރޭނެ ގޮތެއް ހޯދުމުގެ މަސައްކަތް ކުރަމުންދާ ކަމަށް އިސްލާމީ ކަންތައްތަކާއި ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު މިރޭ ވިދާޅުވެއްޖެ އެވެ.

ވަޒީރު މިހެން ވިދާޅުވީ މީޑިއާތަކަށް މިރޭ ފޮނުއްވި މެސެޖެއްްގަ އެވެ. އެ މެސެޖުގައި ވަޒީރު ވިދާޅުވީ އެކި ކުންފުނިތަކުން އުމްރާއަށް ދިއުމަށް އުޅުނު ފަރާތްތަކަށް ނުފުރިފައިވުމާއި ބައެއް ޤައުމުތަށް މެދުވެރިކޮށް ޓްރާންސިޓްކޮށް ފުރަން އުޅުނު ފަރާތްތަކަށް، އެޤައުމުތަކުގެ ޕްލައިޓްތައް ކެންސަލްވުމުން ނުފުރިފައިވާތީ ޢުމްރާއަށް ފުރުވޭނެ ގޮތެއް ހޯދުމަށް ރައީސުލްޖުމުހޫރިއްޔާ އިރުޝާދު ދެއްވާފައިވުމާއެކު، ފުރޭނެ ގޮތެއް ހޯދުމުގެ މަސައްކަތް ކުރަމުންދާ ކަމަށެވެ.

އެ މަސައްކަތް ކުރަމުން ދަނީ އިސްލާމީ ކަންތައްތަކާއި ބެހޭ ވުޒާރާ އާއި މޯލްޑިވްސް ޙައްޖު ކޯޕަރޭޝަނާއި މޯލްޑިވިއަން ގުޅިގެން ކަމަށާާ އެ މަސައްކަތް މިހާރު ފަށާފައިވާ ކަމަށެވެ.

ވަޒީރު ވިދާޅުވި ގޮތުގައި މިވަގުތާހަމަ އަށް 150 މީހުން ފުރަން ބޭނުންވެފަ ތިބިކަން ވަނީ ފާހަގަކުރެވިފަ އެވެ. އަދި ފްލައިޓް ޗާޓަރު ކުރެވޭނެ ގޮތް ވެއްޖެ ނަމަ މީގެ އިތުރުން ވެސް ޖާގަ އެއް ހޯދަން ބޭނުންވާ ފަރާތްތަކަށް ޖާގަ ހުރި މިންވަރަކުން ދެވޭނެ ކަމަށް ވިދާޅުވި އެެވެ. މީގެ އިތުރުން ވަގުތު ކުޑަތަންވެފައިވުމުން މިކަމުގައި ހުރި ދަތިތައް ޙައްލުވޭތޯ މަސައްކަތްކުރަމުންދާ ކަމަށްވެސް ވިދާޅުވި އެވެ.

"މި ފުރުޞަތުގައި، ރައްޔިތުންނާ ގުޅުން ހުރި މިފަދަ ކަންކަން ހައްލުކޮށްދެެއްވުމަށް ޢިއްޒަތްތެރި ރައީސް ޑރ މުޢިއްޒު ބަހައްޓަވަމުން ގެންދަވާ އަހައްމިއްޔަތަށްޓަކައި ވަރަށް އިޚްލާޞްތެރިކަމާއެކު ރައީސަށް ޝުކުރު އަރިސްކުރަން. އަދި މޯލްޑިވިއަންއާއި، މޯލްޑިވްސް ޙައްޖު ކޯޕަރޭޝަނަށް ޝުކުރު ދަންނަވަން. މިފަދަ ކޮންމެ ކަމެއްގައި ވެސް ދިވެހިރައްޔިތުންނަށް ދެއްވާ އެހީތެރިކަން ފާހަގަކުރަން. ދަތުރުގެ ޚަރަދު ކުރާނީ އެހެންޏާ ވެސް ޢުމްރާ ދަތުރުގައި އޮންނަ އުޞޫލުން ޢުމްރާވެރިން," ވަޒީރު ވިދާޅުވި އެވެ.