މި ހުކުރުގައި މާލެ ސަރަޙައްދުގެ ހުރިހާ ބޮޑެތި މިސްކިތްތަކެއްގައި އިމާމުވެ ހުކުރު ކުރާނީ ޒުވާން ޚަތީބުން ކަމަށް އިސްލާމީ ކަންތައްތަކާއި ބެހޭ ވުޒާރާއިން ބުނެފި އެވެ.

އެ ވުޒާރާގެ ވަޒީރު ޑރ. މުޙައްމަދު ޝަހީމް އަލީ ސަޢީދު މިރޭ ވިދާޅުވި ގޮތުގައި މި ހުކުރުގަައި އިސްލާމީ މަރުކަޒާއި ސަލްމާން މިސްކިތުގައި އަދި މާލޭގެ ބޮޑެތި ހުރިހާ މިސްކިތްތަކުގައި އިމާމުވެ ހުކުރުކުރާނީ ފާހަގަކޮށްލެވޭ އިލްމީ އަދި ރީތިކޮށް ކީރިތި ޤުރުއާން ކިޔަވާ ޒުވާން ޚަތީބުންނެވެ.

"މި ފުރުސަތު އެ ޒުވާނުންްނަށް ދޭން ބޭނުންވަނީ އެ ކުދިންގެ ލީޑާޝިޕް ބަލައިގަންނަކަމާއި އިސްލާމީ ކަންކަން ހިންގުމާއި އިސްލާމީ ޚިދުމަތުގައި އެކުދީންނަށް އޮތް ފުރުސަތުގެ ތަނަވަސްކަން ޔަޤީންކޮށް ދިނުމާއި ރައީސް ޑރ. މުޙައްމަދު މުޢިއްޒު ޒުވާން ޖީލު ބިނާކުރެއްވުމަށް ފެއްޓެވި މަސައްކަތްޕުޅަށް ބާރު ދިނުމުގެ ގޮތުން," ވަޒީރު ވިދާޅުވި އެވެ.

ސަރުކާރުން ދަނީ ޒުވާން ޚަތީބުން ތަމްރީނު ކުރުމަށް ވަރަށް ޚާއްސަ އިސްކަމެއް ދީގެން މަަސައްކަތް ކުރަމުންނެވެ. އެކަމަށް ޚާއްސަ ޕްރަގްރާމެއް ވަނީ ފަށާފަ އެވެ.

މި ޕްރޮގުރާމުގެ މައިގަނޑު އަމާޒަކީ، ރާއްޖެއަށް ދީނީ ގޮތުން އިރުޝާދު ދިނުމަށް ބޭނުންވާ ޒުވާން ޚަތީބުން ތަމްރީނު ކުރުމެވެ. މިގޮތުން، ފަސް އަހަރުގެ ތެރޭގައި 1000 ޒުވާން ޚަތީބުން ތަމްރީނު ކުރުމަށް ސަރުކާރުން ވަނީ އަމާޒުހިފާފަ އެެވެ.