ފާއިތުވި ފެބުރުއަރީ މަހު 1،180.33 ޓަނުގެ މަސް ކިރުވައި، މަސްވެރިންނަށް ޖުމްލަ 20.3 މިލިއަން ރުފިޔާ ދޫކޮށްފައިވާކަން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) ގެ ތަފާސްހިސާބުތަކުން ދައްކައިފިއެވެ.

މިފްކޯ އިން މިއަދު އާއްމުކުރި ތަފާސްހިސާބުތަކަށް ބަލާއިރު، މިދިޔަ މަހު އެންމެ ގިނައިން ކިރުވީ ކަޅުބިލަމަހެވެ. އެގޮތުން، ފެބުރުއަރީ މަހު 1،052.62 ޓަނުގެ ކަޅުބިލަމަސް މަސްވެރިން ކިރުވާފައިވެއެވެ.

އެހެންކަމުން، ފެބުރުއަރީ މަހުގެ ނިޔަލަށް ކަޅުބިލަމަސް ކިރުވި 483 ދޯންޏަކަށް ފައިސާގެ ގޮތުގައި 17،461،557.00ރ. (ސަތާރަ މިލިއަން ހަތަރު ލައްކަ ފަސްދޮޅަސް އެއްހާސް ފައްސަތޭކަ ފަންސާސް ހަތް ރުފިޔާ) މަސްވެރިންނަށް ދޫކޮށްފައިވެއެވެ.

މިފްކޯ އިން މަސްވެރިން އަތުން ކަންނެލި މަސް ގަންނަން ފެށީ ޖަނަވަރީ މަހު އެވެ. އެއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަސްވެރިންނަށް ވެވަޑައިގެންފައިވާ މުހިއްމު ވަޢުދުފުޅެކެވެ. މިއާއެކު، މިފްކޯ އިން ވަނީ ޖަނަވަރީ މަހުގެ ތެރޭގައި 15 ކިލޯއިން މަތީގެ ކަންނެއްޔާއި، 10 ކިލޯއާއި 15 ކިލޯއާ ދެމެދުގެ ބަރުމިނުގެ ކަންނެލި ވެސް މަސްވެރިން އަތުން ކިރުވަން ފަށާފައެވެ.

ފެބުރުއަރީ މަހު 15 ކިލޯއިން މަތީގެ 72.16 ޓަނުގެ ބޮޑުކަންނެލި ކިރުވިއިރު، މިފްކޯ އިން ވަނީ 214 ދޯންޏަކަށް 1،815،428.00ރ. (އެއް މިލިއަން އަށްލައްކަ ފަނަރަހާސް ހަތަރު ސަތޭކަ އަށާވީސް ރުފިޔާ) ދޫކޮށްފައެވެ. 

މީގެއިތުރުން، މިދިޔަ މަހު 10 ކިލޯއާއި 15 ކިލޯއާ ދެމެދުގެ 55.16 ޓަނުގެ ކަންނެލި ކިރުވާފައިވާއިރު، އެ މަހަށްވާ ފައިސާގެ ގޮތުގައި 1،103،264.00ރ. (އެއް މިލިއަން އެއްލައްކަ ތިން ހާސް ދުއިސައްތަ ފަސްދޮޅަސް ހަތަރު ރުފިޔާ) ވަނީ މަސްވެރިންނަށް ދޫކޮށްފައެވެ. އެއީ 212 ދޯންޏަކުން ކިރުވި މަހަށް ދޫކުރި ފައިސާއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު ކުރީ ސަރުކާރުން މަސްވެރިންނަށް ދޫނުކޮށް އޮތް 250 މިލިއަނެއްހާ ރުފިޔާ އޮތެވެ. އެމަނިކުފާނުގެ ވެރިކަމުގެ ފުރަތަމަ އަހަރު މަސްވެރިންނަށް ދޫކުރަންޖެހޭ ފައިސާ ދޫކޮށް ނިންމަވައި، 2024 ވަނަ އަހަރުގެ މަސްވެރިންގެ ދުވަހު 48 ގަޑިއިރުތެރޭ މަސްވެރިންނަށް ފައިސާ ލިބޭނެ އިންތިޒާމު ރައީސް ހަމަޖެއްސެވިއެވެ. 

ރައީސްގެ ވަޢުދުފުޅާއެއްގޮތަށް ފާއިތުވި އަހަރުގައި މަސްވެރިންނަށް އެ އުސޫލުން ބަރާބަރަށް ފައިސާ ދޫކޮށްފައިވެއެވެ. އަދި ޖަނަވަރީ މަހުން ފެށިގެން ކަންނެލި ކިރުވަން މިފްކޯއިން ފެށިއިރު ކަންނެލީގެ މަސްވެރިންނަށްވެސް 48 ގަޑިއިރު ތެރޭގައި އަންނަނީ ފައިސާ ދޫކުރަމުންނެވެ.