ޕްރައިވަޓައިޒޭޝަން އެންޑް ކޯޕްރަޓައިޒޭޝަން ބޯޑު (ޕީ.ސީ.ބީ) އިން، ދައުލަތުގެ ހިއްސާވާ ކުންފުނިތަކުގެ (އެސް.އޯ.އީ) ބޯޑު ސަބް-ކޮމިޓީތައް އެކުލަވައިލުމާއި ހިންގުމުގައި އަމަލުކުރާނެ ގައިޑުލައިނަކާއި އަދި ބޯޑުގެ ކޮމިޓީތަކުގެ ނަމޫނާ ޗާރޓަރެއް އެކުލަވާލައިފި އެވެ.

ޕީ.ސީ.ބީން ބުނީ މި ގައިޑުލައިނުގެ މައިގަނޑު މަގުސަދަކީ، ދައުލަތުގެ ހިއްސާ އޮންނަ ކުންފުނިތަކުގެ ކޯޕަރޭޓް ގަވަރނަންސް ހަރުދަނާކޮށް، ދައުލަތުގެ ކުންފުނިތަކުން ކޯޕަރޭޓް ގަވަރނަންސް ކޯޑާ އެއްގޮތަށް ބޯޑުގެ ކޮމިޓީތައް އެކުލަވާލުމުގައި އަމަލުކުރާކަން ކަށަވަރުކުރުން ކަމަށެވެ.

ކުންފުނިތަކުގެ އެތެރޭގެ އިދާރީ ހިންގުން ފަސޭހަކުރުމަށްޓަކައި، ޕީ.ސީ.ބީ އިން އެކުލަވާލާފައިވާ ނަމޫނާ ޗާރޓަރުގައި ކޮމިޓީތަކުގެ މަސްއޫލިއްޔަތުތަކާއި، ކޮމިޓީ އެކުލެވިގެންވާ ގޮތާއި ކޮމިޓީގެ ޗެއާރމަންއާއި ސެކްރެޓަރީގެ ދައުރު ސާފުކޮށް ބަޔާންކޮށްފައި ވެއެވެ. މީގެ އިތުރުން، ކޮމިޓީގެ ކޯރަމް ހަމަކުރުމާއި، ވޯޓުލުމުގެ އުސޫލުތަކާއި، ޔައުމިއްޔާ ބެލެހެއްޓުން ފަދަ އިދާރީ ކަންކަމުގައި އަމަލުކުރާނެ ގޮތްތައްވެސް ހިމަނާފައިވެއެވެ. އަދި މަސްލަހަތު ފުށުއަރާ ކަންކަމާއި، ސިއްރު ހިފެހެއްޓުމާއި، އަހަރީ ބަޖެޓާއި، މަސައްކަތުގެ ފެންވަރު ވަޒަންކުރުން ފަދަ މުހިންމު ދާއިރާތަކަށްވެސް މި ޗާޓަރުގައި އަލިއަޅުވާލާފައިވާކަމަށް ޕީ.ސީ.ބީން މައުލޫމާތު ދެއެވެ. ޕީ.ސީ.ބީން މި ޗާޓަރު އެކުލަވައިލާފައިވަނީ އެސް.އޯ.އީ ތަކުގެ ގަވަރނަންސް ކޯޑުގެ މިންގަނޑުތަކަށާއި ބައިނަލްއަގުވާމީ އެންމެ ރަނގަޅު އުސޫލުތަކަށް ރިއާޔަތްކޮށްގެން ނެވެ.

ނަމޫނާ ޗާރޓަރާއި އެކު ހިއްސާކޮށްފައިވާ ގައިޑްލައިންގައިވާ ގޮތުން، އޮޑިޓް އެންޑް ރިސްކް ކޮމިޓީ އަކީ ކޮންމެ ކުންފުންޏެއްގައިވެސް އޮތުން މަޖުބޫރު، އަދި އެކުލަވައިލުމަށް ޕީ.ސީ.ބީ ގެ ވަކި ހުއްދައެއް ބޭނުންނުވާ ކޮމިޓީ އެކެވެ. ނަމަވެސް، އެހެނިހެން ކޮމިޓީތަކުގެ ޗާޓަރުތައް ކުންފުނީގެ ބޯޑުން މަޝްވަރާކޮށް ފާސްކުރުމަށްފަހު، ހުއްދަ ހޯދުމަށް ޕީ.ސީ.ބީ އަށް ހުށަހަޅަން ޖެހެއެވެ. މީގެ އިތުރުން، ކޮމިޓީތަކުގެ މަސައްކަތްތައް ކުރިއަށްދަނީ ބޯޑުން ފާސްކޮށްފައިވާ ޗާޓަރުތަކާ އެއްގޮތަށްތޯ ކުންފުނިތަކުން ގަވާއިދުން މުރާޖައާ ކުރަންޖެހޭނެ އެވެ.

މި ގައިޑްލައިނަކީ އެސް.އޯ.އީ ކޯޕަރޭޓް ގަވަރނަންސް ކޯޑަށް އަމަލުކުރުން މަޖުބޫރު ހުރިހާ ކުންފުނިތަކެއްގެ މައްޗަށް ހިނގާނެ އުސޫލެއް ކަމަށް ޕީސީބީން ބުނެ އެވެ.

ސަރުކާރު ހިއްސާވާ އެހެނިހެން ކުންފުނިތަކަށް މި ގައިޑުލައިނާއި ނަމޫނާ ޗާރޓަރަށް އަމަލުކުރުން މަޖުބޫރު ނޫން ނަމަވެސް، ކުންފުނީގެ ހިންގުން ހަރުދަނާކޮށް ހުނަރުވެރިކުރުމަށްޓަކައި މި ނަމޫނާ ޗާޓަރު ބޭނުންކުރުމަށް ޕީ.ސީ.ބީ އިން ބާރުއަޅާ ކަމަށް އެ ކުންފުނިން ވަނީ ބުނެފަ އެވެ.