މި އަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވާ ގޮތުގެ މަތިން އެމަނިކުފާނު ދެއްވާ ފުރަތަމަ ޕްރެސް ކޮންފަރެންސް މާދަމާ ހެނދުނު ބާއްވަން ނިންމައިފި އެވެ.

އެކަން ރައީސުލްޖުމްހޫރިއްޔާގެ އޮފީހުގެ ތަރުޖަމާން ހީނާ ވަލީދު މިރޭ ވަނީ ވިދާޅުވެފަ އެވެ. ހީނާ ވިދާޅުވީ މި އަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވާ ގޮތުގެ މަތިން އެމަނިކުފާނު ދެއްވާ ފުރަތަމަ ޕްރެސް ކޮންފަރެންސް މާދަމާ ހެނދުނު 10:00ގައި އޮންނާނެ ކަމަށެވެ.

"ހަމަ އެއާއެކު ވަޒީރުން ބާއްވާ ޕްރެސް ކޮންފަރެންސްތައް މިއަދު ވަނީ ފެށިފައި," ހީނާ ވިދާޅުވި އެވެ.

ސަރުކާރުން ކުރަމުން އަންނަ މަސައްކަތްތަކުގެ އެންމެ ފަހުގެ އަދާހަމަ ހިއްސާކުރުމަށްޓަކައި ކޮންމެ ހަފްތާއެއްގެ ހޯމަ ދުވަހު ނޫސްވެރިންނާ ބައްދަލުކުރައްވަން ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ ވިދާޅުވެފަ އެވެ.

މި އަހަރުގެ ރައްޔިތުންގެ މަޖިލީސް ހުޅުވުމަށް ބޭއްވި ރައްޔިތުންގެ މަޖިލީހުގެ ޖަލްސާގައި މީޑިއާއާ މަޢުލޫމާތު ޙިއްސާ ކުރުމުގައި މި ސަރުކާރުން މީޑިއާއާ ގާތުން މަސައްކަތްކުރުމުގައި ދެމި އޮންނާނެކަމަށް ވިދާޅުވެ، ސަރުކާރުގެ ހަރަކާތްތައް ހިއްސާކުރައްވައި ސުވާލުތަކަށް ޖަވާބުދެއްވުމުގައި، ނިމިދިޔަ އަހަރު، ރާއްޖެއާއި ބޭރުގެ މީޑީއާތައް ހިމެނޭގޮތަށް 424 ފަހަރު، ސީދާ ވަޒީރުން ވަނީ އެކި މީޑިއާތަކަށް، މަޢުލޫމާތާއި އިންޓަރވިއު ދެއްވަން ވަޑައިގެންފައިކަމަށް ރައީސް ވިދާޅުވިއެވެ. މީގެ އިތުރުން 493 ފަހަރު ވުޒާރާތަކުގެ އެކިއެކި އިސްވެރިންވަނީ ރައްޔިތުންނަށް ބޭނުންވާ އެކިއެކި މުހިންމު މަޢުލޫމާތު މީޑިއާގެ ޒަރީޢާއިން ހިއްސާ ކުރައްވާފައިކަން ފާހަގަކުރެއްވިއެވެ.  

މިދިޔަ އަހަރު ތެރޭގައި ރައީސުލްޖުމްހޫރިއްޔާގެ އޮފީހާއި މިނިސްޓްރީތަކަށް 1341 އާރު.ޓީ.އައި ފޮނުވާފައިވާ އިރު އޭގެ ތެރެއިން 1251 އާރު.ޓީ.އައި އަށް ޖަވާބު ދެވިފައިވާކަމަށް ވިދާޅުވެ، މިއީ، ރައީސުލްޖުމްހޫރިއްޔާގެ އޮފީހާއި މިނިސްޓްރީތަކަށް ފޮނުވި އާރު.ޓީ.އައިގެ 93 އިންސައްތަކަމަށް އެމަނިކުފާނު ވިދާޅުވިއެވެ. އެކި ސަބަބުތަކާހުރެ ވަގުތު އިތުރުކުރަން ޖެހުމުގެ ސަބަބުން އަދި ޖަވާބު ނުދެވި ހުރި އާރު.ޓީ.އައި ފޯމުތަކަށް ވެސް ޖަވާބު ދެމުން ދާނޭކަމަށް އެމަނިކުފާނު ވިދާޅުވިއެވެ.

ސަރުކާރުން ކުރަމުންދާ އެކި ކަންކަމުގެ މައުލޫމާތު ދިނުމަށް މިދިޔަ އަހަރު 40،875 ޕޯސްޓު ސޯޝަލް މީޑިއާ މެދުވެރިކޮށް ޝާއިޢުކޮށްފައި ވާނޭކަމަށް ވެސް ރައީސް ވިދާޅުވި އެވެ. 

އަދި މި އަހަރުގެ މާޗު މަހުން ފެށިގެން މީޑިއާއަށް ސީދާ އެމަނިކުފާނު މަޢުލޫމާތު ދިނުމުގެ ގޮތުން ޢާއްމު އުސޫލެއްގެ މަތިން، ކޮންމެ ހޯމަ ދުވަހަކު ނޫސްވެރިންނާ ބައްދަލުކުރައްވާނޭކަމަށް ރައީސް ވިދާޅުވި އެވެ.

ރައީސް ވިދާޅުވީ އަންނަ މަހުން ފެށިގެން ހަފްތާގެ އެއްފަހަރު ކޮންމެވެސް އެއް ވަޒީރަކު ނޫސްވެރިންނާ އެއްގަޑިއިރަށް ބައްދަލުކުރައްވާނެކަމަށެވެ. މި ބައްދަލުވުންތަކުގެ ތާވަލު ރައީސް އޮފީހުން ހާމަކުރައްވަމުން ގެންދަވާނެކަމަށް ރައީސް ވިދާޅުވިއެވެ.