ޖުމްހޫރީ މައިދާން މަރާމާތު ކުރުމުގެ މަސައްކަތުގެ ބޮޑު ބައެއް ނިންމާލައި ރޯދައަށް އެ ސަރަޙައްދު ވަގުތީ ގޮތުން މިއަދު ހުޅުވާލައިފި އެވެ.

ރޯޑް ޑިވެލޮޕްމެންޓް ކޯޕަރޭޝަނުން ގެންދަނީ ޖުމްހޫރީ މައިދާން މަރާމާތު ކުރުމުގެ ބޮޑު މަސައްކަތް ކުރަމުންނެވެ.

ޖުމްހޫރީ މައިދާން ސަރަޙައްދަކީ އާއިލާތަކުން ކުޑަކުދީންނާއެކު ހިތްފަސޭހަކޮށްލަންދާ ސަރަޙައްދެކެވެ. އަދި ޤައުމީ އެކި ހަފްލާތަކާއި ރަސްމިއްޔާތުތައް ވެސް ވަރަށް ގިނައިން ބާއްވާ ސަރަޙައްދެކެވެ.

އެ ސަރަޙައްދު ވަރަށް ފުރިހަމައަށް ތަރައްޤީކޮށްފައި ވަނިކޮށް މިދިޔަ ސަރުކާރުން އެކަށީގެންވާ ގޮތެއްގައި ނުބެލެހެއްޓުމުން މުޅި ސަރަޙައްދުގެ ހިތްގައިމުކަން ގެއްލި ހަލާކުވެ ބޮޑު މަރާމާތެއް ކުރަން އޮތީ ޖެހިފަ އެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު, ވެރިކަމަށް ވަޑައިގެން ފުރަތަމަ އައި ޢީދަށް އެ ސަރަޙައްދު މަރާމާތުކޮށް ހުޅުވި އެވެ. އެއީ ކުޑަކުދީންނާއި އާއިލާތަކަށް އުފާވެރި މާހައުލެއް ހޯދާ ދިނުމުގެ ގޮތުންނެވެ.

އޭގެ ފަހުން އާރުޑީސީއާ ހަވާލުކޮށް މުޅި އެ ސަރަޙައްދު މަރާމާތު ކުރުމުގެ ބޮޑު މަސައްކަތެއް ވަނީ ފަށާފަ އެވެ. އެ ގޮތުން އެ ސަަރަޙައްދުގައިވާ ފެންއަރުވާ ވަޑާމް މަރާމާތު ކުރުމާއި އިށީންނާނެ ގޮނޑިތަކާއި ބެންޗުތައް ހެދުމާއި މުޅި ސަރަޙައްދު ފެހިކޮށް ރީތިކުރުމުގެ މަސައްކަތް ދަނީ ކުރަމުންނެވެ.

އާރުޑީސީން މިއަދު ބުނީ އެ ސަރަޙައްދު މިހާރު ހުޅުވާލާފައިވަނީ ވަގުތީ ގޮތުން ކަމަށެވެ. އެއީ ރޯދަ މަހަކީ ވަރަށް ގިނަ ބަޔަކު ހަވީރުގެ ވަގުތުތަކުގައި ހިތްފަސޭހަކޮށްލަން ގޮސް އުޅޭ ސަރަޙައްދަކަށްވާތީ އެވެ. 

ވަގުތީ ގޮތުން ހުޅުވާލިއިރު އެ ސަރަޙައްދު މަރާމާތުކުރުމުގެ ބޮޑު ބައެއް ވަނީ ނިމިފަ އެވެ. ނަމަވެސް އަދިވެސް އެ ސަރަޙައްދު ފެހިކުރުމުގެ މަސައްކަތް ކުރަމުންދާތީ އެކަމަށް ސަމާލުވާން ވަނީ އެދިފަ އެވެ.

ޖުމްހޫރީ މައިދާން ސަރަޙައްދު ވަގުތީ ގޮތުން ހުޅުވާލިއިރު ރީތި މާގަސްތައް އިންދާ އެ ސަރަޙައްދު ވަނީ ޒީނަތްތެރިކޮށްފަ އެވެ. އަދި ކުރީން ހުރި ބުރުތައް މަރާމާތުކޮށް އިށީންދާނެ ރީތި ބެންޗުތައް ވަނީ ހަދާފަ އެވެ. 

އަދި ހުޅުވާލުމުގެ ކުރީން މުޅި ސަރަޙައްދު ވަރަށް ރީތިކޮށް ދޮވެ ސާފުކޮށްފައިވެ އެވެ. އެ ސަރަޙައްދުގައިވާ ރުއްތައް ވެސް ވަނީ ސާފުކޮށްފަ އެވެ.

ޖުމްހޫރީ މައިދާން ވަގުތީ ގޮތުން ހުޅުވާލިއިރު މިނިސްޓަރ އޮފް ކޮންސްޓްރަކްޝަން ހައުސިންގ އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބް ވަނީ އެ ސަރަޙައްދަށް ވަޑައިގެން މަސައްކަތް ކުރިއަށްދާ ގޮތް މިއަދު ބައްލަވާލައްވާފަ އެވެ.