ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ ވޯޓު ނެގުމާއި، ވޯޓު ގުނުމުގެ ކަންތައްތައް މޮނިޓަރ ކުރުމަށް ޝައުޤުވެރިވާ ފަރާތްތަކަށް އެ ފުރުސަތު ހުޅުވާލައިފި އެވެ.

އިލެކްޝަން ކޮމިޝަނުން އިއްޔެ ކުރި އިއުލާނުގައި ބުނެފައިވަނީ، އިންތިޚާބުގެ ކަންތައްތައް މޮނީޓަރ ކުރުމަށް ޝައުގުވެރިވާ ފަރާތްތަކުން، ފެބަރުއަރީ 9 ވަނަ ދުވަހުން ފެށިގެން ފެބްރުއަރީ 28، 2026 ވާ ހޮނިހިރު ދުވަހުގެ 15:00 ގެ ނިޔަލަށް އެ ފުރުސަތު ހުޅުވާލެވިފައިވާ ކަމަށެވެ.

އިލެކްޝަން އިން އިއުލާނުކޮށްފައިވާ މޮނީޓަރ އަކަށްވުމުގެ ޝަރުތުތައް:

މޮނިޓަރަކަށް ވުމަށް ޝައުގުވެރިވާފަރާތްތަކުން، އެ ފަރާތްތަކުގެ ފޯމު އިލެކްޝަންސް ކޮމިޝަނަށް ހުށަހަޅަންޖެހެނީ ނޫސް މަޖައްލާތަކަށާއި، ޚަބަރު ފަތުރާ އިދާރާތަކަށް ކަނޑައަޅާ ޑޭޓާ ލިއޭޒަނެއް މެދުވެރިކޮށް އެ ކޮމިޝަނުގެ މައި ޕޯޓަލް my.elections.gov.mv މެދުވެރިކޮށެވެ. އެގޮތުން ފޯމު ލާނެ ގޮތުގެ ތަފްޞީލް އެ ކޮމިޝަނުން ކޮށްފައިވާ އިއުލާނުގައި ވަނީ ބަޔާންކޮށްފަ އެވެ.

މޮނިޓަރުންގެ ގޮތުގައި ކުރިމަތިލާ ފަރާތްތަކުން ސަމާލުކަން ދޭން ޖެހޭ ކަންތައްތައް ވެސް އިއުލާނުގައި ވަނީ ބަޔާންކޮށްފަ އެވެ. އެގޮތުން ރަޖިސްޓަރީ ކޮށްފައިވާ ނޫސް މަޖައްލާ އަދި ޚަބަރު ފަތުރާ އިދާރާތަކަށް މޮނިޓަރކުރުމަށް ފާސްދޫކުރެވޭނީ، ކޮންމެ ފަރާތަކަށް، އިންތިޚާބުގައި ވޯޓުލާ އަދި ވޯޓުގުނާ ކޮންމެ ސަރަޙައްދަކަށް އެކަކަށްވުރެ އިތުރުނުވާ ގޮތަށެވެ. އަދި ވޯޓުލާ މަރުކަޒުގައި ކޮންމެ ޙައިސިއްޔަތަކުން އެއްފަހަރާ ހަރަކާތްތެރިވެވޭނީ އެއް މޮނިޓަރަކަށެވެ. މީގެ އިތުރުން ވޯޓުލާ ސަރަޙައްދުގައި ނުވަތަ ވޯޓުގުނާ ތަނުގައި ފޮޓޯ ނަގައި އަޑާއި މަންޒަރު ރެކޯޑް ކުރެވޭނީ ވޯޓުލާ ސަރަޙައްދުގައި ވޯޓުލާ ބޫތާއި 10 ފޫޓަށްވުރެ ކައިރިނުވާ ގޮތަށެވެ. އަދި އެ ސަރަހައްދުގައި ހަރަކާތްތެރިވާ މޮނިޓަރުން ހަރަކާތްތެރިވާންވާނީ ކަނޑައަޅާ ފާހަކާ އެކު، އޮފިޝަލުންނަށް ދަތި ނުވާ ގޮތަށްކަމަށް ވެސް އިލެކްޝަނުން ވަނީ ބުނެފަ އެވެ.

މިކަމާ ގުޅިގެން އިތުރު މައުލޫމާތު ބޭނުންފުޅުވާ ފަރާތްތަކުން އެ ކޮމިޝަނަށް ގުޅުއްވައިގެން މައުލޫމާތު ސާފުކުރުމަށް އިލެކްޝަންސް ކޮމިޝަނުން ވަނީ އެދިފަ އެވެ.