ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ގައުމީ އެއާލައިން މޯލްޑިވިއަންއިން ރާއްޖޭގެ ދެކުނުގެ ހަތަރު އަތޮޅުކަމަށްވާ އައްޑު އަތޮޅާއި، ފުވައްމުލަކާއި ހުވަދޫގެ ދެ ބުރި ވައިގެ ދަތުރުތަކުން ގުޅުވައިލައިފިއެވެ.

މިކަމަށްޓަކައި މިއަދު ބޭއްވި ރަސްމިއްޔާތުގައި އައިލެންޑް އޭވިއޭޝްނުގެ މެނޭޖިން ޑިރެކްޓަރ އިބްރާޙީމް އިޔާސާއި، ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީނާއި، ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާނާއި، މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމާއި، އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބްގެ އިތުރުން އެ ދާއިރާތަކުގެ މެމްބަރުންނާއި ދައުލަތުގެ އިސްވެރިން ބައިވެރިވެވަޑައިގެންނެވިއެވެ. 

މި ރަސްމިއްޔާތުގައި އައިލެންޑް އޭވިއޭޝްނުގެ މެނޭޖިން ޑިރެކްޓަރ އިބްރާޙީމް އިޔާސް ވިދާޅުވީ ދެކުނުގެ ހަތަރު އަތޮޅު ވައިގެ ދަތުރުން ގުޅާލެވިގެން ދިއުމަކީ ރައްޔިތުންނަށް ބޮޑު ފަސޭހައެއް ލިބިގެންދާނެކަމެއް ކަމަށެވެ.

މި ހިދުމަތް ދިނުމުގެ އޮޕްރޭޝަނަލް ބޭސް އެއްގެ ގޮތުގައި ހަމަޖައްސާފައިވަނީ ގަން އިންޓަނޭޝަނަލް އެއާޕޯޓުކަމަށާއި ދަތުރުތައް ހަފްތާގެ ކޮންމެ ދުވަހަކުވެސް ބާއްވަން ހަމަޖެހިފައިވާކަމަށް އިޔާސް ވިދާޅުވިއެވެ. 

ހިދުމަތް ދިނުމުގައި ރައްޔިތުންނަށް ލުއިފަސޭހަ އަގުތަކެއް ކަނޑައެޅުމަށް ބަލާފައިވާނޭކަމަށް ވިދާޅުވިއެވެ. 

ދަތުރުތަކުގެ އަގުތައް؛

މޯލްޑިވިއަނުން މިހާރުވެސް ގަމާއި މާލެއާ ދެމެދު ހަފްތާއަކު ދެ ދަތުރު ކުރަމުން އަންނަކަމަށް އެމްޑީ ވިދާޅުވިއެވެ. އަދި ގަމާއި ފުވައްމުލަކާ ދެމެދުވެސް މޯލްޑިވިއަނުގެ ދަތުރެއް ކުރަމުންދެއެވެ.  

ސްރީލަންކާގެ އިންޓަނޭޝަނަލް ފްލައިޓެއް މިހާރުވެސް ހަފްތާއަކު ދެ ދަތުރު މި ސަރަހައްދަށް ކުރަމުން އަންނައިރު ރާއްޖެއިން ބޭރަށް ވަޑައިގަންނަވާ ބޭފުޅުންނަށްވެސް ލުއިފަސޭހަ ވާނޭގޮތަށް ޝެޑިއުލް ރާވާލުމުގައި ބަލާފައިވާނެކަމަށް އެމްޑީ ވިދާޅުވިއެވެ. 

ދެކުނުގެ ހަތަރު އަތޮޅު ވައިގެ ދަތުރުން ގުޅާލުމުގެ ހިދުމަތުގައި ބޭނުންކުރަނީ މޯލްޑިވިއަންގެ ޓްވިން އޮޓާ ބޯޓުތަކެވެ. ޑީ ހެވިލަންޑް ކެނެޑާ DHC-6-300 ޓްވިން އޮޓާއަކީ ކުރު ރަންވޭތަކުން އުދުއްސާލުމާއި ޖެއްސުމުގެ ގާބިލުކަން ލިބިފައިވާ، 15 މީހުންގެ ޖާގައިގެ ބޯޓެކެވެ.

ޓްވިން އޮޓާ ބޯޓު އާންމުކޮށް ރާއްޖޭގައި މިހާރު ބޭނުންކުރަނީ ސީޕްލޭންގެ ގޮތުގައެވެ. ނަމަވެސް ހިދުމަތް ދިނުމަށްޓަކައި ބޯޓުތައް މިހާރު ވަނީ ކަނޑަށް ޖައްސާ ކޮންފިގަރޭޝަނުން އެއްގަމުގެ ރަންވޭތަކަށް ޖެއްސޭ ގޮތަށް، ފުރޮޅުލީ ބޯޓަކަށް ބަދަލުކޮށްފައެވެ.

މި ހިދުމަތުގެ މައިގަނޑު މަގުސަދަކީ ދެކުނުގެ ރަށްތަކުގެ މެދުގައި ދަތުރުފަތުރު ކުރުމުގައި އާންމުންނަށް ދިމާވާ ދަތިތަކަށް ހައްލެއް ހޯދައިދިނުމެވެ.

މި ހިދުމަތުގެ ސަބަބުން ގއ، ގދ، ފުވައްމުލައް އަދި އައްޑޫއާ ދެމެދުގައި އޮތް ދަތުރުފަތުރުގެ ގުޅުން އިތުރަށް ރަނގަޅުވާނެއެވެ. އަދި އައްޑޫ ގަން، ދެކުނުގެ ދަތުރުފަތުރުގެ މައި މަރުކަޒެއްގެ ގޮތުގައި ތަރައްގީވެ، އެހެން ސަރަހައްދުތަކާ ގުޅުވައިދޭނެއެވެ. އައްޑޫ ގަން، ދެކުނުގެ ދަތުރުފަތުރުގެ މައި މަރުކަޒެއްގެ ގޮތުގައި ތަރައްގީވެ، އެހެން ސަރަހައްދުތަކާ ގުޅުވައިދޭނެއެވެ.

މީގެ އިތުރުން ބަލި މީހުން އުފުލުމާއި ސިއްހީ ބޭނުންތަކަށް ކުރާ ދަތުރުތަކުގައި ކަނޑުދަތުރުފަތުރަށް ބަރޯސާވާން ޖެހޭ މިންވަރު ކުޑަވެ، މޫސުން ގޯސްވުމުގެ ސަބަބުން ދިމާވާ ދަތިތަކަށް ހައްލެއް ލިބޭނެއެވެ. އަދި ގަމަށް ދާ ޓޫރިސްޓުންނަށް ދެކުނުގެ އެހެން ރަށްތަކަށާއި ރިސޯޓުތަކަށް ދަތުރުކުރުން ފަސޭހަވެ، ގެސްޓްހައުސްތަކާއި ލޯކަލް ޓޫރިޒަމަށް ކުރިއެރުން އަންނާނެއެވެ.