އައްޑޫ ގަން އިންޓަނޭޝަނަލް އެއާޕޯޓަށް ބައިނަލްއަގުވާމީ ދެ އެއާލައިނެއްގެ ދަތުރުުތައް ފެށުމަށް ސަރުކާރުން މަސައްކަތްކުރަމުންދާކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީނު ވިދާޅުވެއްޖެއެވެ. 

ދެކުނުގެ ހަތަރު އަތޮޅެއްގެ މެދުގައި ގައުމީ އެއާލައިން މޯލްޑިވިއަން މެދުވެރިކޮށް ވައިގެ އުދުހުމުން ގުޅައިލުމުގެ މަސައްކަތް އިފުތިތާހުކުރުމަށް މިއަދު ގަން އެއާޕޯޓުގައި ބޭއްވި ރަސްމިއްޔާތުގައި ދެއްކެވި ވާހަކަފުޅުގައި އަމީނު ވިދާޅުވީ ގަން އެއާޕޯޓަކީ މީގެ ދިހަ އަހަރުކުރިންވެސް ބައިނަލްއަގުވާމީ އެއާލައިންތަކުން ބޭނުންކުރާ ގިނަ މަތިންދާބޯޓު ޖެއްސުމުގެ ގާބިލުކަން ލިބިފައި އޮތް އެއާޕޯޓެއް ކަމަށެވެ. 

ވަޒީރު ވިދާޅުވި ގޮތުގައި ބައިނަލްއަގުވާމީ އެއާާލައިންތަކުން ގަން އިންޓަނޭޝަނަލް އެއާޕޯޓަށް ދަތުރުތައް ކުރާނެ މާހައުލެއް މިހާތަނަށް އުފެއްދިފައި ނެތީ، އެއާލައިން އޮޕަރޭޓުކުރުމަށް ކުރަންޖެހޭ މަސައްކަތްތައް އެކަށީގެންވާ މިންވަރަށް ގަދައަޅައި ކުރެވިފައި ނެތުމުންނެވެ. ދެވަނަ ސަބަބެއްގެ ގޮތުގައި އަމީނު ފާހަގަކުރެއްވީ އެ ސަރަހައްދުގައި ފަތުރުވެރިކަން ތަރައްގީކުރުމަށް އެކަށީގެންވާ މަސައްކަތްތަކެއް މާޒީގައި ކުރެވިފައި ނެތް ކަމެވެ. 

މިއަދު އިފުތިތާހުކުރެވުނު ދެކުނުގެ ކަނެކްޝަން ނެޓްވޯކު ނުވަތަ ވައިގެ ދަތުރުފަތުރުގެ ވިއުގައިގެ ސަބަބުން ފަތުރުވެރިކަމުގެ ސްކޯޕު ހަތަރު އަތޮޅަށް ފުޅާވާނެކަން ފާހަގަކުރައްވަމުން ވަޒީރު ވިދާޅުވީ މިހާރުވެސް ސަރުކާރުން އަންނަނީ މެދުއިރުމަތީގެ އެއް އެއާލައިނަކާއި، ޗައިނާގެ އެއް އެއާލައިންގެ ދަތުރުތައް ގަން އިންޓަނޭޝަނަލް އެއާޕޯޓަށް ފެށުމަށް މަސައްކަތްކުރަމުން ކަމަށެވެ. 

"މިވަގުތުވެސް ސަރުކާރުން މިއަންނަނީ މެދުއިރުމަތީގެ އެއް އެއާލައިނާއި، ޗައިނާގެ އެއާލައިނެއް އައްޑޫ އިންޓަނޭޝަނަލް އެއާޕޯޓަށް ގެނައުމަށް މަސައްކަތްކުރަމުން. ބޮޑެތި ކޮންސެޝަންތަކެއް ދީގެން ނަމަވެސް އެއާލައިންތައް ގަން އިންޓަނޭޝަނަލް އެއާޕޯޓަށް ގެންނަަން އެބަޖެހޭ. އިރާދަކުރެއްވިއްޔާމުން އަޅުގަނޑުމެން މި އެއާޕޯޓުގެ ހާލަތު ބަދަލުކުރާނަން. ގަން އިންޓަނޭޝަނަލް އެއާޕޯޓަކީ އެއާލަައިންތައް އަންނަ ރާއްޖޭގެ ސަދަން ހަބް ކަމުގައި އަޅުގަނޑުމެން ހަދާނަަން،" ވަޒީރު ވިދާޅުވިއެވެ. 

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ތަސައްވުރަކީ އެއާޕޯޓުތަކެއް އެޅުން އެކަނި ނޫންކަން ފާހަގަކުރައްވަމުން އަމީނު ވިދާޅުވީ އެމަނިކުފާނުގެ ވިސްނުންފުޅަކީ ދެކުނުގައި މިއަދު ގާއިމުކުރެވިގެންދާ ވިއުގަ ފަދަ މަދަނީ ވައިގެ އުދުހުންތަކުގެ ވިއުގަތަކުން އަތޮޅުތަކާއި ރަށްތައް ގުޅައިލެވި އެކަމުގެ މަންފާއާއި ފަސޭހަތައް ރައްޔިތުންނަށް ލިބުން ކަމަށެވެ. 

ގަމު ހަބެއްގެ ގޮތުގައި ހަމަޖައްސައި އައްޑޫ ފުވައްމުލައް އަދި ހުވަދޫ ގުޅައިލެވޭ ދަތުރުފަތުރުގެ ނިޒާމުގެ ތެރެއިން، ދެކުނުގައި ގާއިމުކުރެވިފައިވާ 3،900 އެއްހައި އެނދަށް ވާސިލުވުމަށް ފުރުސަތު ލިބިގެންދާނެކަމަށް އަމީނު ވިދާޅުވިއެވެ. އޭގެ އިތުރަށް ތައުލީމާއި ވަޒީފާއާއި ސިއްހީ ފަރުވާގެ ބޭނުންތަކަށް ދަތުރުކުރާ ރައްޔިތުންނަށް ވަރަށް ބޮޑު ލުއިފަސޭތަކެއް ލިބޭނެ ކަމުގައިވެސް ވަޒީރު ވިދާޅުވިއެވެ.