ދިވެހިރާއްޖޭގެ އިގުތިސާދުގެ ދެވަނައަށް އެންމެ ބޮޑު ސިނާއަތް ކަމުގައިވާ މަސްވެރިކަމަށް ފާއިތުވި އަހަރު ބޮޑު ކުރިއެރުމެއް ލިބި މަސް ކިރުވި މިންވަރު ކުރީ އަހަރަށްވުރެ %66 އަދި މަސް އެކްސްޕޯޓުކުރި މިންވަރު 86.9 އިންސައްތަ އިތުރުވިކަން މަރުކަޒީ ބެންކު މޯލްޑިވްސް މަނިޓަރީ އޮތޯރިޓީގެ ތަފާސްހިސާބުތަކުން ދައްކައިފިއެވެ. 

ކޮންމެ މަހަކު އެއްފަހަރު މަރުކަޒީ ބޭންކުން އާއްމުކުރާ އިގުތިސާދީ ތަފާސްހިސާބުތަކަށް ބަލާއިރު ނިމުނު އަހަރު މަސްވެރިންވަނީ 88،347 މެޓްރިކްޓަނުގެ މަސް ކިރުވާފައެވެ. އެއީ 2024 ވަނަ އަހަރު ކިރުވި 53،232 މެޓްރިކްޓަނުގެ މަހާ އަޅާބަލާއިރު 66 އިންސައްތަ އިތުރު މިންވަރެކެވެ. 

މަސް ކިރުވި އަދަދަށް ބަލާއިރު އެންމެ ބޮޑަށް އިތުރުވީ ކަޅުބިލަމަސް ކިރުވި މިންވަރެވެ. އެގޮތުން 2024 ވަނަ އަހަރު 40،445 މެޓްރިކްޓަނުގެ މަސް ކިރުވި ނަމަވެސް، 2025 ވަނަ އަހަރު އެ އަދަދުވަނީ 80.2 އިންސައްތައިން އިތުރުވެ، 72،878 މެޓްރިކްޓަނަށް އަރާފައެވެ. 

އޭގެ އިތުރަށް ބޮޑު ކަންނެލި ކިރުވި މިންވަރުވެސް ނިމުނު އަހަރު 2024 ވަނަ އަހަރަށްވުރެ އިތުރެވެ. އެގޮތުން 2024 ގައި ކިރުވާފައިވަނީ 12،467 މެޓްރިކްޓަނުގެ ބޮޑު ކަންނެއްޔެވެ. 2025 ގައި 14،950 މެޓްރިކްޓަނުގެ ބޮޑު ކަންނެލި ކިރުވިއެވެ. އެއީ 19.9 އިންސައްތައިގެ އިތުރުވުމެކެވެ. 

ފާއިތުވި އަހަރު ކަޅުބިލަމަހާއި ބޮޑުކަންނެލި ނޫން އެހެނިހެން ބާވަތްތަކުގެ 518 މެޓްރިކްޓަނުގެ މަސް ކިރުވިއިރު، 2024 ގައި ކިރުވާފައިވަނީ 319 މެޓްރިކްޓަނުގެ އެހެނިހެން ބާވަތްތަކުގެ މަހެވެ. އެހެންކަމުން ކަަޅުބިލަމަހާއި ކަންނެލި ނޫން ބާވަތްތަކުގެ މަސްކިރުވި މިންވަރު 2025 ވަނަ އަހަރު 62.3 އިންސައްތަ އިތުރުވިއެވެ. 

މިހާތަނަށް މަރުކަޒީ ބޭންކުން ހިއްސާކޮށްފައިވަނީ ނޮވެންބަރު މަހުގެ ނިޔަލަށް މަސް ބޭރުކުރި މިންވަރުގެ ހިސާބުތަކެވެ. އެ ހިސާބުތަކަށް ބަލާއިރު ނޮވެންބަރު މަހުގެ ނިޔަލަށް 69،564 މެޓްރިކްޓަނުގެ މަސް ރާއްޖެއިން ބޭރުކުރިއެވެ. އެއީ 2024 ގައި ބޭރުކުރި 37،213 މެޓްރިކް ޓަނާ އަޅާބަލާއިރު 86.9 އިންސައްތައިގެ އިތުރުވުމެކެވެ. 

ގަނޑުކޮށްގެންނާއި ތާޒާކޮށް އަދި ފިނިކޮށްގެން މަސް ބޭރުކުރި މިންވަރު 104.9 އިންސައްތަ ނިމުނު އަހަރުގެ އެ މުއްދަތުގައި އިތުރުވިއިރު، އެންމެ ބޮޑަށް އިތުރުވީ ކަޅުބިލަމަސް ބޭރުކުރި މިންވަރެވެ. 2024 ވަނަ އަހަރު ތޒަކޮށް އަދި ގަނޑުކޮށް ބޭރުކޮށްފައިވަނީ 21،446 މެޓްރިކްޓަނުގެ ކަޅުބިލަމަހެވެ. 2025 ގައި އެ އަދަދުވަނީ 53،075 މެޓްރިކްޓަނަށް އިތުރުވެފައެވެ. 

މަސް ކިރުވި މިންވަރާއި ބޭރުކުރި މިންވަރު އިތުރުވުމުގައި މައިގަނޑު ސަބަބެއްކަމަށް ބެލެވެނީ 2024 ވަނަ އަހަރުގެ ޑިސެންބަރު މަހުން ފެށިގެން 48 ގަޑިއިރު ތެރޭގައި މަސްވެރިން ކިރުވާ މަހަށް ފައިސާ ދޫކުރެވޭނެ އިންތިޒާމުތައް ހަމަޖެހުމާ ގުޅިގެން އެ ސިނާއަތަށް އައި ކުރިއެރުމެވެ.