އަހަރު ދުވަހަށް ދެމިގެންދާގޮތަށް "ބިންގާ"ގެ ނަމުގައި ތަރުބަވީ ޚާއްސަ ޕްރޮގްރާމެއް ފަށަން ނިންމައި، އެ ޕްރޮގްރާމުގެ މަސައްކަތްތައް ކުރިއަށް ގެންދިއުމަށް ސްކޫލްތަކަށް އެޑިއުކޭޝަން މިނިސްޓްރީން އަންގައިފި އެވެ.

އެޑިއުކޭޝަން މިނިސްޓްރީއިން ސްކޫލްތަކަށް ފޮނުވި ސާކިއުލާގައި ބުނެފައިވަނީ، ޤައުމީ މަންހަޖުގެ ތަޞައްވުރަކީ ތަޢުލީމީ، ނިޒާމުގެ ތެރެއިން ފޯރުކޮށްދެވޭ ޢިލްމާއި، ހުނަރާއި ސިފަތަކުގެ ތެރެއިން ކޮންމެ ކުއްޖަކީވެސް ދިރިއުޅުމަށް ތައްޔާރުވެފައިވާ ކުއްޖަކަށް ހެދުން ކަމަށެވެ. އެހެންކަމުން އޯގާތެރި އެކަކު އަނެކަކަށް އިޙްތިރާމްކުރާ ޒިންމާދާރު ޚުލްޤުހެޔޮ ޖީލެއް ބިނާކުރުމަށް މަސައްކަތް ކުރުމަކީ ރަސްމީ ތަޢުލީމީ ނިޒާމުގެ ތެރެއިން ހާއްސަ އިސްކަމެއްދީގެން ކުރަންޖެހޭ ކަމެއް ކަމަށް ބުނެފައިވެއެވެ. 

ވަކި ތީމް ތަކަކަށް ބަހާލައިގެން މުޅިއަހަރު ދުވަހަށް ދެމިގެންދާގޮތަށް، ހުރިހާ ސްކޫލެއްގައި ކުރިއަށް ގެންދިއުމަށް ހަމަޖެހިފައިވާ ތަރުބަވީ ޚާއްޞަ ޕްރޮގްރާމް، "ބިންގާ" އަކީ ރިވެތި ސިފަތަކާއި އާދަތަކަށް ދަރިވަރުން އަހުލުވެރިކުރުވުމުގެ މަގުސަދުގައި ސްކޫލާއި ބެލެނިވެރިންނާއި މުޅި މުޖުތަމަޢުގެ ބައިވެރިވުމާއެކު ކުރިއަށްގެންދިއުމަށް ހަމަޖައްސާފައިވާ ޕްރޮގްރާމެކެވެ.

"ބިންގާ" ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ ކޮންމެ މަހަކަށް ހާއްސަކޮށް ތީމެއް ކަނޑައަޅައިގެންނެވެ. މި ޕްރޮގްރާމުގެ ފުރަތަމަ ތީމަކަށް ހަމަޖައްސާފައި ވަނީ، "ޝުކުރުވެރިވުން"އެވެ. ކޮންމެ މަހެއް ފެށުމުގެ ކުރިން އެމަހަކަށް ކަނޑައަޅާފައިވާ ތީމް ސްކޫތަކަށް އެޑިއުކޭޝަން މިނިސްޓްރީން އަންގަމުން ގެންދާނެކަމަށް މިނިސްޓްރީއިން ވަނީ ބުނެފަ އެވެ.

ބިންގާ ޕްރޮގްރާމް ވިލަރެސްކުރުމަށް ހާއްސަ، ކޮމިޓީއެއް އެޑިޔުކޭޝަން މިނިސްޓްރީން ވަނީ އެކުލަވާލާފަ އެވެ. ކޮންމެ މަހަކަށް ހާއްސަ ތީމް ކަނޑައެޅުމާއި ކަނޑައެޅި ތީމްއާއި، އެތީމްއާއި ގުޅޭގޮތުން ކުރިއަށް ގެންދާނޭ ހަރަކާތްތައް ސްކޫލުތަކާއި ހިއްސާކުރުމާއި ޕްރޮގްރާމް ކުރިއަށްގެންދިއުމަށް އެހީތެރިވުމާއި ޕްރޮގްރާމް ކުރިއަށްދާގޮތް ވަޒަންކުރުމުގެ ޒިންމާ ސްކޫލުތަކާއި ގުޅިގެން އަދާކުރާނީ މި ކޮމިޓީންނެވެ.

ޕްރޮގްރާމްގެ ތެރެއިން ދަރިވަރުން ދީނީ ވާޖިބުތަކާއި، އަޚްލާޤީ ރިވެތި ސިފަތަކާއި އާދަތަކަށް އަހުލުވެރިކުރުވުމަށް، އަމާޒުކޮށް ކޮންމެ ސްކޫލަކުންވެސް ހާއްސަ ހަރަކާތްތަކެއް ކުރިއަށް ގެންދާނެ އެވެ. އެގޮތުން، އިޙްތިރާމުކުރުމާއި، ޒިންމާނެގުމާއި، ސާފުތާހިރުކަމާއި، އަޅާލުމާއި، އޯގާތެރިކަން އިސްކުރުންފަދަ، ރިވެތި ސިފަތަކާއި އާދަތައް ދަރިވަރުންގެ ކިބައިގާ އަށަގެންނެވުން ހިމެނެ އެވެ.

ފަރުޝު ފަސްނަމާދަށް ދަރިވަރުންގެ ހިތްތަކުގައި ލޯބި އުފައްދާ، ދަރިވަރުންނަކީ ފަރުޝު ފަސްނަމާދު އަދާކުރާ ބަޔަކަށް ހެދުމަށް މި ޕްރޮގްރާމްގެ ތެރެއިން ޚާއްޞަ މަސައްކަތްތަކެއް ކުރަންވާނެ ކަމަށް ސްކޫލްތްކަށް ފޮނުވި އުޞޫލުގައި ބަޔާންކޮށްފައި އެވެ.

ކޮންމެ މަހަކަށް ކަނޑައަޅާފައިވާ ތީމް ތަޢާރަފް ކުރުމަށް ހާއްސަ ޕެނަލް ޑިސްކަޝަންއެއް ނުވަތަ އެމަހެއްގެ "ތީމްއަކާއިގުޅޭ ބޮޑު ހަރަކާތެއް، މީޑިއާ ކެމްޕެއިނަކާއެކު" މިނިސްޓްރީން ކުރިއަށް ގެންދަން ވަނީ ނިންމާފައިވެ އެވެ.

"ބިންގާ" ޕްރޮގްރާމް ސްކޫލުތަކުގައި ކުރިއަށް ގެންދިއުމުގެ އެންމެ އިސްދައުރެއް އަދާކުރާނީ އެސްކޫލެއްގެ ޕްރިންސިޕަލް ނުވަތަ އެވަގުތެއްގައި އެ ސްކޫލެއް ހިންގުމާއި ހަވާލުވެ ހުންނަވާ އެންމެ އިސްފަރާތެކެވެ.

މި ޕްރޮގްރާމް ކާމިޔާބުކަމާއެކު ސްކޫލުތަކުގައި ހިންގުމަށް، އެމަހެއްގެ ތީމްއަކާއި ގުޅޭގޮތުން ސްކޫލުތަކުގައި ކުރިއަށް ގެންދާނެ ހަރަކާތްތައް ކަނޑައަޅާނީ، އެސްކޫލެއްގެ ސީނިއަރ މެނޭޖްމަންޓުގެ ޓީމަކުންނެވެ.

ސާކިއުލާގައި އިތުރަށް ބުނެފައިވަނީ، ސްކޫލުން ރާވާ ހަރަކާތްތަކުގެ އިތުރުން ކޮންމެ މަހަކަށް ކަނޑައަޅައި ތީމްއާއި އެތީމްއާއި، ގުޅުންހުރި މެސެޖުތައް ސްކޫލުގެ ގޯތިތެރެއިން ފެންނަގޮތަށް ޑިސްޕްލޭކުރަންވާނެ ކަމަށެވެ. އަދި ކޮންމެ މަހަކަށް ކަނޑައަޅާ ތީމް ތައާރަފް ކުރުމަށް ޙާއްޞަ އެސެމްބްލީއެއް ބާއްވައި އެ ސެމްބްލީ ތަކުގައި ތީމްއާއި، ގުޅޭ ގޮތުން، ވާހަކަދެއްކުމުގެ ފުރުސަތު ދަރިވަރުންނަށް ފަހިކޮށްދޭން ވާނެ ކަމަށް ބުނެފައިވެއެވެ. މީގެއިތުރުން ރަށު ފެންވަރުގެ ޕެނަލް ޑިސްކަޝަންއެއް ނުވަތަ ކޮމިއުނިޓީ ބައިވެރިކޮށްގެން ބާއްވާ ބޮޑުހަރަކާތެއް ކުރިއަށް ގެންދިއުމަށް ވެސް ސާކިއުލާގައި ވަނީ ބުނެފަ އެވެ.

ކޮންމެ މަހެއްގެ ތީމްއަކާއި ގުޅޭ ގޮތުން، ގޭތެރޭގައާއި މުޖުތަމަޢުގައި އުޅޭއިރު ކުރެވޭނެ ކަންތައްތައް ބެލެނިވެރިންނާއި ދަރިވަރުންނަށް އަންގައިދިނުމާއި ކޮންމެ މަހަކަށް ކަނޑައަޅާ ތީމްއާއި ގުޅޭ ގޮތުން ސްކޫލުން ހިންގާ ހަރަކާތްތައް އެސްކޫލެއްގެ މީސްމީޑިއާ އާ މަންސަ ތަކުގައި ހިއްސާ ކުރަމުން ގެންދިއުމަސްވެސް ސާކިއުލާގައި ވަނީ އިރުޝާދު ދީފަ އެވެ.