ފުޓުބޯލް އެސޯސިއޭޝަން އޮފް މޯލްޑިވްސްގެ ފައިސާއަށް ހިޔާނާތްތެރިވިކަމަށް ތުހުމަތުކުރެވޭ މައްސަލާގައި ދައުލަތުން ދައުވާކޮށްފައިވާ އެ އެސޯސިއޭޝަނުގެ ފައިނޭންސް ޑިޕާޓުމެންޓުގެ ކުރީގެ ވެރިޔާ މުހައްމަދު އަގީލު ތައިލޭންޑުގެ ބެންކޮކުން ހައްޔަރުކޮށްފިއެވެ. 

އަގީލުގެ މައްޗަށް ދައުވާކުރީ ފީފާއިން އެފްއޭއެމްއަށް ދިން ފައިސާއަށް ހިޔާނާތްތެރިވެ އެ ފައިސާ ބޭނުންކޮށްގެން އަމީން އެވެނިއުއިން އެޕާޓުމެންޓެއް ގަތްކަމަށް އެފްއޭއެމްގެ ކުރީގެ ރައީސް ބައްސާމު އަދީލު ޖަލީލަށް ތުހުމަތުކުރާ މައްސަލާގައި މަނީ ލޯންޑާކުރުމަށް އެހީތެރިވުމުގެ ކުށުގެ ދައުވާއެވެ. 

އޭގެ އިތުރަށް އަގީލަކީ ބައްސާމާ ދެކޮޅަށް މި މައްސަލާގައި އުފުލާފައިވާ ހިޔާނާތާއި މަނީ ލޯންޑަރިންގެ ދައުވާތަކުގައި ދައުލަތުން ހެއްކެއްގެ ގޮތުގައި ހުށަހަޅާފައިވާ މީހެކެވެ. 

އަގީލު ކޯޓަށް ހާޒިރުނުކުރެވިގެން އޭނާގެ މައްޗަށް ކުރި ދައުވާގެ އަޑުއެހުންތައް ކުރިއަށްނުގެންދެވި މަޑުޖެހިފައިވެއެވެ. އެ މައްސަލާގައި އޭނާ ހައްޔަރުކޮށްގެން ކޯޓަށް ހާޒިރުކުރުމަށް ފުލުހުންގެ މައްޗަށް ކޯޓުންވަނީ އަމުރުކޮށްފައެވެ. އަދި ފުލުހުންވަނީ އޭނާ ރާއްޖެ ގެނައުމަށް އިންޓަޕޯލު މެދުވެރިކޮށް ރެޑް ނޯޓިސް ނެރެފައެވެ.

ފުލުހުން މިއަދު މީޑިޔާއަށް މައުލޫމާތު ދިން ގޮތުގައި އަގީލު ހައްޔަރުކުރީ ރެޑް ނޯޓިސްގެ އިތުރަށް ތައިލޭންޑުގެ ވިސާގެ އުސޫލުތަކާ ހިލާފުވުމުގެ މައްސަލައެއްވެސް ފެންމަތިވެގެންނެވެ. އޭނާ ރާއްޖެއަށް ގެނައުމުގެ މަސައްކަތް ތައިލޭންޑުގެ ފުލުހުންނާ ގުޅިގެން ކުރަމުންދާކަމަށް ފުލުހުންގެ ހިދުމަތުން ބުންޏެވެ. 

އަގީލުގެ މައްޗަށް ދައުވާކުރި މައްސަލައިގެ އިތުރުން ބައްސާމުގެ މައްޗަށް އުފުލާފައިވާ ދައުވާތަކާ ގުޅިގެން އޭނާގެ ހެކިބަސް ނެގުމަށް ބޭއްވި އަޑުއެހުންތައްވެސް އަގީލު ހާޒިރުނުކުރެވުމުގެ ސަބަބުން ކެންސަލްކުރަންޖެހުނެވެ. 

މި މައްސަލާގައި ބައްސާމުގެ މައްޗަށް ހިޔާނާތުގެ ކުށް ސާބިތުވެ 23 އަހަރުގެ ޖަލު ހުކުމެއް ޖަނަވަރީ މަހުގެ ހަވަނަ ދުވަހު އިއްވާފައިވެއެވެ. ދައުލަތުން ބުނާ ގޮތުގައި މި މައްސަލާގައި ބައްސާމު ހިޔާނާތްތެރިވެފައިވަނީ ކޮވިޑް-19 ގައި ކުލަބުތަކަށް އެހީވުމަށް ފީފާއިން ދިން 1.9 މިލިއަން ޑޮލަރުގެ ތެރެއިން އެއް މިލއިން ޑޮލަރަށެވެ.