މިދިޔަ އަހަރުގެ ފަހު ކުއާޓަރުގައި ބޭންކް އޮފް މޯލްޑިވްސް (ބީއެމްއެލް) އިން ހޯދި ބޮޑެތި ކުރިއެރުންތަކާ އެކު މިދިޔަ އަހަރު ޖުމްލަ ފައިދާ ރެކޯޑް އަދަދަކަށް އިތުރުވެއްޖެއެވެ. 

ބީއެމްއެލްއިން މިއަދު މީޑިއާތަކާ އާއްމުކުރި ބަޔާނުގައި ވަނީ މިދިޔަ އަހަރުގެ ފަހު ކުއާޓަރުގެ ތަފާސްހިސާބާއި ޖުމްލަ ފައިދާގެ އަދަދުތައް ހާމަކޮށްފައެވެ. 

މިދިޔަ އަހަރުގެ ހަތަރު ވަނަ ކުއާޓަރުގައި ބީއެމްއެލްއިން ވަނީ 828.7 މިލިއަން ރުފިޔާގެ ހިންގުމުގެ ފައިދާއަކާއެކު، ރެކޯޑް މާލީ ނަތީޖާއެއް ހާސިލްކޮށްފައި ކަމަށް ބަޔާނުގައި ބުނެފައިވެއެވެ. އެގޮތުން ސާފު ފައިދާގެ ގޮތުގައި 837.5 މިލިއަން ރުފިޔާ ލިބިފައިވާއިރު، މިއީ މިދިޔަ އަހަރުގެ ތިން ވަނަ ކުއާޓަރާ އަޅާބަލާއިރު 76.2 އިންސައްތަ ކުރިއެރުމެއް ކަމަށް އެ ބޭންކުން ވަނީ ބުނެފައެވެ. 

ބީއެމްއެލްއިން ބުނީ، 2025 ވަނަ އަހަރުގެ މާލީ ނަތީޖާތައް ދައްކާގޮތުން ބޭންކަށް ލިބުނު ޖުމްލަ އާމްދަނީ 5.5 ބިލިއަން ރުފިޔާއަށްވުރެ މަތިވެފައިވާ ކަމަށެވެ. މިއީ 2024 ވަނަ އަހަރާ އަޅާބަލާއިރު 16.1 އިންސައްތައިގެ ކުރިއެރުމެކެވެ. އަދި ޓެކްސްއަށް ކެނޑުމުގެ ކުރިން ލިބުނު ފައިދާ ވަނީ 2024 ވަނަ އަހަރާ އަޅައިބަލާއިރު %10 އިތުރުވެ، ރެކޯޑް އަދަދެއް ކަމަށްވާ 3.2 ބިލިއަން ރުފިޔާއަށް އަރައިފައެވެ. 

ބީއެމްއެލްއިން މިިދިޔަ އަހަރު ވިޔަފާރިތަކާއި އާއްމު ފަރުދުންނަށް 10 ބިލިއަން ރުފިޔާގެ ލޯނު ވެސް ވަނީ ދޫކޮށްފައެވެ. 

ބޭންކުގެ މާލީ ހިސާބުތަކަށް ލިބުނު ކުރިއެރުމާ ގުޅޭގޮތުން ވާހަކަދައްކަވަމުން ސީއީއޯ އަދި މެނޭޖިން ޑިރެކްޓަރ މުޙައްމަދު ޝަރީފް ވިދާޅުވީ، ނަތީޖާތަކުން ދައްކުވައިދެނީ ބީއެމްއެލްއިން ބޭނުންވާ އަމާޒަށް ވާސިލްވެފައިވާކަން ކަމަށެވެ. 

"2025 ވަނަ އަހަރު ކާމިޔާބު ކަމާއެކު ނިންމާލެވުނުކަމީ އަޅުގަނޑަށް ލިބޭ ވަރަށް ބޮޑު އުފަލެއް. މި ކުއާޓަރގެ ނަތީޖާއިން ދައްކުވައިދެނީ އަޅުގަނޑުމެންގެ އިސްތިރާޖީ އަމާޒަށް ވާސިލްވެފައިވާކަން އަދި އަޅުގަނޑުމެން މުވައްޒަފުންނަށް ދޭ އަހުމިއްޔަތުކަން. ބޭންކުގެ މައިގަނޑު ވިޔަފާރީގެ ދާއިރާތަކުން ހޯދި ކުރިއެރުމާއި، ހަރުދަނާ ރިސްކް މެނޭޖްމަންޓެއްގެ ސަބަބުން، ބޭންކުގެ މާލީ ދުޅަހެޔޮކަން ދަމަހައްޓައި ވަރުގަދަ މާލީ ނަތީޖާއެއް ހާސިލްކޮށް ވަރުގަދަ ބެލެންސް ޝީޓެއް ދެމެހެއްޓިފައިވޭ. ވަކިވަކި ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމަޢުތަކަށް އެހީތެރިކަން ފޯރުކޮށްދިނުމުގައި އަޅުގަނޑުމެން ދެމިތިބޭނަން" ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވިއެވެ.  

ސާފު ފައިދާ ބޮޑުވިއިރު ބީއެމްއެލްއިން ވަނީ މިދިޔަ އަހަރު ޑިޖިޓަލް ކުރިއެރުމާއި ޤައުމީ ތަރައްޤީގެ ރޮނގުން ވެސް ބޮޑެތި ކާމިޔާބީތަކެއް ހޯދައިފައެވެ. އެގޮތުން، 'ގްރީން ރިސޯޓް ފައިނޭންސިންގ' ތައާރަފުކުރުމާއި މިނިސްޓްރީ އޮފް ކޮންސްޓްރަކްޝަން ހައުސިންގ އެންޑް އިންފްރާސްޓްރަކްޗަރ އާއި ގުޅިގެން %5 ގެ ކުޑަ ރޭޓެއްގައި 'ހިޔާވެހި ފައިނޭންސިންގ' ދޫކުރަން ފެށުމާއި ގެދޮރު ގަތުމަށް ދޫކުރާ ލޯނުތަކުގެ އިކުއިޓީ %5 އަށް ދަށްކުރުމުގެ އިތުރުން 'ބީއެމްއެލް އެފޯޑަބަލް ހޯމް ލީސިންގ ޕްރައިވެޓް ލިމިޓެޑް' އުފެއްދުން ހިމެނެއެވެ.

ބީއެމްއެލްގެ ޚިދުމަތްތައް މުޅި ރާއްޖެއަށް ފުޅާކުރުމަށް ރ. ދުވާފަރުގައި ބޭންކުގެ 40 ވަނަ ބްރާންޗް ހުޅުވައި، 'މުޅި ރާއްޖެއަށް ބީއެމްއެލް އޭޓީއެމް' މަޝްރޫއު ނިންމުމާއިއެކު، މީހުން ދިރިއުޅޭ ހުރިހާ ރަށެއްގައި ބޭންކުގެ ޚިދުމަތް ވެސް ވަނީ ޤާއިމުކޮށްފައެވެ. 

ބީއެމްއެލްއިން އަންނަނީ މުޅި ރާއްޖެ ހިމެނޭ ބޭންކިން ވިއުގަޔަކާއެކު 20 އަތޮޅުގައި 42 ބްރާންޗް ހިންގައި 267 އޭޓީއެމްގެ ޚިދުމަތްދެމުންނެވެ.