އަގުބޮޑެތި ކާއެއްޗިހީގެ ވާހަކަ އަކީ އަބަދުވެސް އަޅުގަނޑުމެން އަހަމުންދާ ވާހަކަތަކެކެވެ. ދާދި ފަހުން ޗައިނާގެ މަހުޖަނަކު 6.2 މިިލިޔަން ޑޮލަރަށް ދޮންކެޔޮވަކެއް ގަނެގެން ކާލި ހަބަރު ވެސް އަޅުގަނޑުމެންވާނީ އަހައިފައެވެ.

ނަމަވެސް ނައިޖީރިޔާގެ އައްސޭރިފަށުގެ ރަށެއް ކަމައްވާ އެންޑޮނީގެ އާދައިގެ މަސްވެރިއެއް އޭނާގެ ރައްޓެހިންނަށް 2.6 މިލިޔަން ޑޮލަރުގެ އަގުހުރި ކެއުމެއް ދީފިއޭ ބުނެފި ނަމަ އެ ވާހަކަ ގަބޫލު ކުރަން ތަންކޮޅެއް ދަތިވާނެެއެވެ.  

ގަބޫލުކުރަން ދަތިވިޔަސް ނައިޖީރިޔާގެ މަސްވެރިއެއް މިވަނީ ނޭނގިހުރެ، އޭނާ ބޭނި 2.6 މިލިޔަން ޑޮލަރުގެ އަގުހުރި ހިބަރެއް އޭނާގެ ރައްޓެހިންނާއެކު ކައިފައެވެ. މި މަހުގެ އަގު އޭނާއަށް އެނގުނީ މަހުގެ ފޮޓޯތައް ބައެއް މީހުން މީސް މީޑިޔާގައި ދައުރު ކުރުމުން، އެޔަށްލިބުނު ކޮމެންޓްތަކުގެ ސަބަބުންނެވެ. އެހެންނަމަވެސް އޭނާއަށް ރޭކާލިއިރު ރައްޓެހިންނާއި އަވަށު މީހުންވެގެން ހިބަރު އޮތީ އެއްކޮށް ކައި ހުސްކޮއްލާފައެވެ.

ސީއެންބީސީ އިން މައުލޫމާތު ދޭގޮތުގައި މި ވައްތަރުގެ ހިބަރުގެ އަގު ބައެއްފަހަރު ކިލޯއަކަށް 60 ހާސް ޑޮލަރަށްވުރެ މައްޗައް ވެސް އަރައެވެ. މިއަހަރުގެ އޮގަސްޓު މަހު އެމެރިކާގެ ފްލޮރިޑާގެ މަސްވެރިއެއް ބޭނި މިވައްތަރުގެ ހިބަރެއް ވަނީ އެއް މިލިޔަން ޑޮލަރަށްވުރެ ބޮޮޑު އަގެއްގައި ވިކިފައެވެ.

މިވައްތަރުގެ ހިބަރުގެ އެންމެ ބޮޑުވެގެން 14 ފޫޓަށް ދިގުވާއިރު ބަރުދަނުގައި 1،000 ކިލޯ ހަމަވެއެވެ. އާއްމު ގޮތެއްގައި ފެންނަ މިވައްތަރުގެ ހިބަރުގައި 11 ފޫޓު ހުންނައިރު ބަރުދަނުގައި 150 ކިލޯ ހުރެއެވެ.

ގިިނަ އަދަދަކަށް މާކިއުރީ ހިމެނޭ މި މަހަކީ އާއްމުގޮތެއްގައި ކެއުމުގައި ބޭނުންކުރާ މަހެއްނޫން ނަމަވެސް، ޖަޕާނުގެ ބައެއް ހިސާބުތަކުގައި މި މަސްވެފައިވަނީ ވަރަށް ގަދީމީ އަދި އަގުހުރި މަހެއްގެ ގޮތުގައެވެ. އެމީހުންގެ ސަގާފީ ކެއުމެއް ކަމަށްވާ "ޝަޝީމީ" ހެދުމުގައި މި މަސް ވަރަށް ފުޅާ ދާއިރާއެއްގަ ބޭނުންކުރެއެވެ.

މިމަހަކީ ޕެސިފިކް އަދި އެޓްލާންޓިކް ކަނޑުގައި ކުޅިވަރު މަސްވެރިކަމުގައި އުޅޭފަރާތްތަކުން ބޭނުމަށް ވަރަށް ޝައުގުވެރިވާ މަހެކެވެ.

މިބާވަތުގެ ހިބަރު ބާނާ ފަރާތްތަކަށް ފައިސާގެ ބޮޑެތި އިނާމުތައް ހުށަހެޅިފައިވާ މުބާރާތްތައް ކޮންމެ އަހަރަކުވެސް ޕެސިފިކް އަދި އެޓްލާންޓިކް ކަނޑުގެ ގައުމުތަކުގައި ބާއްވައެވެ.

 މޫދުގައި ހަރަކާތްތައް ހަލުވި، މި މަސްވެފައިވަނީ ބޭނުމަށް އުނދަގޫ މަހެއްގެ ގޮތުގައެވެ.