މާލެ ސިޓީގެ ކުރިމަގާމެދު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ގެންގުޅުއްވާ ތަސައްވުރު ހަގީގަތަކަށް ހެދޭނީ މާލެ ސިޓީގެ މޭޔަރުކަމަށް ޕީޕަލްސް ނޭޝަނަލް ކޮންގްރެސްގެ ފަރާތުން ވާދަކުރައްވާ މޫސާ އަލީ ޖަލީލު އިންތިހާބުކޮށްގެން ކަަމަށް ދިވެހިރާއްޖެއިން ޖަޕާނަށް ކަނޑައަޅާފައި ހުންނަވާ ސަފީރު އަހްމަދު މަހުލޫފު ވިދާޅުވެއްޖެއެވެ. 

ގަލޮޅު ދެކުނު ދާއިރާގެ ކައުންސިލަރުކަމަށާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުކަމަށް ވާދަކުރައްވާ ކޮންގްރެސް ޕާޓީގެ ކެނޑިޑޭޓުންނަށް ތާއީދު ހޯދުމަށް ކުރިއަށްގެންދިޔަ "ދޮރުން ދޮރަށް" ހަރަކާތުގައި ރައީސް ޑރ.މުޢިއްޒާއެކު ބައިވެރިވެވަޑައިގަތުމަށް އެ ސަރަހައްދުގައި ހުންނަވައި އެމްއެމްޓީވީއަށް ދެއްވި ބަސްދީގަތުމުގައި މަހުލޫފުވަނީ ސަރުކާރާ އެއް ވިސްނުމެއްގަައި މަސައްކަތްކުރާ ކައުންސިލަރުން އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުން އިންތިހާބުކުރުމުގެ މުހިއްމު ކަމުގެ މައްޗަށް ވާހަކަދައްކަވާފަައެވެ. 

މަހުލޫފު ވިދާޅުވީ ސަރުކާރާ ވިސްނުން އެއްގޮތް ބޭފުޅުން ކައުންސިލުތަކުގައި ތިއްބެވުމަކީ ސަރުކާރުގެ މަސައްކަތްތަކަށް ވަރަށް ބޮޑަށް ފަސޭހަވާ ކަމެއް ކަމަށެވެ. އަދި ބައެއްފަހަރު ސަރުކާރާ ވިސްނުން ތަފާތު ބޭފުޅުން ކައުންސިލުތަކަށް ވަޑައިގެން މަސައްކަތްކުރަނީ ސަރުކާރުގެ ވިސްނުންތަކާ ދެކޮޅަށް ކަމަށެވެ. 

"އަޅުގަނޑު މީގެ ކުރިން ސްޕޯޓްސް މިނިސްޓަރަކަށް ހުރިއިރު އެބަހުރި އެކަހަލަ ބައެއް ކަންކަން ދިމާވެފައި. ސަރުކާރުން އެބޭނުންވާ ކަންކަން ކުރުމަށް ދަތިތަކެއް ދިމާވެފައި،" މަހުލޫފު ވިދާޅުވިއެވެ. 

މަހުލޫފު ވިދާޅުވި ގޮތުގައި ބައެއް ކައުންސިލަރުން އަމިއްލަ ވިސްނުންތަކެއް އިސްކުރި ނަމަވެސް ފައިސާއާއި ވަސީލަތްތައް ހަމަޖެހިގެންދަނީ ދައުލަތުގެ ބަޖެޓުން އެއިރެއްގައި އޮންނަ ސަރުކާރަކުން ކަންކަން ހަމަޖައްސައިދިނުމުންނެވެ. 

އަދި ކައުންސިލުތަކަށް ފައިސާ ހަމަޖެހެނީ ދައުލަތުގެ ބަޖެޓުން ސަރުކާރު މެދުވެރިވެގެންކަމަށްވާތީ އެ ފައިސާ ސަރުކާރުގެ ތަސައްވުރާ އެއްގޮތަށް ބޭނުންކުރުމަކީ ކަންކަން ފަސޭހަވާނެ ކަމެއް ކަމުގައި ސަފީރު ވިދާޅުވިއެވެ. 

މިއަދު ރައީސް ދޮރުން ދޮރަށް ޒިޔާރަތްކުރެއްވި ގަލޮޅު ދެކުނު ދާއިރާއަކީ 2009 ވަނަ އަހަރުން ފެށިގެން 2019 ވަނަ އަހަރާ ހަމައަށް މަހުލޫފު ރައްޔިތުންގެ މަޖިލީހުގައި ތަމްސީލުކުރެއްވި ދާއިރާއެވެ. އޭގެ ފަހުން އޭނާވަނީ ޒުވާނުންނާއި ކުޅިވަރާ ބެހޭ ވަޒީރުކަން ކުރައްވާފައެވެ.