ފްލެޓާއި ބިން ލިބޭނެ ކަމަށް ބުނެ، އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާގެ ނަމުގައި ފައިސާ ނަގަމުންދާކަމަށާއި، އެކަމުގައި އާންމުން ސަމާލުވުމަށް އެ ވުޒާރާއިން އިލްތިމާސްކޮށްފިއެވެ. 

އެ ވުޒާރާއިން މިއަދު އާންމުކުރި ބަޔާނުގައި ބުނީ، ސަރުކާރުން ހިންގާ ބޯހިޔާވަހިކަމުގެ މަޝްރޫޢުތަކުގެ ތެރެއިން، ބިންވެރިޔާ ސްކީމްގެ ދަށުން ދޫކުރާ ގޯއްޗާއި ގެދޮރުވެރިޔާ ސްކީމްގެ ދަށުން ސޫކުރާ ފްލެޓް ލިބޭނެކަމަށް ބުނެ، ބައެއް ފަރާތްތަކުން އާންމުން އަތުން ފައިސާ ނަގަމުންދާ ކަމުގެ މަޢުލޫމާތު ވުޒާރާގެ ސަމާލުކަމަށް އައިސްފައިވާ ކަމަށެވެ. 

ބަޔާނުގައި ބުނީ، ބޯހިޔާވަހިކަމުގެ ހުރިހާ މަޝްރޫޢުތަކެއްގައި ވެސް ގޯއްޗާއި ފްލެޓު ދިނުމުގެ މަސައްކަތް ކުރިއަށްގެންދާނީ ދިވެހި ސަރުކާރުގެ ގެޒެޓުގައި ޝާޢިއުކޮށް، އާންމުކޮށްފައިވާ އުޞޫލުތަކާއި އެއްގޮތަށް ކަމަށެވެ. އަދި، އެފަދަ އުޞޫލަކާ ޚިލާފަށް އެއްވެސް ފަރާތަކަށް ބޯހިޔާވަހިކަމުގެ އެއްވެސް މަޝްރޫޢަކުން ގޯއްޗާއި ފްލެޓް ލިބުމުގެ ފުރުޞަތެއް ނޯންނާނެ ކަމަށް ބަޔާނުގައި ބުނެފައިވެއެވެ. 

ސަރުކާރުގެ ގެޒެޓުގައި އާއްމުކޮށްފައިވާ އުޞޫލެއް ނުވަތަ އިޢުލާނެއްގައި ބަޔަންކޮށްފައިވާ ކަންތައްތަކުގެ ބޭރުން ގޯއްޗާއި ފްލެޓް ހޯދުމަށް އެއްވެސް ފަރާތަކުން އެއްވެސް މުޢާމަލާތެއް ކޮށްފިނަމަ، ނުވަތަ އެފަދަ މަޢުލޫމާތެއް ލިބިއްޖެނަމަ ލަސްނުކޮށް ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރުގެ ހޮޓްލައިން ނަންބަރު 125 ގުޅައި ރިޕޯޓްކުރުމަށް އެ ވުޒާރާއިން ވަނީ އެދިފައެވެ. 

ބޯހިޔާވަހިކަމުގެ މަޝްރޫޢުތަކުގައި މީގެކުރިން ވެސް މިފަދަ ސްކޭމްތައް ހިންގައި ގިނަ އަދަދެއްގެ ފައިސާ އާންމު ރައްޔިތުން އަތުން ވަނީ ފޭރިގެންފައެވެ. މިފަދަ ކޮންމެ ސްކީމެއް އާންމުކުރާ ފަހަރުތަކުގައި، އާންމުން އެފަދަ ކަންކަމަށް ސަމާލުވުމަށް އިދާރާތަކުން އަބަދުވެސް އަންނަނީ ހަނދާންކޮށްދެމުންނެވެ.