ރައީސުލްޖުމްހޫރިއްޔާ ޑރ.މުޙައްމަދު މުޢިއްޒަށްވުރެ ބޮޑަށް ލާމަރުކަޒީ ނިޒާމު ދެނެވަޑައިގަންނަަވާ އެ ނިޒާމު ހިންގަވަން އެނގިވަޑައިގަންނަވާނެ ބޭފުޅަކު ސިޔާސީ ލީޑަރުންގެ ތެރޭގައި ނެތްކަމަށް މާލީ އަދި ތަރައްގީގެ ރޭވުންތެރިކަމާ ބެހޭ ވަޒީރު މޫސާ ޒަމީރު ވިދާޅުވެއްޖެއެވެ. 

ޒަމީރު މިފަދައިން ވިދާޅުވީ ގަލޮޅު ދެކުނު ދާއިރާގައި ޕީއެންސީން މިއަދު ކުރިއަށްގެންދިޔަ ދޮރުން ދޮރަށް ހަރަކާތުގައި ރައީސްގެ އަރިހުގައި ބައިވެރިވަޑައިގަތުމަށް އެ ސަރަހައްދަށް ވަޑައިގެން ހުންނަވައި އެމްއެެމްޓީވީއަށް ދެއްވި ބަސްދީގަތުމެއްގައެވެ. 

ޒަަމީރު ފާހަގަކުރެއްވި ގޮތުގައި އެމްޑީޕީއަކީ ރައްޔިތުންނަށް ހިދުމަތްކުރަން އެ ޕާޓީއަށް ލިބޭ ފުރުސަތުތަކުގައި އެކަށީގެންވާ ގޮތުގައި ރައްޔިތުންނަށް ހިދުމަތްކޮށްދެވިފައިވާ ޕާޓީއެއް ނޫނެވެ. އެގޮތުން 2013 އިން 2018 އަށް އޮތް ސަރުކާރުގައި ރާއްޖޭގެ ވަރަށް ގިނަ ކަންކަން ރަނގަޅުކުރެވިފައި އޮއްވައި 2018 އިން 2023 އަށް އެމްޑީޕީން ކުރި ވެރިކަމުގައި ރާއްޖޭގެ ކަންކަން އަނެއްކާވެސް ފަހަތަށް ސޮއްސާލައި ވަރަށް ގިނަ ކަންކަން ބޮއްސުންލައިގެން ގޮސްފައިވާ ކަމަށް ވަޒީރު ވިދާޅުވިއެވެ. 

"ރައީސް މުޢިއްޒަކީ ރާއްޖޭގެ ހަޔާތުގައި ރައްޔިތުންގެ ތަރައްގީއަށްޓަކައި ލާމަރުކަޒީ ނިޒާމުގެ ތެރެއިން އެންމެ ގިނަ މަސައްކަތްކުރެއްވި އަދި އެންމެ ތަޖުރިބާކާރުވެސް ބޭފުޅާ. ރާއްޖޭގެ އެންމެ ބޮޑު ސިޓީގެ މޭޔަރުކަން ކުރައްވައި، އެހާ ގިނަ ހިދުމަތްތަކެއް ދެއްވައި މާލެ ސިޓީގެ ކަންކަން އެހާ ރަނގަޅަށް ބެލެހެއްޓެވި ބޭފުޅެއް،" ޒަމީރު ވިދާޅުވިއެވެ. 

ލާމަރުކަޒުކޮށް ވެރިކަންކުރެއްވުމުގެ ގޮތުން ރައީސް ރާއްޖޭގެ ހުރިހާ ރަށަކަށް ޒިޔާރަތްކުރައްވައި ރައްޔިތުންނާ ބައްދަލުކުރައްވަައި އެ ރައްޔިތުންގެ ހިޔާލުތައް ނޯޓުކުރައްވައިގެން ސަރުކާރުގެ ވުޒާރާތަކުގެ ތެރެެއިން އެ ރައްޔިތުން އެދޭ ގޮތަށް ކަންކަން ބައްޓަންކޮށްދެއްވަައި މަޝްރޫއުތައް ހިންގަވައިދެއްވަމުންދާކަން ޒަމީރު ފާހަގަކުރެއްވިއެވެ. 

"ކޮން ސަރުކާރަކަށްތޯ ކެރެނީ އެގޮތަށް ރައްޔިތުންނާ ބައްދަލުކޮށް، ހިޔާލު ހޯދައިގެން ތަރައްގީގެ ކަންކަން ކުރިއަށްގެންދަން؟ ދުވަހަކުވެސް ރާއްޖޭގެ ޑިމޮކްރެޓިކް ހަޔާތުގައި ވެފައި އޮތްކަމެއް ނޫން އެއީ. އެހެންވީމާ ލާމަރުކަޒީ ނިޒާމު އެންމެ ބޮޑަށް އެނގިވަޑައިގަންނަވާ އެންމެ ރަނގަޅަަށް ހިންގަވާ ބޭފުޅަކީ ރައީސް ޑރ.މުޢިއްޒު،" ޒަމީރު ވިދާޅުވިއެވެ. 

ޒަމީރު އިތުރަށް ވިދާޅުވީ ގިނަ ކައުންސިލުތައް ޒިންމާދާރުކަމާއެކު މަސައްކަތްކުރި ނަމަވެސް އެމްޑީޕީގެ އަޣުލަބިއްޔަތު އޮންނަ ބައެއް ކައުންސިލުތަކުން ސިޔާސީ ވިސްނުމުގައި ސަރުކާރުން ހިންގަން ބޭނުންވާ ތަރައްގީގެ ކަންކަމަށް ހުރަސްއެޅުމަށް މަސައްކަތްކުރަމުންދާ ކަމަށެވެ. 

އެ ސަބަބަށްޓަކައި ކުރިއަށް އޮތް ލޯކަލް ކައުންސިލު އިންތިހާބުގައި ހޮވަންވީ ޕީއެންސީ ކައުންސިލުތައް ކަމަށާއި، ޖަވާބުދާރީކުރުވުމުގެ ވިސްނުމުގައި އެމްޑީޕީގެ ކައުންސިލުތައް ހިދުމަތް ދިނުމުގައި ފަސްޖެހި ސަރުކާރުން ކުރާ މަސައްކަަތްތަކަށް ހުރަސްއަޅާނެކަން ތަޖުރިބާއިން ފެނިވަޑައިގެންފައިވާ ކަމަށް ޒަމީރު ވިދާޅުވިއެވެ.