މި އަހަރުގެ ފުރަތަމަ 21 ދުވަސް ތެރޭ ރާއްޖެއަށް 149،447 ފަތުރުވެރިން އައިއިރު އެ ފަތުރުވެރިންގެ 69 އިންސައްތަ މީހުން ދިޔައީ ރިސޯޓުތަކަށްކަން ފަތުރުވެރިކާއި ތިމާވެއްޓާ ބެހޭ ވުޒާރާއިން ހާމަކޮށްފިއެވެ. 

އެ ވުޒާރާއިން ޝާއިއުކޮށްފައިވާ ތަފާސްހިސާބުތަކަށް ބަލާއިރު މި އަހަރުގެ ޖަނަވަރީ އެއްވަނަ ދުވަހުން ފެށިގެން 21 ވަނަ ދުވަަހުގެ ނިޔަލަށް ރާއްޖެއަށް އައިސްފައިވަނީ 149،447 ފަތުރުވެރިންނެވެ. އެއީ ނިމުނު އަހަރުގެ އެ މުއްދަތުގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދާ އަޅާބަލާއިރު 7.0 އިންސައްތައިގެ އިތުރުވުމެކެވެ. 

ފާހަގަކޮށްލެވޭ ގޮތުގައި ރާއްޖެއަށް މި މުއްދަތުގައި އައި ފަތުރުވެރިންގެ ތެރެއިން 103،067 މީހުން ޒިޔާރަތްކުރީ ރިސޯޓުތަކަށެވެ. އެއީ ޖުމްލަ ފަތުރުވެރިންގެ 69 އިންސައްތަ މީހުންނެވެ. އަދި ގެސްޓުހައުސްތަކަށް 39،003 ފަތުރުވެރިން ޒިޔާރަތްކުރިއެވެ. އެއީ އެ މުއްދަތުގައި ރާއްޖެެއަށް އައި ފަތުރުވެރިންގެ 26.1 އިންސައްތަ މީހުންނެވެ. 

ރާއްޖެއަށް އައި ފަތުރުވެރިންގެ 98.7 އިންސައްތަ މީހުން އައީ ވެލާނާ އިންޓަނޭޝަނަލް އެއާޕޯޓު މެދުވެރިކޮށެވެ. އަލަށް ތަރައްގީކޮށް ބައިނަލްއަގުވާމީ ފެންވަރަށް ތައްޔާރުކޮށްފައިވާ ހަނިމާދޫ އިންޓަނޭޝަނަލް އެއާޕޯޓަށް 428 ފަތުރުވެރިން އައިސްފައިވެއެވެ. އަދި މާފަރު އެއާޕޯޓަށް 540 ފަތުރުވެރިން އަދި ގަން އިންޓަނޭޝަނަލް އެއާޕޯޓަށް 445 ފަތުރުވެރިން އައިސްފައިވެއެވެ. 

އަހރުގެ މިހާތަނަށް ރާއްޖެއަށް އެންމެ ގިނައިން އައީ ރަޝިޔާ ފަތުރުވެރިންނެވެ. އެ ގައުމުން 21،798 ފަތުރުވެރިން އައިސްފައިވާއިރު އެމީހުންގެ 78.5 އިންސައްތަ މީހުން އައީ ރިސޯޓުތަކަށެވެ. އަދި 18.6 އިންސައްތަ މީހުން ގެސްޓުހައުސްތަކަށް އައިސްފައިވެއެވެ. 

ދެވަނައަށް އެންމެ ގިނައިން އައީ އިޓަލީވިލާތުގެ ފަތުރުވެރިންނެވެ. އެ ގައުމުން ރާއްޖެއަށް ޒިޔާރަތްކުރި 16،364 ފަތުރުވެރިންގެ ތެރެއިން 60.6 އިންސައްތަ މީހުން ރިސޯޓުތަކަށް ދިޔައިރު 34.4 އިންސައްތަ މީހުން ދިޔަައީ ގެސްޓުހައުސްތަކަށެވެ. 

އަދި ތިންވަނައަށް އެންމެ ގިނައިން ފަތުރުވެރިން އައި ގައުމުކަމަށްވާ އިނގިރޭސިވިލާތުން ރާއްޖެއަށް އައި 13،147 ފަތުރުވެރިންގެ ތެރެއިން 84 އިންސައްތަ މީހުން ދިޔައީ ރިސޯޓުތަކަށެވެ. އަދި ގެސްޓުހައުސްތަކަށް ދިޔައީ 11.8 އިންސައްތަ މީހުންނެވެ.