ރާއްޖޭގެ މައި އެއާޕޯޓުކަމުގައިވާ ވެލާނާ އިންޓަނޭޝަނަލް އެއާޕޯޓުގައި ނިމުނު އަހަރު 249،214 އެއާ ޓްރެފިކް މޫވްމެންޓު ރެކޯޑުކުރެވިފައިވާއިރު، އެއާޕޯޓުން އަށް މިލިއަނަށްވުރެ ގިނަ ފަސިންޖަރުންނަަށް ހިދުމަތް ދީފައިވާކަމަަށް އެ އެއާޕޯޓުން ބުނެފިއެވެ. 

ވީއައިއޭއިން އާއްމުކޮށްފައިވާ ތަފާސްހިސާބުތަަކަށް ބަލާއިރު ނިމުނު އަހަރު 34،868 އިންޓަނޭޝަނަލް އެއާ ޓްރެފިކް މޫވްމެންޓޫ ނުވަތަ ފުލައިޓު އެއާޕޯޓަށް އައިސް ގޮސްފައިވެއެވެ. އަދި ޑޮމެސްޓިކް އެއާ މޫވްމެންޓުގެ ގޮތުގައި 28،348 ޓްރެފިކް މޫވްމެންޓު އަދި ސީޕްލޭން އެއާ މޫވްމެންޓުގެ ގޮތުގައި 185،998 މޫވްމެންޓު ރެކޯޑުކުރެވިފައިވެއެވެ. 

އެއާ މޫވްމެންޓަކީ އެއާޕޯޓަށް ޖެއްސި އަދި އެއާޕޯޓުން ފުރި ފުލައިޓުތަކުގެ ޖުމްލަ އަދަދެވެ. 

އެއާ މޫވްމެންޓުގެ ތަފާސްހިސާބުގެ އިތުރަށްް އެއާޕޯޓުން ހިދުމަތް ދިން ފަސިންޖަރުންގެ އަދަދުވެސް އެއާޕޯޓުން އާއްމުކޮށްފައިވެއެވެ. އެގޮތުން އިންޓަނޭޝަނަލް ޓާމިނަލުން 5.38 މިލިއަން ފަސިންޖަރުންނަށް ހިދުމަތް ދިންއިރު، ޑޮމެސްޓިކް ޓާމިނަލުން 1.17 މިލިއަން ފަސިންޖަރުންނަށް އަދި ސީޕްލޭން ޓާމިނަލުން 1.73 މިލިއަން ފަސިންޖަރުންނަށް ހިދުމަތް ދީފައިވެއެވެ. 

މި ހިސާބުތަކަށް ބަލާއިރު ނިމުނު އަހަރު ޖުމްލަ 8.28 މިލިއަން ފަސިންޖަރުންނަށް ވެލާނާ އިންޓަނޭޝަނަލް އެއާޕޯޓުން ހިދުމަތް ފޯރުކޮށްދީފައިވެއެވެ. 

ވީއައިއޭގެ ރެކޯޑުތަކުން ދައްކާ ގޮތުގައި ނިމުނު އަހަރުގެ ޑިސެންބަރު 28 ވަނަ ދުވަހަކީ ފުރޮޅުލީ މަތިންދާބޯޓުގައި ދަތުރުކުރި އެންމެ ގިނަ ފަސިންޖަރުންނަށް އެއާޕޯޓުން ހިދުމަތް ދިން ދުވަހެވެ. އެ ދުވަހު ފޮރޮޅުލީ މަތިންދާބޯޓުގައި ދަތުރުކުރި 27،381 ފަސިންޖަރުންނަށް ހިދުމަތް ދިނެވެ.

ސީޕްލޭނުގައި ދަތުރުކުރި އެންމެ ގިނަ ފަސިންޖަރުންނަށް ވީއައިއޭއިން ހިދުމަތް ދިން ދުވަހަކީ 16 ފެބްރުއަރީ 2025 ވަނަ ދުވަހެވެ. އެ ދުވަހު ސީ ޕްލޭނުގައި ދަތުރުކުރި 7،439 ފަސިންޖަރަކަށް އެއާޕޯޓުން ހިދުމަތް ފޯރުކޮށްދީފައިވެއެވެ. 

ނިމުނު އަހަރު ވީއައިއޭގެ އައު ޓާމިނަލް ބޭނުންކުރަން ފަށައި، އަހަަރު ނިމުމުގެ ކުރިން ރާއްޖެއަށް ދަތުރުކުރާ ހުރިހާ އެއާލައިނަކަށް އެ ޓާމިނަލުން ހިދުމަތް ދޭންވަނީ ފަށާފައެވެ. އެއާއެކު އެއާޕޯޓު ބޭނުންކުރާ ދަތުރުވެރިންނަށް ފޯރުކޮށްދޭ ހިދުމަތުގެ ފެންވަރުވަނީ ވަރަށް ބޮޑަށް ރަނގަޅުކުރެވިފައެވެ.