ދިވެހިރާއްޖޭގެ މީހުން ދިރިއުޅޭ ރަށްރަށުގައި ކުޅިވަރުގެ ވަސީލަތްތައް ތަރައްޤީކުރުމުގެ މަޝްރޫއުގެ ދަށުން، 17 ރަށެއްގައި ކުޅިވަރު ވަޞީލަތްތައް ގާއިމުކުރުމަށް ސިފައިންގެ ވެލްފެއާ ކުންފުނިކަމަށްވާ ސިވެކްއާ ހަވާލުކޮށްފި އެވެ.

ކުޅިވަރާބެހޭ ވުޒާރާއިން ބުނީ، ސިފައިންގެ ވެލްފެއާ ކުންފުނި (ސިވެކް)އާ އެކު އެއްބަސްވުމުގައި ސޮއި ކޮށްފައިވަނީ 17 ރަށެއްގައި ކުރިއަށްގެންދިއުމަށް ހަމަޖެހިފައިވާ 20 ކުޅިވަރު މަޝްރޫޢުތަކެއްގައި ކަމަށެވެ.

މި އެއްބަސްވުމުގައި، އެ ވުޒާރާގެ ފަރާތުން ސޮއި ކުރެއްވީ ސްޓޭޓް މިނިސްޓަރު މުޙައްމަދު ދިލްޝާން ޢަބްދުﷲ އެވެ. އަދި ސިވެކްގެ ފަރާތުން ސޮއިކުރައްވީ އެ ކުންފުނީގެ މެނޭޖިން ޑިރެކްޓަރ ކާނަލް އަޙުމަދު ޒުބެއިރު އެވެ.

ރާއްޖޭގެ އާބާދީއަކީ ހަށިހެޔޮ، ދުޅަހެޔޮ އާބާދީއަކަށް ހެދުމުގެ މަގުސަދުގައި ސަރުކާރުން ގެންދަވަނީ ރާއްޖޭގެ ހުރިހާ ހިސާބެއްގައި ކުޅިވަރުގެ މަޝްރޫޢުތައް ހިންގަމުންނެވެ.