ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ފުރަތަމަ ދެ އަހަރު، ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއަށް ލިބުނު އެންމެ ބޮޑު ކާމިޔާބީއަކީ ދިވެހިރާއްޖެ މަސްތުވާތަކެތިން ސަލާމަތްކުރުމަށްޓަކައި ކުރެވުނު ބޮޑު މަސައްކަތްތައް ކަމަށް ވަޒީރު ޢަލީ އިޙްސާން ވިދާޅުވެއްޖެއެވެ. 

ވަޒީރު މިފަދައިން ވިދާޅުވީ ސަރުކާރުގެ ފުރަތަމަ ދެއަހަރުގެ ކާމިޔާބީއާ ގުޅޭގޮތުން އެމްއެމްޓީވީއަށް ދެއްވި ބަސްދީގަތުމެއްގަ އެވެ. 

މަސްތުވާތަކެތިން ރާއްޖެ ސަލާމަތްކުރުމަށްޓަކައި، އެންމެ ފުރަތަމަ ކުރެވުނު ބޮޑު މަސައްކަތަކީ ސަޕްލައި ރެޑިއުސް ކުރުމުގެ މަސައްކަތް ކަމަށް ވަޒީރު ވިދާޅުވިއެވެ. 

ވަޒީރު ވިދާޅުވީ، މިހާތަނަށް ކޮށްފައިވާ މަސައްކަތުން، މަސްތުވާތަކެއްޗާ ގުޅޭ މައްސަލަތައް ބަލައި އެމީހުންގެ މައްޗަށް ދަޢުވާކުރަން ކުރަން ފޮނުވާފައިވާނެ ކަމަށެވެ. 

ޑްރަގް ވިޔަފާރީގައި ބައިވެރިވާ ފަރާތްތަކާ ދެކޮޅަށް ނޮވެމްބަރު 13 ވަނަ ދުވަހު ފެށި ޚާއްޞަ އޮޕަރޭޝަނާ ގުޅޭގޮތުން ވަޒީރު ޢަލީ އިޙްސާން ވިދާޅުވީ، އޮޕަރޭޝަނުގައި ގިނަ ބަޔަކު ހައްޔަރުކޮށް އެމީހުންގެ އަތުގައި ހުރި މަސްތުވާތަކެއްޗާއި އެވިއްކަން ބޭނުންކުރި ސާމާނު އަދި ފައިސާ އަތުލާފައިވާނެ ކަމަށެވެ. 

ޑްރަގާ ދެކޮޅަށް ސަރުކާރުން ފެށި ބޮޑު އޮޕަރޭޝަނާ ގުޅޭގޮތުން ވަޒީރު ޢަލީ އިޙްސާން މީގެކުރިން ވިދާޅުވީ، މަސްތުވާތަކެއްޗާއި ދެކޮޅަށް ދައުލަތުން ކުރަމުން އަންނަ މަސައްކަތް ހުއްޓާލާނީ އެ ވަބާ މުޅީން ނައްތާލުމަށް ފަހު ކަމަށާ އެކަމަށް ކުޑަވެސް ފުރުސަތެއް މި ޤައުމުން ދެން ނޯންނާނެ ކަމަށެވެ. 

"ދެން ޖެހޭނީ މިކަން ހުއްޓާލަން. މިއަދަށް ފަހު ދެން އެ ފުރުޞަތެއް ނުދޭނަން. އެދޭ އެދުމަކީ މިކަމުގައި އުޅޭ ކުދިންވެސް އެހެން ކަމަކާއިގެން އުޅެން ފަށަން. އެކުދިންނަށް އުޅެން އުނދަގޫކުރާނަން" ނޮވެމްބަރު 13 ވަނަ ދުވަހު ފެށި އޮޕަރޭޝަނާ ގުޅޭގޮތުން ދެއްކެވި ވާހަކައިގައި ވަޒީރު ވިދާޅުވިއެވެ. 

މަސްތުވާތަކެއްޗާ ދެކޮޅަށް ސަރުކާރުން ކާމިޔާބު މަސައްކަތްތަކެއް ކުރަމުން އަންނައިރު، މިހާރު ފަށާފައިވާ އޮޕަރޭޝަނަކީ ނަތީޖާ ނެރޭނެ އޮޕަރޭޝަނެއް ކަމަށް ވަޒީރު ޢަލީ އިޙްސާން ވިދާޅުވި އެވެ.