ބަނޑުހައިހޫނުކަމުގެ ހަޅުތާލު ކުރާ ކަމަށް ބުނި އެމްޑީޕީ މީހުން ކާން ފަށައިފި އެވެ.

ބަނޑުހައިހޫނުކަމުގެ ހަޅުތާލެއް ފެށީ މި މަހުގެ ތިންވަނަ ދުވަހުގެ ރޭ އެމްޑީޕީން ހަމަނުޖެހުން ހިންގި މުޒާހަރާއިން ހައްޔަރުކުރި މީހުންނެވެ.

ފުލުހުން ވެސް ވަނީ އެ މީހުން  ބަނޑުހައިހޫނުކަމުގެ ހަޅުތާލެއް ކުރާ ކަމަށް ބުނާތީ އެކަން ޢާންމުންގެ ސަމާލު ކަމަށް ގެނެސްފަ އެވެ. މިރޭ އެ މުއައްސަސާއިން ނެރުނު ބަޔާނުގައި ބުނީ އެކަން ޕްރޮފެޝަނަލް ސްޓޭންޑާސް ކޮމާންޑުން މޮނިޓަރު ކުރަމުންދާ ކަމަށާ އަދި އެ މައުލޫމާތު ނެޝަނަލް އިންޓަގްރިޓީ ކޮމިޝަނާއި ހިއުމަންރައިޓްސް ކޮމިޝަންގެ ސަމާލު ކަމަށް ގެނެސްފައިވާ ކަމަށެވެ.

ނަމަވެސް ފުލުހުން މިރޭ ފަހުން ބުނީ އެ މީހުން މިހާރު ކާން ފަށާފައިވާ ކަމަށެވެ.