މުރަނގަ ފަތަކީ ދިވެހިންނަށް އައު އެއްޗެއް ނޫންކަން ހަމަ ޔަޤީނެވެ. ދިވެހިން އާންމުކޮށް ކައިބޮއެ އުޅޭ ތަކެތީގެ ތެރޭގައި މުރަނގަ ފަތް ހިމެނެއެވެ.

މުރަނގަ ފަތުގައި ހިމެނޭ އެންޓިއޮކްސިޑެންޓްތަކުގެ ސަބަބުން ސިކުނޑީގެ ދުޅަހެޔޮކަމަށް އާރޯކަން ގެނުވައެވެ.

މުރަނގަ ފަތަކީ ޕްރޮޓީން އަދި ކެލްޝިއަމް ފަދަ އެތައް މިނަރަލްތަކަކުން މުއްސަނދި ފަތެކެވެ. މީގެ ސަބަބުން މުރަނގަ ފަތް ސްޓްރެސް ރިލީވް ކުރުމަށް އެހީވެދެއެވެ. މީގެ އިތުރުން މުރަނގަ ފަތުގައި އެކުލެވޭ ތަފާތު ވިޓަމިންގެ މާއްދާތަކުން ކެންސަރުން ހަށިގަނޑު ސަލާމަތްކޮށްދެއެވެ. އަދި ލޭ މައްޗަށް ދިޔުމާއި ކޮލެސްޓްރޯލް ފަދަ ބަލިތަކުން ހަށިގަނޑު ދިފާޢުކުރުމުގެ ޤާބިލުކަން މުރަނގަ ފަތުގައި އެކުލެވިގެންވެއެވެ. ތަފާތު އިންފްލެމޭޝަންތަކުން ހަށިގަނޑު ރައްކާތެރިކުރުމަށްޓަކައި މުރަނގަ ފަތަކީ ރަނގަޅު ކާނާއެކެވެ.

މީގެ އިތުރުން މުރަނގަ ފަތަކީ ހަންގަނޑު ރީތިކޮށް ބެހެއްޓުމަށްޓަކައި ހަމައެއްވަނައޭ ބުންޏަސް ދޮގަކަށްނުވާނެއެވެ. މުރަނގަ ފަތުގައި ހިމެނޭ ގިނަ އަދަދެއްގެ ވިޓަމިން ސީ އަދި ކޭ، ހަންގަނޑުގެ ކުލަ އަލިކޮށް ހަންގަނޑު އަވަހަށް މުސްކުޅިވިޔަ ނުދީ ހިފަހައްޓައެވެ.

ދިރާސާތަކުން ދައްކާ ގޮތުގައި ދުވާލަކު 1 ސައި ސަމުސާ މުރަނގަ ފަތުގެ ފުއް ފެންތަށްޓަކަށް އަޅައިގެން ބުއިމަކީ ދުޅަހެޔޮ ސިއްޙަތެއް ލިއްބައިދޭ ކަމެކެވެ.

މިއީ އަހަރެމެންނާ ރައްޓެހި އަދި އެހާމެ ގިނަ ފައިދާތަކެއް އެކުލެވިގެންވާ ފަތެކެވެ.