އެމްޑީޕީން ފެނާއި ނަރުދަމާގެ ނިޒާމު ގާއިމުކޮށްފައި އޮތް އެއްވެސް ރަށެއްގައި އެ ހިދުމަތް ބޭނުން ނުކުރެވޭކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އަދި މަޖިލީހުގެ މެޖޯރިޓީ ލީޑަރު އިބްރާހީމް ފަލާހު ވިދާޅުވެއްޖެއެވެ.

ފަލާހު ވިދާާޅުވީ ނަރުދަމާއަކީ ބިމުގެ އަޑީގައި ހޮޅިތަކެއް އަޅައިގެން ގުޅަލާ ނިޒާމަކަށް ވާއިރު، އެމްޑީޕީން މި މަސަތްކަތްކުރިޔަށް ގެންދިޔަ އިރު އަޅާފައި ހުރީ ފީވެފައިވާ ހޮޅިކަމަށެވެ.

ފަލާހު ވިދާޅުވި ގޮތުގައި ހޮޅިތަކެއް ވަޅުލާފައި ހުއްޓަސް، ހޮޅިތަކުގެ ފެންވަރު ދަށްވުމުގެ ސަބަބުންނާއި އަވަހަށް ހިޅުތައް ހަލާކުވާތީ ފެނާއި ނަރުދަމާގެ ހިދުމަތް ދެވޭނެ އެއްވެސް ގޮތެއް ނެތެވެ. 

ސައިކަލެއް ދުއްވާލިޔަސް އަޑީގައި ހުރި ހޮޅިތައް ބިންދައިގެންދާކަން ފަލާހު ފާހަގަ ކުރެއްވިއެވެ.

އެހެންކަމުން މިއިން އެއްވެސް ރަށެއްގައި ހަގީގަތުގައި ނަރުދަމާގެ ހިދުމަތެއް ދެވެންނެއް ކަމަށްވެސް އޭނާ ވިދާޅުވިއެވެ.

ފަލާހު އިތުރަށް ވިދާޅުވީ، އެމްޑީޕީއަށް ނިސްބަތްވާ ބޭފުޅަކު ހަދައިގެން އުޅޭ ހޮޅި ފެކްޓަރީއަކުން އެމްޑީޕީއިން ކުރިޔަށް ގެންދިޔަ ފެނާ ނަރުދަމާގެ މަޝްރޫތަކަށް ހޮޅި ސަޕްލައި ކުރިކަމަށެވެ. 

އަދި މިބޭނުން ކުރި ހޮޅިތަކަކީ ކޮލިޓީދަށް ހޮޅިތަކަށް ވުމުން ފެނާއި ނަރުދަމާ ނިޒަމުގައި އެތަކެއް މައްސަލައެއް ދިމާވެފައިވާކަން ފަލާހު ފާހަގަކުރެއްވިއެވެ.

ފެނާއި ނަރުދަމާގެ ނިޒާމުގެ މަސަތްކަތް އެމްޑީޕީގެ ސަރުކާރަށް ނިންމައިނުލެވުނު ނަމަވެސް، ފަލާހު ވިދާޅުވީ މި ސަރުކާރުން ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ އިސްނެންގެވުމުގެ ދަށުން ފެނާ ނަރުދަމާގެ ނިޒާމު ހަރުދަނާ ކުރެވިގެންދާނެކަމަށެވެ.

ފަލާހު އިތުރަށް ވިދާޅުވީ، އެމްޑީޕީގެ ޖުމްލަ 10 އަހަރުގައި އުޅެގެންވެސް ރާއްޖޭގެ އެކި ކަންކޮޅުތަކުގައި އަދިވެސް ފެނާއި ނަރުދަމާގެ ހިދުމަތް ފޯރުކޮށް ނުދެވޭ އެތައް ރަށެއް ހުރި ކަމަށެވެ. 

ކުރީ ސަރުކާރުގައި ރާއްޖޭގެ ހުރިހާ ރަށެއްގައި ފެނާއި ނަރުދަމާގެ ހިދުމަތް ގާއިމުކުރަން މަސައްކަތް ފެށި ނަމަވެސް މަދު ރަށެއްގެ މަސައްކަތް ނޫނީ އެ ދައުރުގައި ނިންމައިނުލެވުނެވެ. ގިނަ ރަށްރަށުގެ މަސައްކަތް ހުރީ ވެރިކަން ބަދަލުވިއިރު ހުއްޓިފައެވެ. މިހާރު ރައީސް ޑރ.މުޙައްމަދު މުޢިއްޒުގެ ސަރުކާރުން އަންނަނީ އެ މަޝްރޫއުތައް ނިންމުމަށް މަސައްކަތްކުރަމުންނެވެ. 

މި ދައުރުގައި އެގޮތަށް ހުއްޓިފައި ހުރި ނަރުދަމާއާއި ފެނުގެ ނިޒާމުގެ ބައެއް މަސައްކަތްތައް ނިންމާފައިވެއެވެ. އެއިން ބައެއް މަޝްރޫއުތައް ނިންމައި ހިދުމަތް ފެށިފައިވާއިރު ރައީސް އަތޮޅުތަކަށް ކުރައްވާ ދަތުރުފުޅުތަކުގައި އެފަދަ ބައެއް މަޝްރޫއުތައް އިފުތިތާހުކޮށްދެއްވާފައިވެއެވެ.