ދެހާސް އަށާވީސް ވަނަ އަހަރު ބާއްވާ ރިޔާސީ އިންތިހާބުގައި ޕީއެންސީން ވާދަކުރައްވާނެ ކެންޑިޑޭޓަކު ކަނޑައަޅަަން ޕްރައިމަރީއެއް ނުބާއްވާނެ ކަމަށާއި އެ ޕާޓީގެ ރިޔާސީ ކެންޑިޑޭޓަކަށް ވާނީ މިހާރުގެ ރައީސް ޑރ. މުހައްމަދު މުއިއްޒު ކަމަށް ޗެއާޕާސަން އަބްދުއްރަހީމް އަބްދުﷲ މިރޭ ވިދާޅުވެއްޖެ އެވެ.

ޕީއެންސީން މިއަދު ބޭއްވި އެތެރޭގެ އިންތިޚާބާ ގުޅޭ ގޮތުން އެ ޕާޓީގެ މައި އޮފީސް، ސީ ޓްރެކްސް ބިލްޑިންގައި ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ އެ ޕާޓީގެ އަމާޒަކީ، ރާއްޖޭގައި މިހާރު އަމަލުކުރަމުން އަންނަ ގާނޫނު އަސާސީގެ ދަށުން ދެވަނަ ދައުރެއް ކާމިޔާބު ކުރައްވާ ފުރަތަމަ ރައީސްގެ ގޮތުގައި 2028 ވަނަ އަހަރު ރައީސް ޑރ. މުޙައްމަދު މުއިއްޒު އިންތިޚާބު ކުރުން ކަމަށެވެ.

މީގެ އިތުރުން އަބްދުއްރަހީމް ވިދާޅުވީ ރިޔާސީ އިންތިހާބެއްގައި ވާދަކުރުމުގެ އަދި ރާއްޖޭގެ ވެރިކަން ކުރުމުގެ ނުވަތަ ވެރިކަމަށް އަންނަން އުޅުމުގެ އެއްވެސް ވިސްނުމެއް އޭނާގެ ނެތް ކަމަށެވެ. 

ޕީއެންސީން މިއަަދު ބޭއްވި އިންތިޚާބުގައި އެ ޕާޓީގެ 1،984 މަގާމަށް މެންބަރުން ވަނީ އިންތިޚާބުކޮށްފައެވެ.

އަބްދުއްރަހީމް ވިދާޅުވީ މިއަދުގެ އިންތިހާބަކީ ޕާޓީން އަމިއްލައަށް ތެދުވެ ހިންދަމާލުމަށް ކުރެވޭ މަސައްކަތުގައި އެޅި ވަރަށް މުހިންމު ފިޔަވަޅެއް ކަމަށެވެ.