ކުލަ ފާޓާތަކެއް އަރުވާ ބަރާކޮށްފައިވާ ލޮރީއެއް މާވެޔޮ މަގަށް ބަންޑުން ޖަހާލައިފިއެވެ.

މަންޒަރު ފެނުނު ބައެއް މީހުން ބުނި ގޮތުގައި، މިރޭ އިރާކޮޅު ހިނގި އެ ހާދިސާގައި ލޮރީ އަރި އަޅާލައި ކުލަ ފާޓާތައް މަގު މައްޗަށް ފައިބައިގެން ދިޔައީ، މާވެޔޮމަގާއި އިސްކަންދަރު މަގު ގުޅުނު ކަންމަތީގައި ހުންނަ ޔޫދު ނަމަކަށް ކިޔާ ފިހާރަ އަށް ކުލަ ފާޓާތައް ބާލަން އުޅުމުގެ ތެރޭގަ އެވެ.

"ޑްރައިވަރު އައިސް އުޅުނީ ޕޭމަންޓު މައްޗަށް ލޮރީ އަރުވާލުމަށް ފަހު ޕާކް ކުރަން. އެހެން އުޅުމުގެ ތެރޭގައި ލޮރީ އެއްފަރާތަށް މާބޮޑަށް އަރިވެ ކުލަ ފާޓާތައް ފައިބައިގެން ދިޔައީ،" އެ ހާދިސާ ހިނގި ވަގުތު އެ ތަނުގައި ހުރި މީހަކު ބުންޏެވެ. "ބޮޑަށް ލަފާކުރެވެނީ ލޮރީގެ ފުރޮޅުގައި ވައި ވެސް މާމަޑީ ކަމަށް. އެއަށް އެކަށީގެންވާ ވަރަށް ވުރެ ބޮޑަށް ލޮރީ އޮތީ ބަރު ވެސް ކޮށްފައި."

މަގު މައްޗަށް ފައިބައިގެން ދިޔަ ދަވާދު ފާޓާތަކުގެ މަތި ނެއްޓި މުޅި މަގުގެ ބޮޑު ބައެއް އޮތީ ދަވާދު ކޯރެއްހެންނެވެ. ފިހާރައިގެ މަސައްކަތު މީހުން ދަނީ މަގަށް ފައިބައިގެން ދިޔަ ދަވާދު ފާޓާތައް ނަގައި އެ ސަރަހައްދު ސާފު ކުރުމުގެ މަސައްކަތް ކުރަމުންނެވެ.

ފުލުހުން ދަނީ އެ ސަރަހައްދުގައި ހަރަކާތްތެރިވަމުންނެވެ.