އިންޑިއާގެ އަސްކަރިއްޔާއާ ގުޅިގެން ރާއްޖޭގެ ޤައުމީ ދިފާޢީ ބާރު، އެމްއެންޑީއެފްއިން ކުރިއަށް ގެންދިޔަ "އެކްސަސައިޒް އެކަތަ" ގެ ހަތް ވަނަ ސިލްސިލާ ތަމްރީނު ޕްރޮގްރާމް ކާމިޔާބުކަމާއެކު ނިންމާލައިފިއެވެ.

މި ޕްރޮގްރާމް ނިންމުމުގެ ރަސްމިއްޔާތު ބޭއްވީ ޅ. މާފިލާފުށީގައި ހުންނަ ކޮމްޕޮސިޓް ޓްރެއިނިން ސެންޓަރުގައެވެ. މި ރަސްމިއްޔާތު ޝަރަފްވެރި ކޮށްދެއްވީ ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހީމް ޙިލްމީއެވެ.

"އެކްސަސައިޒް އެކަތަ" ނިންމާލުމުގެ ރަސްމިއްޔާތުގެ ތެރެއިން. ފޮޓޯ: އެމްއެންޑީއެފް

މިދިޔަ އޮކްޓޫބަރު މަހުގެ 28 ވަނަ ދުވަހުން ފެށިގެން މިއަދުގެ ނިޔަލަށް ހިންގި މި އެކްސަސައިޒްގައި އިންޑިއަން ނޭވީ، މެރިން ކޮމާންޑޯ އަދި އެމްއެންޑީއެފް މެރިން ކޯ ސްޕެޝަލް އޮޕަރޭޝަންސް ގުރޫޕްގެ އޮޕަރޭޓިވްސް ވަނީ ބައިވެރިވެފައެވެ.

މި ތަމްރީނުތަކުގައި މައިގަނޑު ގޮތެއްގައި ފަރިތަކޮށްފައި ވަނީ ޓެކްޓިކަލް ޑައިވިން ފަޔަރިން، ސްލިދަރިން އަދި ބޯޑިންގެ ހުނަރުތަކެވެ.

"އެކްސަސައިޒް އެކަތަ"އިގެ ހަތް ވަނަ ސިލްސިލާ، ނިންމުމުގެ ރަސްމިއްޔާތުގައި، އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، މުނު މަހާވަރް އާއި އެމްއެންޑީއެފް ނޮދަން އޭރިއާ ކޮމާންޑުގެ ކޮމާންޑަރ ބްރިގޭޑިއާ ޖެނެރަލް އިސްމާއީލް ޝަރީފް އާއި އެމްއެންޑީއެފް ދަ ބޭސިކް ސްކޫލުގެ އޮފިސަރުން ވަނީ ބައިވެރިވެފައެވެ.