ކެލާ ދާއިރާގެ ރައްޔިތުންގެ މަޖިލީހުގެ މެންބަރު، ޢަބްދުﷲ ޝަރީފްގެ ފަރާތުން އެ ދާއިރާގައި ހިމެނޭ ރަށްތަކަށް ޚާއްޞަކޮށް ބާއްވާ، "އެމްޕީ ޝަރީ ކަޕް 2025" ގެ ހޭންޑްބޯޅަ މުބާރާތުގައި އިއްޔެ ކުޅުނު މެޗުގައި ގޫޕްސް ސްޕޯޓްސް ކްލަބުން މުހިއްމު މޮޅެއް ހޯދައިފިއެވެ.

މި ނަތީޖާއާއެކު، މުބާރާތުގައި ވާދަކުރާ ހަތަރު ޓީމުގެ ތެރެއިން ތިން ޓީމަކަށް އަދިވެސް ފައިނަލުގެ ޖާގައެއް ހޯދުމުގެ ފުރުޞަތު އެބައޮތެވެ. މިހާތަނަށް ކުޅުނު މެޗުތަކަށްފަހު އެންމެ ކުރީގައި އުޅެނީ އަންގަބޫލަބަލް އާއި ގޫޕްސް ސްޕޯޓްސް ކްލަބެވެ. މީގެއިތުރުން، ކެލާ ޔޫތު ފޯރަމް އަށް ވެސް ބާކީ އޮތް މެޗުން ރަނގަޅު މޮޅެއް ހޯދައިގެން ފައިނަލަށް ދެވޭނެ އެވެ. ފުލުގައި އުޅޭ ސްޕިން ވިޒަޑް ވަނީ ކަޓައިފައެވެ. 

ފިއްލަދޫގައި ހުންނަ ގްރައުންޑްގައި އިއްޔެ ހަވީރު ކުޅުނު މެޗުގައި ގޫޕްސް ސްޕޯޓްސް ކްލަބުން ވަނީ 16-03 އިން ސްޕިން ވިޒަޑް ބަލިކޮށްފައެވެ. މި މެޗުގެ ކުއީން އޮފް ދަ މެޗަށް ހޮވުނީ ގޫޕްސް ސްޕޯޓްސް ކްލަބުގެ އައިޝަތު ލީން މުޙައްމަދު ވިޖާން އެވެ. 

މި މުބާރާތަކީ، ކެލާ ދާއިރާގައި ހިމެނޭ ތިން ރަށް ކަމަށްވާ، ކެލާ އާއި ވަށަފަރު އަދި ފިއްލަދޫ އަށް ނިސްބަތްވާ އަންހެން ބޭފުޅުންނަށް ޚާއްޞަކޮށް ކުރިއަށްގެންދާ ހޭންޑްބޯޅަ މުބާރާތެކެވެ. މުބާރާތުގައި ވާދަކުރާ ހަތަރު ޓީމަކީ، ކެލާ ޔޫތު ފޯރަމް، ގޫޕްސް ސްޕޯޓްސް ކްލަބްގެ އިތުރުން ސްޕިން ވިޒަޑް އަދި އަންގަބޫލަބަލް އެވެ.

މުބާރާތުގައި ވާދަކުރާ ހަތަރު ޓީމުގެ މެދުގައި ކުޅެވޭ ލީގު ބުރަށްފަހު އެންމެ ގިނަ ޕޮއިންޓް ހޯދާ ދެ ޓީމު ފައިނަލަށްދާނެއެވެ. މުޅި މުބާރާތުގެ އެއްވަނަ ޓީމަށް 50،000ރ. ގެ އަގުހުރި ފައިސާގެ އިނާމެއް ކަނޑައަޅާފައިވާއިރު، ރަނަރަޕް މަގާމަށް ވެސް 20،000ރ. ވަނީ ހުށަހަޅާފައެވެ.

މި މުބާރާތުގައި މިއަދު ކުޅޭ މެޗުގައި ބައްދަލުކުރާނީ ކެލާ ޔޫތު ފޯރަމްއާ އަންގަބޫލަބަލް އެވެ. މި މެޗު ފަށާނީ މިއަދު ހަވީރު 4:30 ގައެވެ.