ކެލާ ދާއިރާގެ ރައްޔިތުންގެ މަޖިލީހުގެ މެންބަރު، ޢަބްދުﷲ ޝަރީފްގެ ފަރާތުން އެ ދާއިރާގައި ހިމެނޭ ރަށްތަކަށް ޚާއްޞަކޮށް ބާއްވާ، "އެމްޕީ ޝަރީ ކަޕް 2025" ގެ ފުޓްސަލް މުބާރާތުގެ ސެމީ ފައިނަލުގައި އަންގަބޫލަބަލްއާއި އާރްބީއެލް ސްޕޯޓްސް ކްލަބު އަދި، ގޫޕްސް ސްޕޯޓްސް ކްލަބާއި އަންގަބޫލަބަލް ޖޫނިއާ ބައްދަލުކުރާން ޖެހިއްޖެއެވެ.

މި މުބާރާތުގައި އިއްޔެ ކުޅުނު މެޗުތަކުން ގޫޕްސް ސްޕޯޓްސް ކްލަބާއި، އާރްބީއެލް ސްޕޯޓްސް ކްލަބުން ވަނީ މޮޅުވެފައެވެ. އެގޮތުން، ގޫޕްސް ޓީމުން ވަނީ 10-2 އިން އެފްސީ ބައި ލައްކާ ބަލިކޮށްފައެވެ.

މި މެޗުގައި ގޫޕްސް ޓީމުގެ ޢަބްދުﷲ ވިސާމް ހަ ލަނޑުޖެހިއިރު، މޮޅު ކުޅުންތެރިއަކަށް ހޮވުނީ ވެސް އޭނާ އެވެ. އެ ޓީމުގެ އަނެއް ލަނޑުތައް ޖަހައިދިނީ އާދަމް ޢަބްދުއްރަހީމް ދެ ގޯލާއި، އާދަމް އިޚުވާން އާއި އަލީ ކާމިލް އެވެ.

މެޗުގައި އެފްސީ ބައި ލައްކަ ޓީމުން ޖެހި ލަނޑުތައް ކާމިޔާބުކޮށްދިނީ މޫސާ ނަޖީބު އާއި އަލީ އަފްރާހް އެވެ.

މި ގްރޫޕުގެ އަނެއް މެޗުގައި އާރްބީއެލް އިން ވަނީ 5-2 އިން ޓީއޯ ސްޕޯޓްސް ކްލަބް ބަލިކޮށްފައެވެ. މެޗުގެ މޮޅު ކުޅުންތެރިއަކަށް ހޮވުނީ އާރްބީއެލް އަށް ތިން ލަނޑުޖަހައިދިން ހުސައިން ޝިފާހް އެވެ. އެ ޓީމުގެ އަނެއް ދެ ލަނޑުޖަހައިދިނީ އަލީ ޔަޒްދާން ރަޝީދު އެވެ.

މި މެޗުގައި ޓީއޯ ޓީމުން ޖެހި ލަނޑުތައް ކާމިޔާބުކޮށްދިނީ އިބްރާހިމް އައްލާމް ފަރީދު އާއި މުޙައްމަދު ފައިޒާން ފަޒީން އެވެ.

މި މުބާރާތަކީ، ކެލާ ދާއިރާގައި ހިމެނޭ ތިން ރަށް ކަމަށްވާ، ކެލާ އާއި ވަށަފަރު އަދި ފިއްލަދޫ އަށް ނިސްބަތްވާ ފިރިހެން ބޭފުޅުންނަށް ޚާއްޞަކޮށް ކުރިއަށްގެންދާ ފުޓްސަލް މުބާރާތެކެވެ.

މުބާރާތުގައި ވާދަކުރާ ޓީމުތައް ދެ ގްރޫޕަކަށް ބަހާލާފައިވާއިރު، ކޮންމެ ގްރޫޕެއްގެ އެއްވަނަ އާއި ދެވަނަ މަގާމު ހޯދާ ޓީމު ސެމީ އަށް ދަތުރުކުރާނެ އެވެ. އެއަށްފަހު، ސެމީގެ ދެ މެޗު ކާމިޔާބުކުރާ ޓީމުތައް ފައިނަލަށް ދަތުރުކުރާނެ އެވެ.

މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ މި މަހުގެ 5 ވާ އަންގާރަ ދުވަހުގެ ރޭގަނޑު 9:30 ގައެވެ. ސެމީގެ މެޗުތައް އޮތީ މާދަމަ އެވެ.