އިލެކްޝަންސް ކޮމިޝަނުގައި ދެ ދައުރު ފުރިހަމަ ކުރެއްވުމަށް ފަހު މިއަދަކީ އެ ކޮމިޝަނުގައި މަސައްކަތް ކުރައްވާނެ އެންމެ ފަހު ދުވަސް ކަމަށް އިލެކްޝަން ކޮމިޝަން (އީސީ) ގެ ރައީސް ފުއާދު ތައުފީގު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ފުއާދު ވިދާޅުވީ، މިއަދަކީ އިލެކްޝަންސް ކޮމިޝަނުގައި އޭނާގެ ދައުރުގެ އެންމެ ފަހު ދުވަސް ކަމަށާއި، އިންތިގާލީ އީސީ އާއި އެއް ވަނަ އީސީގައި ތިއްބެވި ބޭފުޅުން ވެސް ހިމެނޭ ގޮތަށް މަސައްކަތް ކުރެއްވި ހުރިހާ މެމްބަރުންނަށާއި މުވައްޒަފުންނަށް ޝުކުރު އަދާކުރައްވާ ކަމަށެވެ.

މީގެއިތުރުން ފުއާދު ވިދާޅުވީ، ރައީސް ކަމުގެ މަގާމުގައި ހުންނެވިއިރު، ސިޔާސީ ޕާޓީތަކަށާއި މުއައްސަސާތަކާއި، ރައްޔިތުން ދެއްވި އިތުބާރާއި އެއްބާރުލުމަށް ޝުކުރު ދަންނަވާ ކަމަށެވެ. 

އީސީގައި ފުއާދުގެ ދައުރު ހަމަވުމާ ގުޅިގެން އެ ކޮމިޝަނުގެ މެމްބަރު ކަމަށް އިސްލާމިކް މިނިސްޓްރީގެ ކުރީގެ ޕާމަނަންޓް ސެކްރެޓަރީ އަބްދުލް ހަސީބް އިސްމާއިލް އައްޔަން ކުރަން މަޖިލީހުން މިހާރު ވަނީ ފާސްކޮށްފައެވެ.

އީސީގެ ގަވާއިދު އޮންނަ ގޮތުން މެންބަރަކަށް ކޮމިޝަނުގައި ގިނަވެގެން ހުރެވޭނީ ދެ ދައުރެވެ.