ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އެކި މަގާމުތަކަށް ގާތްގަނޑަކަށް 667 މީހުން އިންތިޚާބުކުރުމަށް ވޯޓުލުން މިއަދު ހެނދުނު ފަށައިގެން ކުރިއަށް އެބަދެއެވެ.

މުޅި ރާއްޖޭގައި ބާއްވާ އިންތިޚާބުގައި މާލޭގައި ދިރިއުޅޭ މީހުން ވޯޓުލުން ކުރިއަށް ދަނީ ދަރުބާރު ގޭގަ އެވެ. ވޯޓުލާން ހަމަޖެހިފައި ވަނީ ހެނދުނު 10 އިން މެންދުރު ފަހު 2 އަށެވެ.

ވެރިކަންކުރާ މައި ޕާޓީގެ އިންތިހާބުގައި ޕާޓީގެ އިސް މަގާމުތަކާއި ދާއިރާތަކުގެ ރައީސުންނާއި ނައިބު ރައީސުންނާއި ޕާޓީން ރަށްރަށުގައި ހިންގާ ހަރަކާތްތަކުގެ އެކި މަގާމުތަކަށް 667 މީހުން އިންތިހާބުކުރާނެ އެވެ.

ޕީއެންސީގެ އެތެރޭގެ އިންތިޚާބުގައި 1984 މަގާމަށް މީހުން ހޮވާ ގޮތަށް އޮތް ނަމަވެސް އިންތިޚާބުގެ ކުރިން 1،300 އަށް ވުރެ ގިނަ މަގާމަށް މީހުން ވަނީ އިންތިޚާބުކޮށްފައެވެ. އެއީ އެ ދާއިރާތަކަށް އެއް ކެންޑިޑޭޓަކު ކުރިމަތިލާފައިވާތީ އެވެ. ޕީއެންސީގެ މަޖިލިސް މެންބަރުން ތަމްސީލް ކުރާ ދާއިރާތަކުގެ ރައީސުންގެ ގޮތުގައި ހަމަޖައްސާފައި ވަނީ އެ ދާއިރާއެއްގެ މަޖިލިސް މެންބަރެވެ.

ޕީއެންސީން ބުނި ގޮތުގައި އެ ޕާޓީގެ ދަފްރަތުގައި 62،000 މެންބަރުން އެބަތިއްބެވެ. 

ޕީއެންސީގެ އެތެރޭގެ އިންތިޚާބާ ގުޅޭ ބައެއް މައުލޫމާތު:

ބެހެއްޓިފައިވާ ވޯޓު ފޮށީގެ އަަދަދު: 143

މާލޭގައި ބެހެއްޓިފައިވާ ވޯޓު ފޮށީގެ އަަދަދު: 53

ވޯޓުލުން ކުރިއަށްދާ ރަށްތަކުގެ އަދަދު: 90

ވާދަކުރާ ކެންޑިޑޭޓުންގެ އަދަދު: 667

ވޯޓުލުމުގެ ހައްގު ލިބިގެންވާ މީހުންގެ އަދަދު: 34904