ރާއްޖޭގެ އިސްލާމީ ފަތުވާދޭ އެންމެ މަތީ މަޖިލީހާއި، އިސްލާމީ ކަންތައްތަކާ ބެހޭ ވުޒާރާ ގުޅިގެން، ރާއްޖޭގެ ދީނީ ޢިލްމުވެރިންނާއި އިމާމުންނަށް އަމާޒުކޮށްގެން 'ފަތުވާ މަހާސިންތާ' މިއަދު ފަށައިފިއެވެ.

މިއީ ރާއްޖޭގައި މިހާތަނަށް ބޭއްވޭ މިފަދަ ފުރަތަމަ މަހާސިންތާއެވެ.

"މުޖުތަމަޢު އިސްލާޙު ކުރުމުގައި ފަތުވާގެ ދައުރު" ގެ ނަމުގައި ބާއްވާ މި މަހާސިންތާގެ މައިގަނޑު މަޤްޞަދަކީ ރާއްޖޭގައި ދީނީ އެއްބައިވަންތަކަން ޙިމާޔަތްކުރުމާއި، އިސްލާމްދީނުގެ މަތިވެރި އަސްލުތައް ފެތުރުމަށް މަސައްކަތްކުރާ ފަރާތްތަކަށް އެއްތަނެއްގައި ބައްދަލުވެ މަޝްވަރާކުރުމުގެ ފުރުޞަތު ހޯދައިދިނުމެވެ.

މަހާސިންތާ ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން އިސްލާމީ ކަންތައްތަކާ ބެހޭ ވަޒީރު، ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ، އިސްލާމީ ފިޤުހުގައި ފަތުވާގެ މަޤާމަކީ ވަރަށް މަތިވެރި މަޤާމެއް ކަމަށާއި، ވަކިކަމެއްގެ ޝަރުޢީ ޙުކުމެއް ބަޔާންކުރުމުގެ ކުރިން އެކަމެއްގެ ޙަޤީޤަތް ތަޞައްވުރު ކުރުމަކީ ޝަރުޢީ ޤަވާޢިދެއް ކަމުގައެވެ. އަދި މިޒަމާނުގައި ކުރިމަތިވެފައިވާ ޒަމާނީ ފިޤުހީ މައްސަލަތަކުގައި ޙުކުމްތައް ބަޔާންކުރުމުގައި ޖަމާޢީ ގޮތުން މަޝްވަރާކުރެވެން ޖެހޭކަމަށް ވަޒީރު ފާހަގަކުރެއްވިއެވެ.

ވަޒީރު އިތުރަށް ވިދާޅުވީ، ރާއްޖޭގެ ފަތުވާގެ ނިޒާމު ހަރުދަނާކުރުމަކީ ސަރުކާރުގެ ސިޔާސަތެއް ކަމަށާއި، ދީނީ އެއްބައިވަންތަކަން ޤާއިމުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް އިސްކަން ދެއްވާ ކަމަށެވެ. އަދި ގިނަ ދުވަސްތަކަކަށް ފަތުވާ ކައުންސިލްގެ މެންބަރުން ހަމަނުވެ އޮތް އޮތުން ރައީސް ވަނީ ނިމުމަކަށް ގެންނަވައި، ޤާނޫނުގައި ބުނާ ފުރިހަމަ ޢަދަދަށް މެންބަރުން ޢައްޔަންކުރައްވާފައި ކަމަށް ވެސް ވަޒީރު ވިދާޅުވިއެވެ.

މި މަހާސިންތާގައި ޕެނަލް ޑިސްކަޝަންތަކެއް ހިމެނޭ ކަމަށާއި، މި ޑިސްކަޝަންތަކުގައި ދިވެހިރާއްޖޭގެ އެންމެ ފާހަގަކޮށްލެވޭ ދީނީ ޢިލްމުވެރިން ބައިވެރިވާ ގޮތަށް ވަނީ ހަމަޖެހިފައެވެ. މަހާސިންތާއިން ދިވެހިރާއްޖޭގައި ދީނީގޮތުން ޚިޔާލުތަފާތުވާ މައްސަލަތައް ދެނެގަތުމާއި، މުޖުތަމަޢުގެ މަޞްލަޙަތު ހިމެނޭ ދީނީ މައްސަލަތަކުގައި ޚިޔާލު ހޯދާ މަޝްވަރާކުރުމަށް ފުރުޞަތު ލިބޭނެއެވެ.

މަހާސިންތާގައި ބައިވެރިވެ ވަޑައިގަންނަވާ ޢިލްމުވެރިންގެ ތެރޭގައި ރާއްޖޭގެ އިސް މުފްތީންނާއި، ޤައުމީ ޔުނިވަރސިޓީގެ އިސްލާމިކް ސްޓަޑީޒް ފެކަލްޓީގެ މުދައްރިސުންނާ، އަދި އެހެނިހެން ދީނީ މަރުކަޒުތަކުގެ ޢިލްމުވެރިން ހިމެނެއެވެ. މީގެ އިތުރުން ރާއްޖޭގެ އެކި ކަންކޮޅުތަކުން ވަޑައިގެންނެވި އިމާމުންނާއި ދީނީ ނަޞޭހަތްތެރިން ވެސް މި މަހާސިންތާގައި ބައިވެރިވެ ވަޑައިގަންނަވައެވެ.

މި މަހާސިންތާގައި މަޝްވަރާކުރެވޭ މުހިންމު މައުޟޫޢުތަކުގެ ތެރޭގައި ޒަމާނީ މުޢާމަލާތްތަކާ ގުޅޭ ފިޤުހީ މައްސަލަތަކާއި، އާއިލީ މައްސަލަތަކުގައި ޝަރީޢަތުގެ ދައުރާއި، ތަޢުލީމީ ދާއިރާގައި އިސްލާމީ ތަރުބިއްޔަތުގެ މުހިންމުކަން ފަދަ ބައިތައް ހިމެނެއެވެ. މީގެ އިތުރުން، މުޖުތަމަޢުގައި ފެތުރެމުންދާ ނޭދެވޭ އާދަތަކާ ދެކޮޅަށް ކުރެވިދާނެ މަސައްކަތްތަކާ ބެހޭގޮތުން ވެސް މަޝްވަރާކުރެވޭނެއެވެ.

އިސްލާމީ ކަންތައްތަކާބެހޭ ވުޒާރާއިން މަޢުލޫމާތު ދެއްވިގޮތުގައި، މި މަހާސިންތާ ކުރިއަށްދާނީ ތިން ދުވަހުގެ މުއްދަތަށެވެ. އަދި މަހާސިންތާ ނިންމުމުގައި، މަޝްވަރާކުރެވުނު ކަންތައްތަކުގެ މައްޗަށް ބިނާކޮށް ޚުލާޞާ ރިޕޯޓެއް އެކުލަވާލައި، ކަމާބެހޭ އިދާރާތަކަށް ހުށަހެޅުމަށް ވަނީ ހަމަޖެހިފައެވެ.

މިފަދަ މަހާސިންތާތައް މުސްތަޤުބަލުގައި ވެސް އަހަރަކު އެއްފަހަރު ބޭއްވުމަށް ރޭވިފައިވާކަން އިސްލާމީ ކަންތައްތަކާބެހޭ ވުޒާރާއިން ވަނީ ހާމަކުރައްވައިފައެވެ.