މާލެ އާއި ވިލިމާލޭގެ މަގުތައް ތާރު އަޅައިގެން ޒަމާނީ ފެންވަރަށް ތަރައްޤީކުރުމަށް ނިންމާފައިވާ މަޝްރޫޢުގެ ދިރާސާގެ މަސައްކަތް، ޗައިނާގެ ޓެކްނިކަލް ޓީމުން ނިންމާލައިފިއެވެ.

މި ޕްރޮޖެކްޓް ކުރިއަށް ގެންދިއުމަށް ހަމަޖެހިފައި ވަނީ ޗައިނާ ސަރުކާރުގެ ހިލޭ އެހީގެ ދަށުންނެވެ.

އިމާރާތް ކުރުމާއި ބިނާވެށި ބެލެހެއްޓުމާބެހޭ ވުޒާރާއިން މަޢުލޫމާތު ދެއްވިގޮތުގައި، މި މަޝްރޫޢުއާ ގުޅޭގޮތުން ދިވެހި ސަރުކާރާއި ޗައިނާ ސަރުކާރާ ދެމެދު ލެޓަރ އޮފް އެކްސްޗޭންޖްގައި ސޮއިކޮށްފައި ވަނީ މި އަހަރުގެ ޖުލައި މަހުގެ 23 ވަނަ ދުވަހުއެވެ. މި އެއްބަސްވުމަކީ މަޝްރޫޢުގެ ޑިޒައިނާއި ޕްލޭނިން އަށް ބޭނުންވާ ފީސިބިލިޓީ ސްޓަޑީތައް ހެދުމަށް ޤާއިމުކުރި އެއްބަސްވުމެކެވެ.

މި އެއްބަސްވުމުގެ ދަށުން މާލެ އާއި ވިލިމާލޭގެ މަގުތައް ތަރައްޤީކުރުމަށް ބޭނުންވާ ދިރާސާގެ މަސައްކަތްތައް ފަށާފައިވަނީ ނޮވެމްބަރު 4 ވަނަ ދުވަހު އެވެ. ޗައިނާގެ ތަޖުރިބާކާރުންގެ ޓީމަކުން ކުރިއަށްގެންދިޔަ މި ޓެކްނިކަލް ދިރާސާއަށް ބޭނުންވާ މަޢުލޫމާތު އެއްކުރުމުގެ މަސައްކަތްތައް މިހާރު ވަނީ މުޅިން ނިމިފައެވެ.

ދިރާސާގެ މަސައްކަތުގެ ތެރޭގައި ސައިޓްތައް ދިރާސާކުރުމުގެ އިތުރުން، ކަމާ ގުޅުންހުރި ވުޒާރާތަކާއި މާލޭގައި ޔުޓިލިޓީ ޚިދުމަތްތައް ދޭ ކުންފުނިތަކާއި މުވާސަލާތީ ޚިދުމަތްދޭ ކުންފުނިތަކާ އެ ޓީމުން ބައްދަލުކޮށްފައިވާ ކަމަށް އެ ވުޒާރާއިން ހާމަކުރެއްވިއެވެ.

މި މަޝްރޫޢުގެ ތެރޭގައި މާލޭގެ ފެނާއި ނަރުދަމާގެ ވިއުގަ ޒަމާނީ ވިއުގައަކަށް ބަދަލުކުރުމުގެ މަސައްކަތް ވެސް ހިމެނޭކަމަށް އެ ވުޒާރާއިން ވިދާޅުވިއެވެ. އަދި މި ސަރވޭގެ މަސައްކަތަށް ފަހު ދެން ކުރިއަށްދާނީ ޕްރޮޖެކްޓް ޑިޒައިން ކުރުމުގެ މަސައްކަތްކަމަށާއި، މި މަޝްރޫޢުގެ ދަށުން ތާރު އަޅައިގެން މަގުތައް ތަރައްޤީކުރާނީ އެންމެ ޒަމާނީ ފެންވަރަށް، ޒަމާނީ ޑިޒައިންތަކާ އެކު ކަމަށް ވެސް އެ ވުޒާރާއިން ވިދާޅުވިއެވެ.

މި މަޝްރޫޢު ކުރިއަށްގެންދިއުމަށް ފުރަތަމަ ނިންމާފައިވަނީ ސަރުކާރުގެ ޚަރަދުގައި ކަމަށާއި، ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި އަހަރުގެ ޖެނުއަރީގައި ޗައިނާއަށް ކުރެއްވި ދަތުރުފުޅުގައި ރާއްޖެއަށް އެ ޤައުމުން ދޭ ހިލޭ އެހީގެ ތެރޭގައި މި މަޝްރޫޢުގެ މަސައްކަތް ހިމެނުއްވުމަށް ޗައިނާ ސަރުކާރުން ނިންމެވިކަމަށް އެ ވުޒާރާއިން މަޢުލޫމާތު ދެއްވިއެވެ.

މަޝްރޫޢު ޕްލޭންކުރުމާއި ކޮންޓްރެކްޓަރަކު ހޮވުމުގެ މަސައްކަތް ވެސް ކުރިއަށްގެންދާނީ ޗައިނާ ސަރުކާރުގެ ފަރާތުންކަމަށް އެ ވުޒާރާއިން ހާމަކުރެއްވިއެވެ. އަދި މި މަޝްރޫޢު މުޅިން ނިންމުމަށް 3-4 އަހަރު ހޭދަވާނެކަމަށް އިމާރާތްކުރުމާއި ބިނާވެށި ބެލެހެއްޓުމާބެހޭ ވަޒީރު ޑރ. ޢަބްދުﷲ މުއްޠަލިބު މީގެކުރިން ވިދާޅުވެފައިވާކަމަށް ވެސް އެ ވުޒާރާއިން ފާހަގަކުރެއްވިއެވެ.