ފުލުހުންގެ ތެރެއިން ރައީސުލްޖުމްހޫރިއްޔާގެ މެޑަލްއާއި މަތިވެރި ޚިދުމަތުގެ މެޑަލް ލިބިލެއްވި ފުލުހުންނަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މެޑަލް ދެއްވައިފިއެވެ.

ފުލުހުންނަށް މެޑަލް ހަވާލުކޮށްދެއްވީ ދިވެހިރާއްޖޭގެ މިނިވަން ދުވަހުގެ މުނާސަބަތުގައި، ރައީސުލްޖުމްހޫރިއްޔާ ދިވެހި ފުލުހުންނާއި ސިފައިންނާ ބައްދަލުކުރެއްވުމަށް ސޯޝަލް ސެންޓަރުގައި މިއަދު ހެނދުނު ބޭއްވި ހާއްސަ ރަސްމިއްޔާތުގައެވެ.

މި ހާއްސަ ރަސްމިއްޔާތުގައި ރައީސުލްޖުމްހޫރިއްޔާގެ މެޑަލް ލިބިލެއްވި ތިން ފުލުހަކަށް އަދި މަތިވެރި ޚިދުމަތުގެ މެޑަލް ލިބިލެއްވި ނުވަ ފުލުހަކަށް ރައީސުލްޖުމްހޫރިއްޔާ މެޑަލް ދެއްވާފައިވެއެވެ.

ފުލުހުންނާއި ސިފައިންނާއި މިއަދު ބައްދަލުކުރައްވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ފުލުުހުންނާއި ސިފައިންނާއެކު މިނިވަން ދުވަހު ބައްދަލުކުރެއްވުމަކީ، މިނިވަންދުވަހު ބާއްވަންޖެހޭ އެންމެ މުހިއްމު ބައްދަލުވުން ކަމަށާއި، ރާއްޖެއަށް މިނިވަންކަންމަތީ ހޭދަކުރެވުނު ދިގު މާޒީ އެގޮތުގައި ހޭދަކުރެވުނީ ކޮންމެ ދުވަސްވަރެއްގައިވެސް އެކި ސިފަސިފައިގަ އަސްކަރީ އަދީ ސަލާމަތީ ބާރުން ކުރި މަސައްކަތްތަކުގެ ސަބަބުން ކަމަަށެވެ.

އެމަނިކުފާނު ވިދާޅުވީ ސަރުކާރުގެ އެންމެ އިސްވާޖިބަކީ ފުލުހުންނާއި ސިފައިންގެ ހިދުމަތް އިތުރަށް ކުރިއެރުވުމަށްޓަކައި އެ ދެ މުއައްސަސާއަށް ފަހިކޮށްދޭންޖެހޭ ކަންކަން ފަހިކޮށްދިނުން ކަމަށެވެ. އަދި އެމަނިކުފާނުގެ ސަރުކާރުގެ ސިޔާސަތަކީ އެންމެ އިސްކަންދީގެން ފުލުހުންނާއި ސިފައިންނަށް ފުރިހަމަކޮށްދޭންޖެހޭ ކަންކަން ފުރިހަމަކޮށްދިނުން ކަމަަށްވެސް ވިދާޅުވިއެވެ.