ފާނަބަސަންދު ޖެހިގެން މި އަހަރުގެ މިހާތަނަށް 2,900 އަށްވުރެ ގިނަ ކޭސް ރިޕޯޓްކޮށްފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.

މިކަން އެޗްޕީއޭ އިން ހާމަކޮށްފައިވަނީ ރާއްޖޭގެ އެކި ކަންކޮޅުތަކުގައި ފާނަބަސަންދުގެ ކޭސްތައް ރިޕޯޓް ކުރަމުންދާތީ ރައްކާތެރިކަމުގެ ފިޔަވަޅު އެޅުމަށް އިލްތިމާސްކުރައްވައި ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.

އެޗްޕީއޭ އިން ދެއްވި މަޢުލޫމާތުގައިވާ ގޮތުން، މި އަހަރުގެ ނޮވެމްބަރު މަހާ ހަމައަށް މުޅި ރާއްޖެއިން 2977 މީހުން ވަނީ ފާނަބަސަންދު ޖެހިގެން ރިޕޯޓްކޮށްފައެވެ. މީގެ ތެރެއިން 1,506 ކޭސް ރިޕޯޓްކޮށްފައި ވަނީ މާލެ ސަރަހައްދުންނެވެ. އަދި 1,471 ކޭސް ރިޕޯޓްކޮށްފައި ވަނީ އަތޮޅުތަކުންނެވެ.

މީގެ އިތުރުން، މި މަހުގެ ތެރޭގައި ކ. ގުޅިން ފާނަބަސަންދުގެ 11 ކޭސް ރިޕޯޓް ކޮށްފައިވާ ކަމަށް ވެސް އެޗްޕީއޭއިން ވިދާޅުވެފައިވެއެވެ. މި 11 ކޭހުގެ ތެރެއިން ދެ މީހަކަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި އިތުރު ފަރުވާ ދެމުންދާ ކަމަށް ވެސް އެ އިދާރާއިން ހާމަކުރައްވާފައިވެއެވެ.

ފާނަބަސަންދަކީ ވައިރަހަކުން ޖެހޭ ބައްޔެކެވެ. މި ބަލީގެ އަލާމާތްތަކުގެ ތެރޭގައި ހުންއައުން، ވަރުދެރަވުން، ނޭފަތުން ފެން އައުން އަދި ހަމުގައި ބިހިތަކެއް ނެގުން ހިމެނެއެވެ. މި ބަލި ފެތުރެނީ ބަލި ޖެހިފައި ހުރި މީހަކު ކެއްސާ، ކިނބިހި އަޅާއިރު ނޭވާލާ ނިޒާމުގެ ޒަރީއާއިންނާއި، ބިހި ނަގާފައި ހުރި މީހެއްގެ ގައިގައި ބީހުމުން ނުވަތަ އޭނާ ބޭނުންކޮށްފައިވާ ތުވާލި، އަންނައުނު ފަދަ ތަކެތި ބޭނުން ކުރުމުންނެވެ.

ބަލިން ރައްކާތެރިވުމަށް އެޗްޕީއޭއިން އިރުޝާދު ދެއްވާފައިވާ ގޮތުގައި، ބަލި ޖެހިފައިވާ މީހުން ގާތަށް ޒިޔާރަތް ނުކުރުމާއި، ބަލިޖެހިފައިވާ މީހާ ގޭގައި ދިރިއުޅޭ އެހެން މީހުންނާ އެކަހެރިވުމާއި، ބަލި ފަސޭހަވަންދެން އަންނައުނާއި ތުވާލިފަދަ ހިފާ ގެންގުޅޭ ތަކެތި ވަކި ކުރުން ހިމެނެއެވެ. އަދި ވެކްސިން ޖެހުމަކީ ވެސް މި ބަލިން ރައްކާތެރިވުމަށް އެޅިދާނެ ފިޔަވަޅެއް ކަމަށް އެޗްޕީއޭއިން ފާހަގަކުރައްވާފައިވެއެވެ.