ރަޝިޔާގެ ވަކި ސަރަހައްދުތަކެއްގައި ކްރިޕްޓޯކަރަންސީ މައިންކުރުން މަނާކުރަން ނިންމައިފިއެވެ.

ރަޝިޔާއިން މިގޮތަށް ނިންމާފައިވަނީ ކަރަންޓުގެ ދަތިކަން އެ ޤައުމުގެ ބައެއް ސަރަހައްދުތަކަށް ދިމާވެފައިވާތީކަމަށް އެ ޤައުމުގެ އެނާޖީ މިނިސްޓަރުގެ ނައިބު އެވްޖެނީ ގްރަބްޗަކް ވަނީ ވިދާޅުވެފައެވެ.

ކްރިޕްޓޯކަރަންސީ މައިންކުރުން މަނާކުރަން ނިންމާފައިވާ ސަރަހައްދުތަކުގެ ތެރޭގައި ރަޝިޔާގެ އިރުމަތީގެ ދުރު ސަރަހައްދު ތަކާއި ހުޅަނގު ދެކުނު ސައިބީރިއާ އާއި ދެކުނުގެ ސަރަހައްދުތައް ހިމެނެއެވެ. ރަޝިޔާއިން ހާމަކުރާގޮތުގައި މި ސަރަހައްދުތަކަށް 2030 ވަނަ އަހަރާއި ހަމައަށް ހަކަތައިގެ ދަތިކަން ކުރިމަތިވެ އެކަށީގެންވާ މިނަވަރަށް ކަރަންޓް ފޯރުކޮށްދިނުމަށް ދަތިވާނެ އެވެ.

ރަޝިޔާގެ ބައެއް ސަރަހައްދުތަކުގައި ކްރިޕްޓޯ މައިން ކުރުން މަނާކުރަން ނިންމާފައިވަނީ، ނޮވެމްބަރު މަހުގެ އެއްވަނަ ދުވަހުން ފެށިގެން އަމަލުކުރަން ނިންމާފައިވާ އާ ޤާނޫނުގެ ދަށުންނެވެ. މި ޤާނޫނުގެ ދަށުން ރަޝިޔާގެ ވަކި ސަރަހައްދުތަކެއްގައި ކްރިޕްޓޯކަރަންސީ މައިންކުރުން މަނާކުރުމުގެ ޤާނޫނީ ބާރު މުވައްސަސާ ތަކަށް ވަނީ ދީފައެވެ.

މި ޤާނޫނުތަކުގެ ދަށުން ކްރިޕްޓޯކަރަންސީ މައިންކުރުމާއި ބްލޮކްޗޭން ހިދުމަތްތަކާއި ކްރިޕްޓޯ އެކްސްޗޭންޖްތަކުގެ ޕްރޮމޯޝަންތައް ހިމެނޭ ގޮތަށް ކްރިޕްޓޯއާ ގުޅުން ހުރި އިޝްތިހާރުތައް ކުރުންވެސް ވަނީ ހަނިކޮށްފައެވެ. ރަޝިޔާގެ އެންމެ ބޮޑު ސަރޗް އިންޖީން ކަމަށްވާ ޔަންޑެކްސް އިން ވެސް މިހާރު ވަނީ އެގައުމުގެ އެތެރޭގައި ކްރިޕްޓޯ ހަރަކާތްތަކާ ގުޅުން ހުރި އިޝްތިހާރުތައް މަނާކޮށް ޕޮލިސީތަކަށް ވެސް ބަދަލު ގެނެސްފައެވެ.