ގައުމީ އެއާލައިން މޯލްޑިވިއަންއިން ކުރާ އެތެރޭގެ ދަތުރުތައް އިތުރުކުރުމަށް ކުރަމުންދާ މަސައްކަތްތަކުގެ ތެރެއިން އެ އެއާލައިނަށް ގެންނަ އޭޓީއާރް މަރުކާގެ ފަސްވަނަ މަތިންދާބޯޓު މިއަދު ރާއްޖެއަށް ވާސިލުވެއްޖެއެވެ. 

އޭޓީއާރް މަތިންދާބޯޓުތަކަކީ އެތެރޭގެ އުދުހުންތަކުގައި މޯލްޑިވިއަންއިން ބޭނުންކުރާ މަތިންދާބޯޓުތަކަކެވެ. އޭގެ އިތުރަށް ބޭރުގެ އުދުހުންތައް އިތުރުކުރުމަށް ވައިޑް ބޮޑީ މަތިންދާބޯޓެއްވެސް މި އަހަރުގެ ޖަނަވަރީ މަހު ގައުމީ އެއާލައިނަށް ގެނެސްފައިވެއެވެ. އަދި މި އޮކްޓޯބަރު މަހުގައި އިތުރު ވައިޑް ބޮޑީ މަތިންދާބޯޓެއްވެސް ގެންނަން ނިންމާފައިވެއެވެ. 

އޭޓީއާރް މަތިންދާބޯތުގެ ހަތަރު މަތިންދާބޯޓެއް މިހާތަނަށް ގައުމީ އެއާލައިނުގެ ފްލީޓަށް އިތުރުކޮށްފައިވެއެވެ. ގައުމީ އެއާލައިނުން ބުނެފައިވަނީ އޭޓީއާރް މަތިންދާބޯޓުތައް ގެނައުމުން ގައުމީ އެއާލައިނުގެ އެތެރޭގެ އުދުހުންތަކުގެ ހިދުމަތްތަކަށް ކުރިއެރުން ލިބޭނެ ކަމަަށެވެ. 

އެ އެއާލައިނުން ދިން މައުލޫމާތަށް ބަލާއިރު އެ ފުލައިޓު ރާއްޖެއަށް އައުމުގެ ދަތުރު ފެށީ ފްރާންސްގެ ޓޫލޫސްއިންނެވެ. އެ ދަތުގައި ތިން މަންޒިލެއްގައި މަޑުކުރާނެއެވެ. އެގޮތުން ފުރަތަމަ މަޑުކުރީ ގްރީސްގެ ސިޓީއެއްކަމަށްވާ ހެރަކްލިއަންގައެވެ. 

މި ފުލައިޓު ރާއްޖެއަށްކުރި ދަތުރުގައި ބައިވެރިވަނީ މޯލްޑިވިއަންގެ ޕައިލެޓުންނާއި އިންޖިނިއަރުންނެވެ. އެގޮތުން ކެޕްޓަން އަބްދުﷲ ނާފިޒާއި ކެޕްޓަން އަލީ ޔާނިޝް ދަތުރުގައި ބައިވެރިވެވަޑައިގަތެވެ. އަދި މޯލްޑިވިއަންގެ އިންޖިނިއަރު ވާއިޒް މުޙައްމަދުވެސް މި ދަތުރުގައި ބައިވެރިވެވަޑައިގަތެވެ. 

އެއާލައިނުން ބުނެފައިވަނީ އެ ދަތުރު ނިމި އޭޓިއާރްގެ އައު މަތިންދާބޯޓަށް ރާއްޖެއިން މަރުހަބާ ކިޔުމުގެ އިންތިޒާރުގައި އެއާލައިން ތައްޔާރަށް އޮތް ކަމަށެވެ. 

މި މަތިންދާބޯޓު ވެލާނާ އިންޓަނޭޝަނަލް އެއާޕޯޓަށް ވާސިލުވުމުން ފެނުގެ ސަލާމަކުން އެ މަތިންދާބޯޓަށް މަރުހަބާ ކިޔާފައިވެއެވެ. އަދި މަތިންދާބޯޓުގެ ފަޅުވެރިންނަށް މަރުހަބާ ވިދާޅުވީ މޯލްޑިވިއަންގެ އިސްވެރިންނެވެ.