ފުލުހުން ޓޯކޮށްފައިވާ އެއްގަމު އުޅަނދުތަކުގެ ތެރެއިން ވެރިފަރާތުން ނުގެންގޮސް ހުރި ގިނަ އަދަދެއްގެ އުޅަނދުތަކެއް ނައްތާލައިފިއެވެ. 

ދިވެހި ފުލުހުންގެ ޚިދުމަތުން މިއަދު ސޯޝަލްމީޑިއާގައި އާއްމުކުރި ތަފާސްހިސާބުގައި ބުނީ، އުޅަނދުތައް ނައްތާލީ މެއި 31 ވަނަ ދުވަހު ކަމަށެވެ. އެގޮތުން އެދުވަހު 568 އުޅަނދު ނައްތާލާފައިވާކަމަށް ފުލުހުން ބުނެފައިވެއެވެ. 

ފުލުހުން ނައްތާލި އުޅަނދުތަކުގެ ތެރެއިން 524 އުޅަނދަކީ ދެފުރޮޅުލީ އުޅަނދެވެ. ބާކީ 44 އުޅަނދަކީ ހަތަރު ފުރޮޅުލީ އުޅަނދެވެ. 

މާލޭގެ މަގުތަކުގައި ދިގު މުއްދަތަކަށް ބޭނުންނުކޮށް ދޫކޮށްލާފައި ހުންނަ އުޅަނދުތައް ފުލުުހުން އަންނަނީ ޓޯކުރަމުންނެވެ. އޭގެތެރޭގައި ނުގަވައިދުން ޕާކްކޮށްފައި ހުންނަ އުޅަނދުވެސް ހިމެނެއެވެ. 

ފުލުހުން އުޅަނދުތައް ނަގަނީ މާލޭގެ ޓްރެފިކް މައްސަލަ ހައްލުކުރުމުގެ ގޮތުންނެވެ. އެގޮތަށް ދޫކޮށްލާފައި ހުންނަ އުޅަނދުތައް ނެގުމަށް ފުލުހުން ދޭތެރެއަކުން އޮޕަރޭޝަންތައް ހިންގައެވެ. އޭގެތެރޭގައި މާލޭގެ އިތުރުން ހުޅުމާލޭގެ ބައެއް ސަރަހައްދުތަކުން ވެސް މީގެކުރިން ވަނީ އުޅަނދު ޓޯކޮށްފައެވެ. 

ޓޯކޮށްފައިވާ އުޅަނދުތައް ފުލުހުން ނައްތާލަނީ ވެރިފަރާތަށް މުއްދަތެއް ދިނުމަށްފަހު، އުޅަނދު ނުގެންގޮސް ވަކި މުއްދަތެއް ވުމުންނެވެ. 

ޓްރެފިކް އަދި ޕާކިން މައްސަލަ ހައްލުކުރުމަށް ފުލުހުން ކުރަމުންގެންދާ މަސައްކަތުގައި، އެންގުމާ ޚިލާފުވާ ފަރާތްތަކަށް އެއްގަމު ދަތުރުފަތުގެ ޤާނޫނާއި އެއްގަމު އުޅަނދު ޕާކްކުރުމުގެ ޤަވާއިދުގެ ދަށުން އަންނަނީ ފިޔަވަޅު އަޅަމުންނެވެ.