ދުންފަތުގެ އިސްތިއުމާލުކުރުމަކީ ޒަމާނުއްސުރެ ދިވެހީންގެ ތެރޭގައި އޮންނަ އާދައެކެވެ. މި އާދައަށް ޒަމާނީ ކުލަވަރެއްޖެހި ވޭޕްގެ ނަމުގައި ބޭނުންކުރެވެމުން މިދަނީ ސިނގިރޭޓަށްވުރެ ނުރައްކާތެރި އަދި ދެވިހިފާ އެއްޗެކެވެ.

ވޭޕްގެ ޝިކާރައަކަށް އެންމެ ބޮޑަށް ޖެހިފައިވާ އެއްބަޔަކީ އަދުގެ ޒުވާނުންނެވެ. ލިބޭ މުސާރައިން ދެކޮޅު ނުޖެހޭ ވާހަކަ ދައްކާއިރު ހިތާމައަކީ ގިނަ ޒުވާނުން ލިބޭ މުސާރައިގެ ބޮޑުބައި ވޭޕަށް ހުސްކޮށްލަމުން ދިއުމެވެ. މިހާރު ފެޝަނަކަށްވެފައިވާ ވޭޕްކުރުމުގެ ތެރެއިން އެކި ފްލޭވަރތަކާ އެއްކޮށްގެން މަސްތުވާތަކެތި ވިއްކުމުގެ ނުރައްކާވެސް އޮތީ ފެންމަތިވެފައެވެ. މިއީ ވޭޕާ ދުރުވާން ޖެހޭ މުހިއްމު އެއް ސަބަބެވެ. 

ހަލުވިކަމާއެކު ފެތުރެމުންމިދާ ބަލިމަޑުކަމުގެ ވިހައިގެ ޝިކާރައަކަށް މިހާރު ވަމުންދަނީ ސްކޫލު ކުދިންނެވެ. އާންމުންއެއްވެ އުޅޭ ތަންތާގައި ޒުވާންކުދިން ވޭޕްކުރާ މަންޒަރުފެނި ރަހަ ބަލާލުމަށް ކޮށްލާ ޓްރައިއަކުން ޖީލެއް ހަލާކުވެގެންދާކަމީ ހިތާމަކުރަންޖެހޭ ކަމެކެވެ.

ވޭޕްގެ ޝިކާރައަކަށްވެ ދިވެހި ޖީލު  ހަލާކުގެ މަގަށް ދަނީ ހުށަހެޅެމުންނެވެ. ވޭޕްގެ މަސްތުގައި ޖެހެމުންދާ ޒުވާނުން އިތުރުވަމުންދަނީ އިންތިހާ ކަންބޮޑުވާ ދަރަޖައަކަށެވެ. މިއީ އިގްތިސާދީ، އިޖުތިމާއީ އަދި ސިއްހީ ބޮޑު ނުރައްކަލެކެވެ.